Read ronga Rm 16 Bible Online

Rm 16 - ronga bible

Rm 16

¹Nin'wi leleta ku Febe makweru wa wansati lweyi angamutireli wa nhlengeletanu ya Kenkereya.

²Muyamukelani swinene hi vito dra Hosi, hi laha swifanekelaka kuyentxiwa amakari ka vapfumeli, n'wimupfuna ni kuhinkwaswu leswi angaswidjulaka, hikusa na yene apfuni lava kutala nambi mine yelweyi.

³ Nidrungulelani Presila na Akila, a vatirikulori ku Yesu Kriste.

⁴Vanga nyiketa vutomi byavu khombyeni kuhuluxa vutomi byanga. Hikolahu na vatlangela ngopfu. Ahi mine ntsena, kambe na wone hinkwawu makereke ya vapfumeli lava humaka ku lava vanga khongotikiki Xikwembu Nkulukumba.

⁵Nidrungulelani na swone a vapfumeli lava hlengeletanaka a ma kaya kwavu. Drungulani a nakulori Epeneto lweyi a ngava xirangana xa xifundrankulu xa le Aziya a kupfumela ku Kriste.

⁶Nidrungulelani Maria lweyi anga n'witirela ngopfu.

⁷Drungulani Andriniko na Juniya, a maxaka yanga, vabohiwakulori. Vatibyiwa ngopfu makari ka varumiwa lava dumbekiki ku Kriste varangela mine.

⁸Nidrungulelani Ampliyato, nakulori wa kurandreka ngopfu Hosini,

⁹na Urbano mutirelikulori ntirweni wa Kriste, na Xitakiyo nakulori.

¹⁰Nidrungulelani Apelesi, lwa tinyiketeliki ku Kriste ni ku vandangu wa Aristabulo.

¹¹Nitlhasiselani na swone madrungula ku Herodiyoni, xaka dranga, ni ku vandangu wa Narkiso lava pfumelaka Hosini.

¹²Nidrungulelani Trifena na Trifosa lava tikaratelaka ntiro wa Hosi, nakone ni drungulelani nakulori lweyi a randrekaka, Persida lweyi na yene atiriki ngopfu.

¹³ Nidrungulelani Rufu lweyi a tikombisiki ngopfu ntirweni wa Hosi, kun'we ni mamana wakwe, lweyi anga va mamana wanga swinene.

¹⁴Nidrungula na kone Asinkrito, Flegonte, Hermesi, Patrobasi, Hermasi ni hinkwavu van'wana lava nga navu.

¹⁵Nidrungulelani Fililogo na Yuliya, Nerewu ni makwavu wa wansati na Olimpiya, ni vapfumeli hinkwavu lava nga navu.

¹⁶Drungulanani van'we ni van'wana hi kumpswompswana ka vumakwavu. A makereke hinkwawu ya Kriste man'widrungula.

¹⁷Na n'wikhongota vamakweru, akuva n'witivonela ku lava pfuxaka ku hambana ni kutlakuxa kuganaganeka kakuhambana ni dondro leyi n'wingayi yamukela. Travukanani navu,

¹⁸hikusa volavu avatireli Kriste Hosi yeru, kambe, ina votirela makhuri yavu. Hi maritu yavu lawa ya hombe ni hi kukutxa, vakanganyisa vhanu lava vangeke na rengu.

¹⁹A kudumbeka loku n'winganaku ku Kriste kutibyiwa matlhelo hinkwawu, kolahu na trhava ha n'wine. Kambe nidjula leswaku n'witlhariha swinene n'wilandra leswinene, ni kunabyala n'witatingawula swakubiha.

²⁰Xikwembu Nkulukumba lweyi a nyikaka kurula, atahatla apswhandlasa Sathana a hansi ka minkondro yenu. Ingi a Hosi yeru Yesu Kriste angan'witovokisa.

²¹ Awa n'widrungula Timotewu, a mutirelikulori, ni swanga ha Lukiyo na Yasawu na Sosipetro.

²²Mine, Tersiyo mutrali wa papela ledri nan'widrungula ha Kriste.

²³ Gayo na yene awa n'widrungula. Ni rureliwi kaya kwake nala hi laha a Kereke hinkwadru drihlengeletanaka kone. Erasto, lweyi anirureliki ni Kereke hinkwadru awan'widrungula, na Kwarto makweru. [

²⁴Ingi a Hosi yeru Yesu Kriste anga n'witovokisa hinkwenu. Amen.]

²⁵I Xikwembu Nkulukumba lweyi angaswikotaka a kun'wiyentxa n'witiya kupfumeleni, kufambelana ni Ivangeli leyi niyitivisiki ni hi ritu dra Kriste, swanga hi leswi hi nyikiwiki kutiva kungu dra matilo dra huluxo. A kungu ledro, dri fihliwiki kehe ku minkama hinkwayu,

²⁶swoswi dri vonekisiwi hi mabuku ya vahlayi va ritu swanga hi leleto dra Xikwembu Nkulukumba lweyi angakone hila kungahelikiki. Kutani dri nyikiwi matiko hinkwawu leswaku wone mayamukela kupfumela.

²⁷A kutwala akuve ku Xikwembu Nkulukumba wa ntamu hinkwawu, ali mun'we ni ntlhari, ha Yesu Kriste. Amen.