Read ronga Rm 13 Bible Online

Rm 13 - ronga bible

Rm 13

¹Hinkwavu vafanekela kuti beka hansi ka vafumi, hikusa akuna mfumu lowu wungahumikiki ku Xikwembu Nkulukumba. A mimfumu hinkwayu leyi minga kone mibekiwi hi Xikwembu Nkulukumba.

²Hindlela leyi, lweyi atiyalisaka ku mfumu atiyalisa nawini wa Xikwembu Nkulukumba, lava vayentxisaka xileswo vatayamukela xikhatiso.

³A vafumi avatxhavisi loko ku yentxiwa leswi swinene, kambe vatxhavisa loko kuyentxiwa leswi swakubiha. Awudjuli kutxhava mfumu? Yentxa leswi swinene Kutani utakuma kukhensiwa ha wone,

⁴hikusa amufumi i mutireli wa Xikwembu Nkulukumba, akuva akuyentxela leswi swinene, kambe loko uyentxa leswi swakubiha, txhava; hikusa a himahala a tameliki lipanga, yene akuva mutireli wa Xikwembu Nkulukumba, lweyi adrihisa, akuva akhatisa lweyi a yentxaka leswi swakubiha

⁵Hikolahu, ufanele kuyingiseta, kunge ntsena kuhuluka xikhatiso, kambe na kone kuva hi mfanelo ya lipfalu.

⁶Hikolahu ka leswo n'wihakelaka tinemba, hikusa i vatireli va Xikwembu Nkulukumba, akuva va swihisekela leswo.

⁷Hilahu-ke hakelane mun'wana-ni-mun'wana leswi fanekelaka: hakelani nhlengo, ku lweyi wa nhlengo; ni tinemba, ku lweyi wa tinemba; vanani ni swihluwa ku lweyi afanekeliwaka hi kuyentxeliwa swihluwa, nyikani kutlakuka ku lweyi afanekeliwaka hi kutlakuxiwa.

⁸N'winga vi ni nandru wa xantxhumu na mhunu, loko kunge wa lirandru dra van'we ku van'wana. Lweyi arandraka wa-le-kwavu ahetisa nawu.

⁹ Inga leswaku: Ungaviyentxa vumbuye, ungavidlaya, ungaviyiva, ungavinavela. Kutani, loko kuli ni wun'wana nawu, hinkwayu mikatriwa ku mun'we ntsena, lowu wuliki: randra mhunukuloni swanga ha wene.

¹⁰Alirandru adriyentxeli wa-le-kwavu swakubiha. Hileswo-ke, a lirandru i kuhetisa ka nawu hinkwawu.

¹¹Nihlaya leswo ku n'wine n'witivaka nkama: Leswaku i nkama wa kupfuka vurongweni; a huluxo dreru dri kusuhi ngopfu kutlula loko hi yamukeliki vupfumeli.

¹²A vusiku byihundrile, a vuxa byi kusuhi. Ahitrikeni mintiro ya munyama, ahi tiyambexeni hi matlhari ya livaningo.

¹³Ahi fambeni hi kudumbeka, swanga hi loko hili livaningweni dra nhlikanhi, kunge kudeni ni le kupopsweni, kunge a vuwoswini ni le switolovetweni swakubiha, kunge timholoveni ni le matrhohweni.

¹⁴Kambe yambalani Hosi Yesu Kriste, n'winga kokeliweni a nyameni akuva n'wita yentxa a kunavela ka yone.