Read ronga Mnt 4 Bible Online

Mnt 4 - ronga bible

Mnt 4

¹Kuti loko Petrosi na Yohana vahakhanela ni xitrhungu, kutlhasa a vaprista kun'we ni ndruna ya valaviseli va Tempele ni vasaduki,

²na varon'wiki hi leswi Petrosi na Yohana afaka vadondrisa xitrhungu ni kutivisa kupfuxiwa ka vafi ha Yesu;

³vavakhoma, swanga hi leswi afaka dripelile, vavanhingenisa bohelweni kukondra byixa.

⁴Kambe lava vanyingi vayingeliki ritu vapfumela. A ntrengo wa vavanuna lava vapfumeliki afa wudjula kuva wa ntlhanu wa makume ya madzana (5000).

⁵Loko byixile, kuhlengeletana a vafumi ni vakulu va tiko ni vatrali a Yerusalema,

⁶na Anasi, muprista lwenkulu na Kayafasi, na Yohana, na Alexandre, ni hinkwavu lava afaka vali va yindlu ya muprista lwenkulu.

⁷Vatiki vayimisa vapostola amakari kwavu, vavavutisa vaku: Xana n'witiri leswi hi ntamu wini, kumbe hi vito drini xana?

⁸Kolahu Petrosi na atali hi Moya wa Kuxwenga, avayangula aku: Vafumi va tiko na n'wine vakulu,

⁹n'wine namuhla n'wahivutisa hi mhaka ya vunene lebyi hibyiyentxeliki wanuna wa kuwonyana swiro, akuva n'witiva leswaku ahanyisiwi hi mani,

¹⁰switivani, n'wine ni tiko hinkwadru dra Israyele, leswaku ahanyisiwi hi vito dra Yesu Kriste, wa Nazarete, lweyi n'wine n'wingamuvamba; kambe Xikwembu Nkulukumba amupfuxiki amakari ka vafi. Ha yene a mhunu lweyi ayimiki mahlweni kwenu i ntomi.

¹¹ Hi yene Yesu lweyi anga ribye ledri dridreliwiki hi n'wine vayaki, kambe drihambiwiki a ribye ledri drinene dra masungulo.

¹²Na swone, akuna kuhuluka ha mun'wana, hikuva akuna vito drimbeni a hansi ka tilo, ledri vhanu vadrinyikiwiki, ledri hingafanekelaka a kuhuluka ha drone[3]

¹³Vatiki vahlalela kutiya ka Petrosi na Yohana, vavani kuhlamala hikusa afa vaswitiva leswaku afa vangadondranga xikolweni, kutani vavativa leswaku afa vali vadondrisiwa va Yesu.

¹⁴Kambe, hikuva lweyi wa kuholisiwa afaka ayimi kolaho na vone, vapfumala swakuvakaneta ha swone.

¹⁵Kutani vavaleleta leswaku vahuma hubyini, vasala vakhanelisana kun'we vaku:

¹⁶Xana hitayentxa yini hi vhanu lava? Hikusa avayaki hinkwavu va Yerusalema va switiva leswaku xikombiso xiyentxiwi ha vone, ahinakuswikota kuswilandrula!

¹⁷Kambe akuva mhaka leyi yingatiyisiwa amahlweni hi kuhangalaka amakari ka vhanu, ahivatsimbeni hi kuvatxhavisa, akuva vangahatitlhela vadondrisa mhunu ni mun'we hi vito ledri.

¹⁸Vavavitaniki, vavatratriya leswaku vangahakhaneli ni kutrongo, nambi kuli kudondrisa hi vito dra Yesu.

¹⁹Kambe Petrosi na Yohana vayangula vaku ku vone: A kutreme n'wine, xana swilulamile amahlweni ka Xikwembu Nkulukumba a kuyingiseta n'wine kutlula kuyingiseta Xikwembu Nkulukumba xana?

²⁰Hikusa hine ahina kuswikota a kutrika kuhlaya leswi hiswivoniki hiva hiswiyingela.

²¹Kolahu a vafumi vatlhela vavatratriya, vavantrhunxa. Avakumanga laha vangavabaka ha kone, hikusa hinkwavu afa vadrumisa Xikwembu Nkulukumba hi leswi swihumeleliki.

²²A mhunu lweyi afaka ahanyisiwi hi ndlela ya mahlonana, afa ali wa malembe lawa matlulaka mune wa makume (40).

²³Loko Petrosi na Yohana vantrhunxiwile, vaya ku valekwavu, vavadrungulela hinkwaswu leswi a vaprista lava vakulu ni vakulu va tiko vavabyeliki swone.

²⁴Ntrhaku ka kuva vaswiyingelile, vakhongota kun'we Xikwembu Nkulukumba, vaku: Hosi, wene Muvumbi wa tilo ni misava, ni likhulu, ni hinkwaswu leswi swinga ku swone;

²⁵ Wene uhlayiki hi Moya wakuxwenga hi nomu wa Davida, nandra waku, uku: A matiko mani nkitrikitri ha yini, ni vhanu a makungu ya kuka-ndlela?

²⁶A vafumi va misava vapfukile ni varangeli va-Matiko vatlhanganile mbangu mun'we akulwa ni Hosi na Kriste wa yone.

²⁷Hikusa vatlhangani ha kunene, amutini lowu, kulwa ni Nandra waku lweyi wa kuxwenga, Kriste, lweyi umutotiki, vanga vone va Heroda na Ponciu Pilatu, kun'we ni va-Matiko ni tinxaka ta Israyele.

²⁸Vatakahamba hinkwaswu leswi swibekisiwiki khale hi voko draku ni hi kungu draku.

²⁹Ni swoswi, we Hosi, lavisa a switxhaviselo swavu, uva unyika a malandra yaku a kudondrisa ritu draku hi kutiya hinkwaku,

³⁰unalavuta a voko draku, akuva kuhumelela a kuholisiwa ka vuvabyi, ni swikombiso ni mahlolana, hi vito dra Nandra wa kuxwenga, Yesu.

³¹Loko vakukhongotile, kutrekatreka a mbangu lowu afaka vahlengeletani ku wone; hinkwavu vatala hinkwavu hi Moya wa Kuxwenga, kutani vahaxa a ritu dra Xikwembu Nkulukumba hi kutiya.

³²A vunyingi bya lava vapfumeliki afa vali mbilu yin'we ni moya mun'we. Mfuri afa kungena mun'we lweyi aliki a mintxhumu leyi anganayu i yake vuswake, kambe hinkwaswu ku vone afa swili swavu hinkwavu.

³³Na swone, a vapostola afa vahlaya hi ntamu lowu wukulu a vumboni bya kupfuka ka Hosi Yesu; a timpswalu tinyingi afa tili henhla kwavu hinkwavu.

³⁴Nakone afa kungena xisiwana amakari kwavu; hikuva hinkwavu lava afaka veni masimu, kumbe tiyindlu, afa vaxavisa, na vabuyisa a mintrengo ya leswi vaxavisiki;

³⁵kutani afa swiyavelisiwa ku mun'wana-ni-mun'wana swanga hi leswi afaka apfumalisa xiswone.

³⁶Na yene Yosefa lweyi atxhuliwaka Barnabasi hi vapostola, hileswaku: N'wana wa kumiyeta, loko kutlhamuxeliwa, mulevi, abelekiwiki Kipra;

³⁷afa ali ni nsimu, ayayixavisa, abuyisa ntrengo wa yone, atatawubeka minengeni ya vapostola.