Read ronga I Kor 8 Bible Online

I Kor 8 - ronga bible

I Kor 8

¹Mayelano ni mintxhumu leyi miphahleliwiki a swikwembu swakuka-ndlela, haswitiva leswaku hinkweru hini vutivi. A vutivi byiyentxa leswaku a mhunu atikukumuxa, kambe a lirandru drayaka.

²Loko mun'we apimisa leswaku ativa a ntxhumu wa kukari, aative ha kan'we leswaku angasinawutiva hi laha swidjulekaka ha kone.

³Kambe loko a mhunu arandra Xikwembu Nkulukumba, ativiwa ha Yene (Xikwembu Nkulukumba).

⁴Hileswo-ke, mayelanu ni kuda leswi swiphahleliwiki a swikwembu swakuka-ndlela, haswitiva leswaku a xikwembu xa kuka-ndlela ahi ntxhumu amisaveni hinkwayu, ni leswaku akuna Xikwembu Nkulukumba mun'wana handle ka lweyi wa mun'we ntsena.

⁵Hikuva, nakone, nambi loko kungava ni leswi switxhuliwaka swikwembu amatilweni kumbe amisaveni, swanga hi leswi kungani swikwembu swinyingi ni tihosi tinyingi.

⁶Kambe ku hine kuni Xikwembu Nkulukumba mun'we ntsena, Tatana, lweyi hinkwaswu swinga swake, na hine mfuri hinga ku Yene; ni Hosi yin'we ntsena, Yesu Kriste, lweyi a mintxhumu hinkwayu minga kone ha Yene, na hine mfuri hinga kone hikola kwake.

⁷Kambe a kutiva leswo akukumeki ku hinkwavu; hikusa van'we, hi kutolovela a swikwembu swakuka-ndlela kutlhasa ni swoswi, vada leswi swiphahleliwiki a swikwembu swakuka-ndlela, kutani lipfalu dravu, dringa dra gome, drinyamisiwa.

⁸Kambe a swakuda aswihiyisi kusuhi ni Xikwembu Nkulukumba; hikusa nambi hingadi ntxhumu, nambi hida, ahiyengeteliwi ntxhumu.

⁹Kambe tivonelani, akuva a kutrhunxeka kwenu kungatxhuki kundruluka xikhunguvanyiso ku lava va gome!

¹⁰Hikuva loko mun'we akuvona, wene ugani kutiva, na utrhami akudeni, atempeleni dra swikwembu swakuka-ndlela, a lipfalu drakwe, lweyi wa gome, dringaka dringatiyisiwi akuva ada leswi swiphahleliwiki a swikwembu swakuka-ndlela, xana?

¹¹Xileswo, a makwenu lweyi wa gome, lweyi na yene Kriste amufeliki, atalahleka hikola ka kutiva kwaku.

¹²Ni loko n'widohelisa xileswo a vamakwenu, n'wivavisisa a timpfalu tavu ta gome, n'widohela Kriste.

¹³Hileswo-ke, loko a swakuda swikhunguvanyisa a makweru, ningaka ningahadi nyama ni siku ni drin'we, akuva ningatitxhuka nikhunguvanyisa a makweru.