Read ronga I Kor 14 Bible Online

I Kor 14 - ronga bible

I Kor 14

¹Landrelelani a lirandru, n'widjulisisa ni tinyiko ta Moya, kambe ngopfu-ngopfu akuva n'wiprofeta.

²Hikusa lweyi avulavulaka hi tindrimi angavulavuli na vhanu, kambe avulavula ni Xikwembu Nkulukumba, hikusa akuna mhunu lweyi amuyingelaka, kambe amoyeni avulavula a swihundla.

³Kambe lweyi aprofetaka, avulavula ni vhanu, leswi swiyakaka, leswi switratriyaka ni leswi swikhongotelaka.

⁴Lweyi avulavulaka hi tindrimi atiyaka yene ntsena, kambe lweyi aprofetaka, ayaka a kereke.

⁵Afa nirandra leswaku n'wine hinkwenu n'wivulavula hi tindrimi, kambe ngopfu-ngopfu leswaku n'wiprofeta; hikusa lweyi aprofetaka atlula hi kuhundrisa lweyi avulavulaka hi tindrimi, handle ntsena loko akota ni kutitlhamuxela, akuva a kereke drikuma a kuyakiwa.

⁶Kambe-ke, swoswi, vamakweru, loko ningata ku n'wine na nivulavula hi tindrimi, ningan'wipfuna ha yini, loko ningavulavuli na n'wine hi Apfuletelo, kumbe hi vutivi, kumbe hi vuprofeta, kumbe hitavudondrisi?

⁷Swifana ni switxhaya-txhaya leswi swingaliki na vutomi, kambe swihumexaka mpfumawulu, swanga nanga kumbe xitende; loko a mpfumawulu lowo wungahluteliwanga swinene hi mutxhayi, byingativisiwa kuyini a vunanga lebyi byitxhayiwaka hi nanga kumbe hi xitende?

⁸Nakone loko a xipalapala xihumexa a mpfumawulu lowu wungatwisisekiki, hi mani lweyi atakatibekisela kuya yimpini xana?

⁹Hi swoswo-ke, na n'wine, loko hi lidrimi n'wingavulavuli maritu lawa matwisisekaka, switatwisiwa kuyini leswi n'wiswihlayaka? Swifana ni loko n'wikhanelela a moya!

¹⁰Kuni tindrimi tinyingi[6] amisaveni ta tinxaka-xaka; kambe akuna ledri dringalikina ntlhamuxelo.

¹¹Hileswo-ke, loko mine ningativi a ntlhamuxelo wa ritu, nitava wa matiko ku mhunu lweyi avulavulaka, na yene ava wa matiko ku mine.

¹²Xileswo, na n'wine, leswi n'winga vakhinyeleli va tinyiko ta Moya, djulisisani, akuva n'witiyamukela hi kuyandra, akuyakeni ka kereke.

¹³Hikolahu-ke lweyi avulavulaka a lidrimi drimbeni, akhongote, akuva adritlhamuxela.

¹⁴Hileswo-ke, loko mine nikhongota hi lidrimi drimbeni, a moya wanga ntsena wakhongota, kambe a kuyanakanya kwanga akubindruli ntxhumu.

¹⁵Kutani-ke i swakuyini, xana? Nitakhongota hi moya, kambe na kone nitakhongota hi kuyanakanya; nitayimbelela hi moya, kambe na kone nitayimbelela hi kuyanakanya.

¹⁶Hikuva loko ukhensa hi moya ntsena, a mhunu lweyi anga a vumbangwini bya lweyi angalikina vutivi, atahlayisa kuyini leswaku amen axikhongotweni xakwe xa kutlangela, loko yene angativi leswi uswihlayaka?

¹⁷Hikuva, kunene, akukhensa kwaku i kunene, kambe mumbeni angayakiwi.

¹⁸Nikhensa Xikwembu Nkulukumba, hikusa nivulavula hi tindrimi timbeni kutlula n'wine.

¹⁹Kambe akerekeni, nirandra kuhlaya ntlhanu wa maritu ya kuyanakanya kwanga, akuva nidondrisa van'wana, kutlula a madzana-dzana ya maritu hi tindrimi timbeni.

