Read ronga I Kor 10 Bible Online

I Kor 10 - ronga bible

I Kor 10

¹Ke vamakweru, anirandri leswaku n'wiva a kukohlekeni ka leswi a vatatana veru hinkwavu vakumekiki a hansi ka tlavi, hinkwavu vaweliki a lwandle;

²hinkwavu vababatisiwi ku Moxe, atlavini ni le lwandle.

³Mfuri hinkwavu vadi swakuda swin'we swa moya, vanwi swakunwa swin'we swa moya,

⁴hikusa afa vanwa aribyeni ledri afaka drivalandra. Kutani a ribye ledro afa ali Kriste.

⁵Kambe ahivanyingi lava Xikwembu Nkulukumba atrhavisiwiki ha vone; hikola ka leswo vasuvi ahuleni.

⁶A mintxhumu leyo miyentxiwi xikombiso ku hine, akuva hinganaveli a swakubiha, swanga hi leswi vone vanaveliki.

⁷Ke n'wingaveneni vagandreli va swikwembu swakuka-ndlela swanga hi leswi van'we ku vone vaswiyentxiki; swanga hi leswi kutraliwiki leswaku: A tiko[5] dritrhami akudeni ni le kunweni, ntrhaku drisekelekeli kutlanga.

⁸Nakone, hingayentxeni vumbuye, swanga hi van'we ku vone vangayentxa vumbuye, kuva kuhumelela leswaku hi siku drin'we, kuwa makume mabiri ya madzana na mararu (23.000).

⁹Hingadringeni Kriste, swanga hi van'we ku vone, vangamudringa, vava vasuva hi kulumeteliwa hi tinyoka.

¹⁰Nakone n'wingan'unun'uteni, swanga hi van'we ku vone vangan'unun'uta, kutani vahelisiwi hi muhelisi.

¹¹A mintxhumu leyi mivahumelelile swanga swikombiso, kutani mitraliwile akuva mihikhwavela; hine hikumiwiki hi vugamu bya minkama.

¹²Hileswo-ke lweyi apimisaka leswaku ayimile ativonele akuva anga wi.

¹³An'wingihumeleliwa hi ndringo lowu wungafanekeliki vhanu; kambe Xikwembu Nkulukumba adumbekaka, angaka angapfumeti leswaku n'widringiwa kutlula a mintamu yenu; kambe, kun'we ni mindringo, atan'winyika a ndlela ya kuhuma ku mindringo, akuva n'wikota a kumibyatrha.

¹⁴Hileswo-ke, varandriwa vanga, trutrumani, n'witxhava a kugandrela a swikwembu swakuka-ndlela.

¹⁵Nivulavula swanga ku vhanu lava vatlharihiki. Swiyanakanyani n'wine leswi niswihlayaka.

¹⁶Ke a ntrheko wa nkateko lowu hiwukhensaka, xana ahi kupatrana ni ngati ya Kriste xana? A kati ledri hikhemaka ahi kupatrana ni miri wa Kriste xana?

¹⁷Hikusa leswi kungani kati drin'we, hine, nambi hi li vanyingi, hi miri wun'we ntsena, hikusa hinkweru hitlhangana akuyaveliweni ka kati ledri anga drin'we.

¹⁸Lavisani Israyele hi tlhelo dra nyama; xana lava vadaka a switlhavelo avatlhangani kun'we ni xiluvelo?

¹⁹Nili yini-ke? Xana leswi switlhaveliwaka a swikwembu swakuka-ndlela i ntxhumu? Kumbe a xikwembu xa kuka-ndlela i ntxhumu, xana?

²⁰Im'hi. Kambe leswi a va-Matiko vaswitlhavelaka axiluvelweni, vaswitlhavela a mademoni, kungali ku Xikwembu Nkulukumba; kutani aniswirandri leswaku n'wiva lava vatlhanganaka ni mademoni.

²¹An'wina kuswikota a kunwa a ntrheko wa Hosi ni wa mademoni; an'wina kuswikota a kuhlengela atafuleni dra Hosi ni le tafuleni dra mademoni.

²²Kumbe hitapfuxela Hosi a vukwele xana? Xana hingavani ntamu kutlula Hosi?

²³Hinkwaswu swipfumelekile, kambe ahi hinkwaswu swipfunaka. Hinkwaswu swipfumelelekile, kambe ahi hinkwaswu swiyakaka.

²⁴A mhunu angadjuleteli leswi swipfunaka yene, kambe im'na adjuletela leswi swipfunaka van'wana.

²⁵Danani hinkwaswu leswi swixavisiwaka amimbangwini ya vuxavisi, na n'wingavutisi ntxhumu hinkonta ya lipfalu,

²⁶hikusa a misava hinkwayu i ya Hosi, ni hinkwaswu leswi swinga ku yone.

²⁷Loko n'wirambiwa kudeni hi lweyi angaliki mupfumeli, na n'wine n'wirandra a kuya, danani hinkwaswu leswi van'wibekelaka amahlweni na n'wingavutisi ntxhumu hinkonta ya lipfalu.

²⁸Kambe loko mhunu an'wibyela aku: Leswi switlhaveliwi a swikwembu swakuka-ndlela, laho-ke n'wingadeneni, hinkonta ya lweyi an'widrimuxiki, ni hinkonta ya lipfalu.

²⁹Kutani anihlayi lipfalu draku, kambe dra mun'wana; hikusa a vuntrhunxeki byanga byingayavanyisiwela yini hi lipfalu dra mun'wana?

³⁰Kambe kungaku loko nida hi kutlangela, ningasoliwela yini ku leswi nitlangelaka ha swone?

³¹Hileswo-ke nambi n'wida, nambi n'winwa, nambi n'wiyentxa yini na yini, yentxani hinkwaswu hi kutwalisa Xikwembu Nkulukumba.

³²N'wingave xikhunguvanyiso nambi ku va-Yuda, nambi ku va-Matiko, nambi ku Kereke dra Xikwembu Nkulukumba,

³³swanga hi leswi na mine nitrhavisaka hinkwavu ku mintxhumu hinkwayu, ningatidjuleliki leswi swipfunaka mine, kambe nidjulaka leswi swipfunaka lava vanyingi, akuva vahuluxiwa.