Read ronga Mnt 7 Bible Online

Mnt 7 - ronga bible

Mnt 7

¹A muprista lwenkulu avutisi Stefano aku: xana angava swoleswo?

²Yene ayangula aku: Va-le-kweru, na n'wine vatatana! Yingelani: Xikwembu Nkulukumba wa vumenyemenye atikombisi ku tatana weru Abrahamu loko ahali Mezopotamiya, na angasangana yaka Kharana,

³aku ku yene: Huma tikweni dra kwenu ni le maxakeni yaku, uya tikweni ledri nitakakukomba drone.

⁴Kunga lahu Abrahamu asukiki tikweni dra va-Kaldeya, kutani ayitrhamisa Kharana. Ntrhaku ka kufa ka tatana wakwe, Xikwembu Nkulukumba atisi Abrahamu atikweni ledri, n'wine n'witrhamisaka ku drone swoswi.

⁵Ku drone, angamunyikanga pfindla, nambi wuli mbangu wa kudringana a nkondro wun'we, kambe amudumbisa, nambi angasivana n'wana, leswaku atamunyika misava leyi hinkwayu, yene ni vana vakwe.

⁶Nakone Xikwembu Nkulukumba ahlayi ku Abrahamu leswaku: A vana vaku vatatrhamisa swanga valuveli tikweni dra vambe. Vatatrhamisa swanga swikarawa na vaxanisiwa hi mpfhuka wa malembe ya mune wa madzana (400).

⁷Na swone Xikwembu Nkulukumba ati: Nitayavanyisa tiko ledri vatakadritirela. Ntrhaku ka leswo, vatahuma ku tiko ledro vatanitirela ku wolowo mbangu.

⁸Hi laha amunyikiki xipfumelelanu xa kusoka. Abelekisa xiswoswo Yisaki, amusokisa sikwini dra vuntlhanu na mararu; Yisaki abeleka Yakobe, na yene Yakobe abeleka vapatriyarka va khume na vabiri.

⁹A vapatriyarka vavini vukwele ku makwavu Yosefa, kutani vamuxavisa akuva ayisiwa a Egipta. Kambe Xikwembu Nkulukumba, afa ali na yene;

¹⁰amuhuluxa amahlomulweni yake hinkwawu; amunyika timpswalu ni vutlhari amahlweni ka Faro, mufumi wa Egipta, lweyi amusimekiki kuva ndrunankulu ya Egipta ni ya yindlu yake.

¹¹Kolahu kuwi ndlala yikulu atikweni hinkwadru dra Egipta ni dra Kanana, driva khombo ledri drikulu, la ka kuva a vatatana veru vangahakumi ni swakuda.

¹²Kambe loko Yakobe, ayingeli leswaku a Egipta kuni mavele, aruma vatatana veru hi dra kusungula.

¹³Loko vayi hi dra vubiri, Yosefa atitivisa ku vamakwavu, kutani Faro aswitiva leswaku i va lixaka dra Yosefa.

¹⁴ Ntrhaku Yosefa arumela kuyateka tatana wakwe Yakobe, ni ndangu wakwe hinkwawu, lava afaka vali ntlhanu wa makume na mabiri na ntlhanu (75) wa vhanu.

¹⁵Yakobe ayatrhama Egipta, afela kone, yene ni vatatana veru.

¹⁶Kutani vatlakuleliweli le Sikeme, vayalahliwa axireni ledri Abrahamu afaka adrixavi hi mali ku vana va Emori, le Sikeme.

¹⁷Kambe loko kutlhasi nkama wa xidumbiso, lexi afaka Xikwembu Nkulukumba adumbisi Abrahamu ha xone, a tiko dra Israyele afa driyandrile, dritalile Egipta;

¹⁸Kukondra kutumbuluka mufumi mun'wana le Egipta, lweyi wa kuka angativanga Yosefa.

¹⁹Yelweyo ahamba hi vutlhari ku lixaka dreru, axanisa vatatana veru; atxukumeta vatrongwana vavu, vangahatitama vahanya.

²⁰Ankameni lowo, kubelekiwa Moxe, n'wana wa kuxonga amahlweni ka Xikwembu Nkulukumba, awundliwa tihweti tiraru andlwini ya tatana wakwe.