²⁰Vamakweru, n'wingavaneni switrongotwana amayanakanyeleni, vanani switrongotwana ku leswi swimfani; kambe amayanakanyeleni, vanani lava vawupfiki.

²¹A Nawini kutraliwi leswaku: Nitavulavula ni tiko ledri, hi vhanu va tindrimi timbeni ni va milomu mimbeni; kambe nambi swili tanu, vangatiniyingela, kuhlaya Hosi.

²²Hikolahu-ke, a kuvulavula tindrimi i xikombiso, kungali ku lava vapfumeliki, kambe ku lava vangapfumelikiki; kasi a vuprofeta i xikombiso, kungali ku lava vangaliki vapfumeli, kambe ku lava vanga vapfumeli.

²³Loko-ke a kereke hinkwadru drihlengeletana ambangwini mun'we, na hinkwavu vavulavula hi tindrimi ta kuhambana, kutxhuka kunhingena a vhanu vakukala vutivi kumbe vangapfumelikiki, afa vangatihlaya leswaku n'wine n'wihungukile xana?

²⁴Kambe loko hinkwenu n'wiprofeta, kutani kunhingena a mhunu lweyi angapfumeliki kumbe angalikinavutivi, atakholwisiwa hi hinkwenu, atayavanyisiwa hi hinkwenu;

²⁵leswi swifihlekiki ambilwini yake switativonekisa, laho-ke atatiwisa hi mombo, agandrela Xikwembu Nkulukumba na aku: Kunene, Xikwembu Nkulukumba akone amakari kwenu!

²⁶Vamakweru, ke, i swakuyini xana? Loko n'wihlengeletana, mun'wana-ni-mun'wana ani psalma, kumbe dondro, kumbe Apfuletelo, kumbe lidrimi drimbeni, kumbe ntlhamuxelo; hinkwaswu aswiyentxeliwi kuyaka.

²⁷Loko-ke mun'we avulavula hi lidrimi drimbeni, vangava vabiri kumbe vararu, kungatluli a nhlayu leyo, na kuvulavula mun'we-ha-mun'we, lahuke, akuve ni lweyi atlhamuxelaka;

²⁸kambe loko kungalina mutlhamuxeli, amiyele akerekeni; avulavule vuswake, avulavule na Xikwembu Nkulukumba.

²⁹Kambe vaprofeta vabiri kumbe vararu avavulavule, vambeni avayavanyise.

³⁰Loko, mun'wana atrhamiki apfuleteliwa a xa ntxhumu, lweyi arangiki kuvulavula amiyele.

³¹Hikuva hinkwenu n'wingaprofeta, ha mun'we-ha-mun'we, akuva hinkwavu vadondra vava vamiyeteliwa;

³²na kone a mimoya ya vaprofeta mifumiwa hi vaprofeta.

³³Hikusa Xikwembu Nkulukumba ahi wa mpfilu-mpfilu, kambe i wa kurula. Swanga hi le makerekeni hinkwawu ya vahlawuleki,

³⁴a vavasati amakerekeni avamiyele, hikusa aswipfumeliwi ku vone akuva vavulavula, kambe avatibeke a hansi, swanga hi kuhlaya ka Nawu.

³⁵Kambe loko kuni ntxhumu lowu vadjulaka a kuwudondra, avavutise a vanuna vavu a ma kaya kwavu. Hikusa swini tingana akuva wansati avulavula akerekeni.

³⁶Kumbe xana Ritu dra Xikwembu Nkulukumba drihumi ku n'wine; kumbe dritlhasi ntsena ku n'wine, xana?

³⁷Loko a wa kukari apimisaka leswaku i muprofeta kumbe leswaku i wa moya, ativisise leswi nin'witralelaka swone, leswaku i leleto dra Hosi;

³⁸Kutani loko mhunu angativisisi leswi, na yene angativiwi.

³⁹Xileswo, vamakweru, khinyelani kuprofeta, na kone n'wingasivele a kuvulavula hi tindrimi timbeni.

⁴⁰Kambe hinkwaswu aswiyentxiwe hi mfanelo ni hi nawu.