Read ronga I Kor 6 Bible Online

I Kor 6 - ronga bible

I Kor 6

¹Xana atiyisa kuyini mun'we ku n'wine, loko ali ni mhaka ni mun'wana, akuva ayadjula a kuyavanyisiwa hi vasomboloki[2], matrhan'wini ya kuyavanyisiwa hi vamakwavu akupfumeleni?

²Kumbe xana an'wiswitivi leswaku a vapfumeli vatayavanyisa misava? Ke loko a misava mitayavanyisiwa ha n'wine, an'wifanelanga ha yini a kuyavanyisa atimhaka leti titrongo?

³Xana an'wiswitivi leswaku hine hitayavanyisa a tintrumi? Xileswo, ngopfu-ngopfu a swa vutomi lebyi.

⁴Ke, loko n'wini mhaka ya vutomi lebyi, yifanelaka a kuyavanyisiwa, xana n'wibeka lava vadreliwaka akuva vava vatremi?

⁵Nihlaya leswi ku n'wine akuva nin'wikhomisa tingana! Xana akuna mhunu wa ntivi amakari kwenu angakotaka a kuyavanyisa a timhaka ta vamakwavu, xana?

⁶Kambe mun'we, loko ani mhaka ni makwavu, xana vaya akuyavanyisiweni amahlweni ka lava vangaliki vapfumeli?

⁷Hikuva nambi akuva van'we vani timhaka ni van'wana, leswo swikombisa a kuhluliwa kwenu! Ha yini-ke n'wingatilangeli a kuyentxeliwa a vubihi? Hayini n'wingapfumeli xikan'we a kanganyisiwa?

⁸Kambe n'wine, hi n'wine ha vuswenu n'wiyentxaka a vubihi, n'wikanganyisaka; na hinkwaswu leswo n'wiswiyentxela a vamakwenu.

⁹Kumbe xana an'wiswitivi leswaku a vayentxi va vubihi vangatida a pfindla dra Mfumu wa Xikwembu Nkulukumba? N'wingatikanganyiseni! Nambi vawoswani, nambi vagandreli va swikwembu swakuka-ndlela, nambi va vumbuye, nambi lava vatiyentxaka ingi i vavasati, nambi lava vatekanaka hi xinuna xavu kumbe hi xisati xavu,

¹⁰nambi vayivi, nambi vanaveli va vukosi bya misava, nambi timpopswi, nambi valumbeti, nambi vawutli, hinkwavu lavo vangatida a pfindla dra Mfumu wa Xikwembu Nkulukumba.

¹¹Hi leswi afaka n'wili swone, van'we ku n'wine; kambe n'wihlampswiwile, mfuri n'wixwengisiwile, n'wiva n'wiyentxiwa lava valulamiki hi vito dra Hosi yeru Yesu Kriste, ni hi Moya wa Xikwembu Nkulukumba weru.

¹²Ku mine, hinkwaswu swapfumeleka, kambe ahi hinkwaswu swipfunaka. Ku mine, hinkwaswu swapfumeleka, kambe mine ningaka ningafumiwi ha ntxhumu, ni mun'we.

¹³A swakuda i swa xidelo, ni xidelo i xa swakuda; kambe Xikwembu Nkulukumba ataswihelisa, a swakuda ni xidelo. Kambe a miri ahi ya vumbuye kumbe vuwoswi, kambe i ya Hosi, na yone Hosi i ya miri.

¹⁴Nakone, Xikwembu Nkulukumba apfuxiki kufeni a Hosi, na hine atahipfuxa hi ntamu wakwe.

¹⁵An'wiswitivi leswaku a miri yenu i swiro swa Kriste, xana? Xana ningateka a swiro swa Kriste niswiyentxa swiro swa lweyi wa vumbuye, xana? Swingatxhuki swiva tanu!

¹⁶ Kumbe xana an'wiswitivi leswaku lweyi atitlhanganisaka ni wa vumbuye atindruluta miri min'we ntsena na yene? Hikusa kuhlayiwa leswaku lava vabiri vatava nyama yin'we.

¹⁷Kasi lweyi atipatraka ni Hosi, atava moya mun'we ni Hosi.

¹⁸Trutrumani, n'witxhava a vumbuye ni vuwoswi. A xidoho xin'wana-ni-xin'wana lexi a mhunu axiyentxaka xile handle ka miri; kambe lweyi ayentxaka a vumbuye kumbe vuwoswi, adohela a miri wakwe.

¹⁹Kumbe xana an'wiswitivi leswaku a miri wenu i tempele dra Moya wa Kuxwenga, lowu wunga ku n'wine, lowu wupfaka hi le ku Xikwembu Nkulukumba, ni leswaku n'wine an'witilumbi, xana?

²⁰Ke leswi n'wixaviwiki hi ntrengo wa kukari, hikolahu-ke, twalisani Xikwembu Nkulukumba hi miri wenu.