²¹Atiki atxukumetiwa handle, a n'wana Faro wa wanhwanyana, amurola, amuwundla akuva ava n'wanakwe.

²²Moxe ahangadondrisiwa avutlharini hinkwabyu bya va-Egipta, kambe afa ani ntamu amaritwini ni le mintirweni yake.

²³Loko avi wa malembe ya mune wa makume, Moxe akumbuka kuyendrela vamakwavu, vana va Israyele.

²⁴Atiki avona mun'we wa mu-Egipta axanisa mun'wana wavu, amuyimela, amudrihisela, adlaya mu-Egipta.

²⁵Moxe afa apimisa leswaku vamakwavu vatayingelisisa leswaku Xikwembu Nkulukumba atavahuluxa hi voko drakwe. Kambe vone avaswiyingelisisanga.

²⁶Hi siku ledri drintlhantamaka, Moxe akuma va-Israyele vabiri lava afaka valwa. Avakombela leswaku varula, aku ku vone: N'wine n'wi van'we! Xana n'wixaniselana yini?

²⁷Lweyi adoheliki wa-le-kwavu, asusumeta Moxe, aku ku yene: Xana hi mani lweyi akubekiki murangeli ni mutremi ahenhla kweru?

²⁸Xana udjula kunidlaya na mine swanga hi leswi udlayiki lweyi wa mu-Egipta tolo?

²⁹Loko ayingeli leswi, Moxe atrutruma, aya tikweni dra Mediyana, lomu angavani vana vabiri kone.

³⁰Ntrhaku ka malembe ya mune wa makume, a ntrumi yihumelela ku yene, ahuleni dra nhava ya Sinayi, na yili langavini dra ndrilo ankun'hwini.

³¹Moxe ayivoniki ahlamala hi xivoniso lexi, aku awatrhindrekela kuya xivonisisa, kolahu ayingela ritu dra Hosi, driku:

³²Hi mine Xikwembu Nkulukumba wa vatatana vaku, Xikwembu Nkulukumba wa Abrahamu, na Yisaki, na Yakobe. Moxe atxhava, arurumela, angahatiyi ni kulavisisa kone.

³³Kambe a Hosi yiku ku yene: Ntrhunxa tintangu aminkondrweni yaku, hikusa a mbangu lowu uyimiki ku wone, i mbangu wa kuxwenga.

³⁴Nivonisisile a kuxaniseka ka tiko dranga a Egipta. Nive niyingela kukonya kwavu. Kutani nifulameli kutava huluxa, hikolahu-ke famba, nikuruma a Egipta.

³⁵Moxe yelweyo vangamulandrula vaku: Hi mani lweyi akubekiki kuva murangeli ni mutremi? Kambe Xikwembu Nkulukumba amurumiki, ava murangeli ni mutiruli, hi ntrumi leyi yihumeleliki ankun'hwini.

³⁶Hi yene lweyi angahumexa vatatana veru a Egipta, hi kuyentxa mahlolana ni swikombiso atikweni ledriya, ni le likhulwini dra libungu, ni le huleni, hi malembe ya mune wa makume (40).

³⁷Hi yene Moxe lweyi angaku ku vana va Israyele: Xikwembu Nkulukumba atan'wipfuxela amakari ka vamakwenu, amuprofeta lweyi wanga ha mine.

³⁸Hi yene lweyi angava kone anhlengeletanwini ya le huleni, kun'we ni ntrumi leyi afaka yivulavula na yene anhaveni ya Sinayi, kun'we ni vatatana veru; hi yene lweyi ayamukeliki a maritu ya vutomi akuva ahinyika wone.

³⁹Kambe a vatatana veru avarandranga kumuyingiseta, kambe vamuyalela, vatlhelela Egipta hi timbilu tavu,

⁴⁰vaku ku Aroni: Hi hambele swikwembu leswi switakafamba amahlweni kweru; hikusa Moxe, lweyi ahihumexiki tikweni dra Egipta, ahitivi leswi swimuhumeleliki.

