Read ronga I Kor 2 Bible Online

I Kor 2 - ronga bible

I Kor 2

¹Na mine, vamakweru, loko nitlhasile ku n'wine, anatanga hi maritu ya kutlakuka kumbe ya vutivi akuva nin'witivisa a xihundla xa Xikwembu Nkulukumba.

²Hikusa afa nititrimbeli leswaku ningadjuli kutiva swimbeni amakari kwenu loko kungali Yesu Kriste ntsena, Kriste lweyi avambiwiki axihambanwini.

³Kutani nitlhasi ku n'wine na nini gome, ni kutxhava, ni kururumela kukulu,

⁴na kone a ritu dranga ni kurera kwanga, aswavanga swa maritu ya vutlhari bya kukholwisa, kambe kuvi kukombisa ka ntamu wa Moya,

⁵akuva a kupfumela kwenu kungasukeli vutlharini bya vhanu, kambe antan'wini wa Xikwembu Nkulukumba.

⁶Nambi swilitanu, hivulavula hi vutlhari amakari ka vhanu lava vawupfiki, angaliki vutlhari bya nkama lowu kumbe bya varangeli va nkama lowu lava vasuvaka,

⁷kambe hivulavula hi vutlhari bya Xikwembu Nkulukumba, anga xihundla lexi xifihlekiki, lebyi Xikwembu Nkulukumba abyibekiseliki a kutwala kweru na minkama mingasinava kone;

⁸vutlhari lebyi ni mun'we ku varangeli va minkama leyi abyitiviki; hikusa loko afa vabyitivile, ana vangavambanga axihambanwini a Hosi ya kuphatima.

⁹Kambe swanga hi leswi kutraliwiki leswaku: Leswi a tihlo dringaswivonangakiki, ni ndleve yingaswiyingelangakiki, swinganhingenangakiki ni le mbilwini ya mhunu, leswi Xikwembu Nkulukumba an'wibekiseliki lava vamurandraka;

¹⁰kambe ku hine, Xikwembu Nkulukumba aswipfuletelile hikola ka Moya, hikusa a Moya wadjulisisa hinkwaswu, nambi a vuyentelelo bya Xikwembu Nkulukumba.

¹¹Hikuva hi mani lweyi ativaka a swa mhunu, loko wungali moya wakwe lowu nga ku yene? Hi xiswoswo, a swa Xikwembu Nkulukumba, akuna lweyi aswitivaka loko wungali Moya wa Xikwembu Nkulukumba.

¹²Nakone hine ahiyamukelanga moya wa misava leyi, kambe hiyamukeli a Moya wa Xikwembu Nkulukumba, akuva hitiva a mintxhumu leyi Xikwembu Nkulukumba ahinyikiki;

¹³a mintxhumu leyi hikhanelaka ha yone kungali hi maritu ya kudondrisiwa hi vutlhari bya vumhunu, kambe hi maritu lawa madondrisiwiki hi Moya, na hili kari hitlhamuxela a swa Moya ku lava vanga va Moya.

¹⁴Kambe a mhunu lweyi angaliki wa Moya, angayamukeli leswi swinga swa Moya wa Xikwembu Nkulukumba, hikusa ku yene i vusinge, na kone angaswikoti a kuswiyingelisisa hikusa swiyanakanyiwa hi mayanakanyela ya moya.

¹⁵Kambe lweyi anga wa Moya ayavanyisa hinkwaswu, na kone yene angayavanyisiwi hi mhunu.

¹⁶Hikusa hi mani lweyi ativiki a kuyanakanya ka Hosi, angakotaka ni kuyidondrisa xana? Kambe hine hini kuyanakanya ka Kriste.