Read ronga Rm 7 Bible Online

Rm 7 - ronga bible

Rm 7

¹Xana an'wiswitivi vamakweru, (nikhanela ni lava vativaka nawu) leswaku a nawu ntsena wuni ntamu henhla ka mhunu, loko lweyi aha hanya?

²Xileswi, a wansati lweyi a tekiwiki atlhanganisiwi ni nuna wakwe hi ntamu wa nawu, loko nuna aha hanya; Kambe, loko nuna a fa, a nsati antrhunxekile ku nawu lowo wa vukati.

³Hikola ka leswo, yene ahlayiwa wa vumbuye, loko ava ni ntlhanganu ni mun'wana wanuna, loko aha hanya a nuna wakwe, Loko ke nuna a fa, a nsati atrhunxekile ku nawu, angaswikota kutekiwa hi mun'wana wanuna.

⁴Hiswoswo vamakweru, na n'wine n'wifile nawini hikola ka miri ya Kriste, akuva n'wiva ku mun'wana lweyi angapfuka akufeni, akuva hibekela Xikwembu Nkulukumba a mihandru.

⁵Hikusa loko a haha hanya hi swa nyama, nikunavela ka xidoho, loko ku kumaka ntamu hi nawu, afa switira a mirini yeru akuva hibeka mihandru ya swidoho.

⁶Kambe swoswi hintrhunxekile ku nawu, hifile ku lexi afaka xi hiyentxa swanga swikarawa. Xileswi, haswikota kutirela Xikwembu Nkulukumba hi ndlela leyimpswha, hi kulandra Moya, na kunge hi ndlela ya letela.

⁷ Hikolahu hitahlaya yini xana? Xana a nawu i xidoho? Aswivangatanu, kambe mine ana ningativanga xidoho, loko afa kunge hi nawu, mfuri afa ningativi ku navela loko a nawu afa wungahlayi leswaku: Ungavi navela.

⁸Ke, a xidoho xi kumi nkama lowu a leletweni, xipfuxi ku mine hinkwatu tinxaka takunavela loku kunfani, handle ka nawu, a xidoho xi file.

⁹Kavi ni nkama lowu mine nihanyiki na ningena nawu; Kambe, loko kuti a nawu wu hanyisi xidoho, mine nifa.

¹⁰Kutani a nawu lowu, afaka wufaneli kunihanyisa, nikumile leswaku wuniyisi akufeni.

¹¹Xileswo, a xihono lexi xilondrovotiki nkama lowu afaka wuhuma nawini, wunikanganyisile wuva wunidlaya.

¹²Ha kunene, a nawu wuxwengile, na drone leleto drixwengile, mfuri drilulamile ni kuva drinene.

¹³Xana leswi swinene swindruluki lifu ku mine? Ahi swone. Kambe a xihono, akuva xi komba leswaku i xihono, xiyentxi lifu ku mine i va ntxhumu lowu wunene; akuva hinkonta ya leleto, a xihono xi tindruluta xa ntamu ngopfu kutlula kusunguleni.

¹⁴Hikuva haswitiva leswaku a nawu i wa Moya, kambe mine ni mhunu wa gome, nixavisiwiki awukaraweni bya xihono.

¹⁵Hikuva anitiyingelisisi leswi niswiyentxaka, hikusa aniyentxi leswi niswirandraka, kambe niyentxa leswi niswinyenyaka.

¹⁶Ke, loko niyentxa leswi ningaswidjulikiki, nidringeta nawu, swanga i wunene.

¹⁷Ahi mine niyentxaka leswo, kambe xa kuva xidoho lexi xinga ku mine:

¹⁸Hikusa naswitiva leswaku a vunene abyi trhamanga ku mine, nidjula kuhlaya leswaku antumbulukwini wanga. Nambi nini kunavela ka kuyentxa leswi swinene, aniswikoti leswo.

¹⁹Hikusa aniyentxi vunene lebyi nibyirandraka, kambe niyentxa vubihi lebyi ningabyirandrikiki.

²⁰Ke, loko niyentxa leswi ningaswirandrikiki, hileswaku ahi mine lweyi a yentxaka leswo, kambe hi xidoho lexi xinga ku mine.

²¹Hikusa, loko nidjula kuyentxa leswi swinene, kambe nikuma nawu wa leswi swaku; a xidoho xitrhama ku mine.

²²Hikusa, hi mhunu lweyi angandreni kwanga, ninyoxela kulandra a nawu wa Xikwembu Nkulukumba,

²³kambe nivona leswaku amirini yanga kuni wun'wanyana nawu lowu wulwetanaka ni nawu wa vutlhari byanga. Hi swoleswo swiniyentxaka mubohiwa wa nawu wa xidoho lexi xinga mirini yanga.

²⁴Nitihlaya mhunu wa khombo! Xana i mani lweyi ataka nintrhunxa mirini leyi miniyisaka kufeni?

²⁵ Ninyika lidrumu Xikwembu Nkulukumba hinkonta ya Hosi yeru Yesu Kriste, leswi ninga hi ntshima ni tirelaka Xikwembu Nkulukumba ni vutlhari byanga, nambi loko nili hansi ka nawu wa xidoho, ni ntumbuluku wanga wa vumhunu.