⁴¹Vahangahamba xifaniso xa role, vadlaya swifuyu swinyingi swa mhamba vayentxa nkhuvu kutwalisa xifaniso lexi vaxiyentxiki.

⁴²Kambe Xikwembu Nkulukumba avandrulukela avanyiketa kutirela a nyimpi ya tilo. Swanga heswi kutraliwiki abukwini dra vaprofeta vaku: Xana n'wininyiki a switlhavelo ni magandrelo a malembe lawa ya mune wa makume (40) ahuleni, yindlu ya Israyele?

⁴³Kasi n'witlakulile a tende dra Moloki[5], ni nyeleti ya xikwembu xa Renfani,[6] swinga swithombe leswi n'witihambeliki swone kuva n'wiswikhisamela. Hileswo-ke nitan'wirurisela halahaya ka Babilona.

⁴⁴A tende dra vumboni afa drili ku vatatana veru ahuleni, swanga hi leswi kuleletiki lweyi angabyela Moxe, akuva adrihamba hi xifaniso lexi afaka axivonile.

⁴⁵A vatatana veru, loko vadriyamukelile, vadrinhingenisa, na vali na Yoxuwa, atikweni ledri afaka drili dra matiko lawa Xikwembu Nkulukumba amahlongolisiki amahlweni ka vatatana veru, kuyatlhasa ku masiku ya Davida.

⁴⁶Davida lweyi, akumi timpswalu amahlweni ka Xikwembu Nkulukumba, aviki akombela leswaku adjulela Xikwembu Nkulukumba wa Yakobe a wutrhamu.

⁴⁷Kambe avi Salomoni lweyi angamuyakela yindlu.

⁴⁸Nambi swili tano, lweyi anga henhla-henhla angatrhamisi tindlwini leti tihambiwiki hi mavoko ya vhanu swanga heswi muprofeta aliki:

⁴⁹A tilo i xiluvelo xanga, ni misava i vunalavutelo bya minkondro yanga. Xana n'wine n'witaniyakela yindlu muni, kuhlaya Hosi, kumbe xana wutava wini a mbangu lowu nitakawisela ku wone?

⁵⁰ Xana ahi voko dranga drihambiki hinkwaswu leswo?

⁵¹N'wine, va tinhamu ta kunonon'hwa, n'wingasokikiki a timbilu ni tindleve, n'wiyalela Moya wa Kuxwenga minkama hinkwayu! Swanga hi leswi a vatatana venu vaviki swone, na n'wine n'wi tanu.

⁵²Amakari ka vaprofeta, hi wini lweyi wa kuka a vatatana venu vangamuxanisanga, xana? Vadlayi lava vativisiki khale, hi kuprofeta, a kuta ka Mululami, lweyi n'wine swoswi n'wingavawongi vakwe ni vadlayi vakwe,

⁵³n'wine n'winganyikiwa Nawu lowu wutisiwiki hi swirun'wa, kambe an'wiwubekisanga!

⁵⁴Vaku vayingela leswo, vahlundrukisisa timbilwini tavu, vamuketrenyela menyo.

⁵⁵Kambe yene, atala hi Moya wa Kuxwenga, alavisa Tilweni avona vumenyemenye bya Xikwembu Nkulukumba, na Yesu, ayimiki axineneni xakwe,

⁵⁶ahangaku: Lavisani! Nivona Matilo mapfulekiki, ni N'wana wa Mhunu ayimiki axineneni xa Xikwembu Nkulukumba!

⁵⁷Kambe vone, vabandlukana hi ritu ledri drikulu, vatisiva tindleve, vatitxukumetela hinkwavu a henhla kwake.

⁵⁸Vamususumetela ahandle ka muti, vamukhandla hi maribye. A timboni tibeka minkhantxu ya tone aminengeni ya wandrisanyana lweyi valiki i Saulo.

⁵⁹Kuti loko vamukhandla, Stefano akhongota, aku: Hosi Yesu, yamukela moya wanga!

⁶⁰Ntrhaku akhisamiki na abandlukana hi ritu ledri drikulu aku: Hosi, ungavayavanyisi hinkonta ya xidoho lexi! Atiki ahlaya leswo, a fa.