Read ronga Rm 15 Bible Online

Rm 15 - ronga bible

Rm 15

¹Hine lava hitiyiki akupfumeleni hifanela kubyatrha lava kutrana lava ngeke swanga ha hine, na hinga djuli leswinga hi nyoxisaka.

²Mun'wana-ni-mun'wana wenu afanekela kutrhavisa wa-le-kwavu ku leswinga swinene akuva swita mutiyisa akupfumeleni.

³Hikusa na kone Yesu angadjulanga leswinga munyoxisaka. Swanga hi leswi kutraliwiki: A swifingeto swa lava afaka vakufingeta swi weli henhla kwanga.

⁴Kutani hinkwaswu leswinga kone Matralweni ya Kuhlawuleka switraliwi kuva ndondriso yeru, leswaku hikulehisa mbilu, ni kutiyisiwa hi matralwa, hiva ni kulavisela.

⁵Ingi Xikwembu Nkulukumba lweyi a kutiyisela ni kulavisela swipfaka ku Yene, angan'winyika kuyingelana kuvavisekeni avan'we ku van'wana, mi landra a xikombiso xa Yesu Kriste.

⁶Keleswi, i kuva hinkwenu kun'we ha ritu drin'we n'widrumisa Xikwembu Nkulukumba, Tatana wa Hosi yeru, Yesu Kriste.

⁷Hileswo-ke, yamukelanani van'wana ni van'wana, swanga hileswi Kriste ahiyamukeliki, kuva lidrumu ku Xikwembu Nkulukumba.

⁸Niswihlaya mfuri leswaku, Kriste ateli kutirela lava vakusoka, hinkonta ya xihlayelamfuri xa Xikwembu Nkulukumba, akuva ata hetiseka a swidumbiso leswinga yentxiwa ku vatatana;

⁹ akuva va-Matiko vadrumisa Xikwembu Nkulukumba hinkonta ya lirere drakwe; swanga hi leswi kutraliwiki: Hiswoswo nita kudrumisa amakari ka va-Matiko. Kutani nita kuyimbelela swidrumiso avitweni draku, hi ku kudrumisa.

¹⁰Na swone kutraliwile vaku: Ingiki a va-Matiko mambeni avanyoxe kun'we ni va tiko dra Xikwembu Nkulukumba.

¹¹Ku mbangu mun'wana kuhlayiwa leswaku: Drumisani Hosi, n'wine hinkwenu va-Matiko, na n'wine hinkwenu vhanu mudrumisani.

¹² Muprofeta Ezaya na yene ati: Kutata wa lixaka dra Yixayi lweyi a taka yima afuma matiko; a va-Matiko vata beka kulavisela ku yene.

¹³Ingi Xikwembu Nkulukumba, lweyi kulavisela kupfaka ku yene, aan'witate hi kutrhava ni kurula kupfumeleni kwenu, akuva n'wiva lava vayandriki akulaviseleni, hi ntamu wa Moya wa Kuxwenga.

¹⁴Mine, nini kudumba vamakweru, hikola kwenu, leswaku n'witali hi vunene, n'witali hi vutivi byinyingi, n'witibekiseli akuva n'wilayana van'we ni van'wana.

¹⁵Nambi swilitanu, ni n'witraleli hi kutiyanyana henhla ka timhaka leti akuva n'witiyanakanya. Niyentxi leswo hinkonta ya ntiro lowu Xikwembu Nkulukumba anirwexiki,

¹⁶akuva mutireli wa Yesu Kriste amakari ka va-Matiko. A ntirweni wa kutivisa Ivangeli ya Xikwembu Nkulukumba, leswaku va-Matiko vata kombisiwa ku Hosi swanga mhamba leyi trhavisaka ni leyi basisiwiki hi Moya wa Kuhlawuleka.

¹⁷Swanga hi vapfumeli ku Yesu Kriste, ni kutlakuxiwa kukulu a ntirweni lowu wa Xikwembu Nkulukumba.

¹⁸Hikusa mine anitiyi nhlana wa kukhanela loko kunge hi leswi Kriste aswi yentxiki ha mine akuva ni yisa va-Matiko kuyamukela Xikwembu Nkulukumba. Leswo swi yentxiwi hi maritu ni mintiho,

¹⁹hi mahlolana ni swikombiso, hi ntamu wa Moya wa Xikwembu Nkulukumba. Hi ndlela leyi na tivisa Ivangeli ya Kriste, kusukela Yerusalema ni hinkwawu matlhelo akuya tlhasa tikwaneni dra Ilirika.

²⁰Nambi swilitanu ni tikaratile hi kutivisa ntsena a Ivangeli lomu Kriste afaka angasinatibyiwa, akuva ninga tiyaka ahenhla ka masungulo ya vambe.

²¹Nilani a Matralwa ya Kuxwenga maliki: Lava afaka vangasina byeliwa ha yene vatavona ni lava afaka vangasinayingela ntxhumu vatayingelisisa.

²²Hikolahu, ni siveliwile minkama ya kutala kuta lahu ni n'wiyendrela.

²³Kambe swoswi, nihetiki mintiro yanga ku matikwana lawa, nilavisela kuta ku n'wine, swanga hi leswi afaka ni navelile kuli khale.

²⁴Nitata n'wiyendrela loko niya Xipanya. Nitibekiseli kutata n'wivona hi nkama lowo na nitava ni kunyoxa hikuva kone a makari kwenu.

²⁵Kambe swoswi ni kongoma Yerusalema hi ntiro wa vapfumeli.

²⁶Hileswaku a vapfumeli va-le-Makedoniya ni va-le-Akaya vatrimbi mhaka ya kuhamba xikombelo xa kupfuna vamakwavu swisiwana swa nhlengeletanu ya Yerusalema.

²⁷Vaswikumi swili swone kuyentxa leswo, kambe hakunene afa vali ni nandru. Swanga heswi a vapfumeli va-le-Yerusalema vayavelaniki a swa moya ni va-Matiko, kutani lava vone vafanela kupfuna lavaya hi swa miri.

²⁸Loko nitava ni bekisi mhaka leyi niva ni vanyiketa mihandru ya xikombelo, nita kongoma a Xipanya na nitaya vayendrela hi nkama lowo.

²⁹Natiyisa leswaku, loko nitatlhasa halanu, nitata na nitali hi matovoko ya Kriste.

³⁰Vamakweru, nan'witratriya ha Yesu Kriste ni hi lirandru anilandra a Moya wa Kuxwenga wuhinyikaka leswaku mi tlhangana kun'we na mine, n'wikukhongota hi kuhiseka ku Xikwembu Nkulukumba ha mine.

³¹Khongotani Xikwembu Nkulukumba akuva ni ntrhunxeka ku lava va-le-Yudeya, vanga pfumelikiki ku Kriste, ni leswaku a xipfuno lexi ni xi yisaka ku vapfumeli va-le-Yerusalema xi ngava ni kuyamukeliwa ha hombe.

³²Hi ndlela leyo, nita n'wiyendrela, loko Xikwembu Nkulukumba aswirandra, na nitali hi kunyoxa, ni kukuma kuwisa kutrongo kun'we na n'wine.

³³Xikwembu Nkulukumba lweyi a nyikaka kurula, ave na n'wine hinkwenu. Amen.