Read ronga Rm 1 Bible Online

Rm 1 - ronga bible

Rm 1

¹Mine Pawulosi ningamutiri wa Yesu Kriste, nivitaniwiki nihlawuliwa akuva mupostola wa Ivangeli ya Xikwembu Nkulukumba,

²leyi kusunguleni ayidumbisiki hi vaprofeta vakwe amatralweni ya kuhlawuleka,

³Makongomanaka ni N'wana wakwe; lweyi a pswaliwiki hi nyama a lixakeni dra Davida,

⁴kambe a kombisiwiki hi ntamu leswaku, i N'wana wa Xikwembu Nkulukumba hinkonta ya Moya wa Kuxwenga, hi kupfuka kwake ku vafi, anga Yesu Kriste a Hosi Yeru.

⁵Kuvi hikola kwake hi yamukeliki a timpswalu ni vurumiwa, kuyisela kuyingiseteni ka kupfumela, amakari ka vhanu va-Matiko hinkwawu hinkonta ya vito drakwe.

⁶Ku n'wine lava vanga Roma n'wikumeka ntlaweni lowo wa lava vavitaniwiki kuva va Yesu Kriste.

⁷Nitralela n'wine hinkwenu, Xikwembu Nkulukumba an'wirandriki, an'wivitaniki a kuhanyela Yene. Ingi Xikwembu Nkulukumba, Tatana weru, na Yesu Kriste Hosi yeru vangan'winyika timpswalu ni kurula.

⁸A kusungula nitlangela Xikwembu Nkulukumba wanga ha Yesu Kriste, hinkonta yenu hinkwenu, hikusa amisaveni hinkwayu kukhaneliwa hi kupfumela kwenu.

⁹Hikuva Xikwembu Nkulukumba lweyi nimutirelaka a moyeni wanga ku Ivangeli ya n'wana'kwe, i mboni yanga ya leswi swaku minkama hinkwayu nan'widrimuka.

¹⁰Nikombela swikhongotweni swanga hi minkama hinkwayu, hi kurandra ka Xikwembu Nkulukumba, aninyika ndjombo ya kuta nitava na n'wine.

¹¹Hikusa ninikunavela kun'wivona ni kun'witivisa swatinyiko ta Moya, leswaku n'witiyisiwa swinene.

¹²Hi leswi swaku, akuva kun'we na n'wine, mine nitiyisiwa hi kupfumela loku hinga na kone, ku n'wine ne ku mine.

¹³ Anirandri mfuri vamakweru, leswaku n'wikohla leswaku ha kanyingi niyentxi makungu ya kun'wiyendrela, akuva na kone nikuma mihandru swanga hi leswi swiyentxekaka makari ka van'wana.

¹⁴Nini nandru ku va-Girika, ni le ku va-Barbara, ku tintlhari ni le ku lava vakudrivala.

¹⁵Hikolaho, akunavela ku le ku mine, nitibekiselile akun'witivisa Ivangeli, ku n'wine lava vanga le Roma.

¹⁶Aninatingana hi Ivangeli ya Kriste. Hikusa kunene hi wone ntamu wa Xikwembu Nkulukumba wa kuhanyisa hinkwavu lava pfumelaka, kusungula a va-Yuda ni va-Matiko.

¹⁷Hakuva ku wone, kupfuleteliwa avululami bya Xikwembu Nkulukumba, kupfumela hikupfumela, swanga hi leswi kutraliwiki: Kambe amululami atahanya hikupfumela.

¹⁸Hikuva amahlundru ya Xikwembu Nkulukumba matikombisa Matilweni ahenhla ka swidoho hinkwaswu ni vubihi hinkwabyu lebyi byindrulutaka xihlayelamfuri hi vubihi.

¹⁹Hikuva leswi swinga tibyiwaka swa Xikwembu Nkulukumba swikombisiwa ha vone, Hikusa ni le ku vone Xikwembu Nkulukumba atitivisile.

²⁰Hikusa leswi swinga voniwiki swake, a kusukela akutumbuluxiweni ka misava, swanga hi ntamu wakwe lowu wunga helikiki ni vukwembu byake, swivonekisiwa switibyiwa hi mintxhumu leyi a mitumbuluxiki. Hikola ka leswo akuna ku tilandrula.

²¹Hikuva, loko vativile Xikwembu Nkulukumba, avamudrumisanga, nambi ka kuva kun'witlangela, vali kundruluka miyanakanyu yavu mingapfuni ntxhumu, ni timbilu tavu ta kubiha ti lahlekile amunyameni.

²²Vatihlaya leswaku i tintlhari, vandruluka swimphunta.

²³Vandruluta a lidrumu dra Xikwembu Nkulukumba lweyi angafikiki, vagandrela swifaniso swa mhunu lweyi a faka, vako vagandrela swifaniso swa tinyanyana, ni tinyoka ni swa swin'wana swihari.

²⁴Hikolahu na Yene Xikwembu Nkulukumba a vanyikeli akunaveleni kwavu, vawela mintirweni ya tingana ya kusoleka a mirini yavu.

²⁵Vandruluti a xihlayelamfuri xa Xikwembu Nkulukumba hi madrimi, Vagandrelile ni kutirela swivumbiwa matrhan'wini ya Muvumbi, Yene lweyi afanekelaka kugandreliwa hila kungahelikiki. Amen!

²⁶Xileswo, Xikwembu Nkulukumba avatrikeli akunaveleni ka swatingana, hikusa nambi hi vavasati vavu vandruluta ntwanano wa ntumbuluku hi ntwanano wa kuhambana ni wa ntumbuluku.

²⁷Hi ndlela yoleyo, a vavanuna vatriki a ntwanano lowu nga wone ni wansati akuva vapfura hi kunavelana a van'we ku van'wana. Vahisekela ku navelana mun'we ni mun'wana, kutani vayamukeli hakelo hikola kaswihoxo swavu.

²⁸Na swone leswi vatrikiki kutiva Xikwembu Nkulukumba, xiswoswo Xikwembu Nkulukumba avanyikeli avutlharini bya kuhomboloka, akuva vayentxa leswi faka swingafanekeli.

²⁹Vataliki hi vusomboloki hinkwabyu, ni kunavela, ni vubihi, ni matrhoho, ni vudlayi, ni pfilumpfilu, ni madrimi, ni mona ni kuhleva.

³⁰Vahlevi ni valumbeti, ni vavengi va Xikwembu Nkulukumba, vakulebya, vatikulisi, vatikukumuxi, vatisi va madrimi ni lava kuka vangayingeli vapswali.

³¹Vakuka vangena lipfalu, vakuka vanga dumbekanga, vakupfumala lirandru ni lirere van'we ku van'wana.

³²Lava vativaka leswi swinene swa Xikwembu Nkulukumba (hileswaku hinkwavu lava hanyisaka xileswi vafanekeliwa hi lifu). Avayentxi leswo ntsena kambe vakokela ni van'wana a kuyentxa swakufana