Read ronga I Kor 9 Bible Online

I Kor 9 - ronga bible

I Kor 9

¹[4] Xana ani mhunu wa kutrhunxeka? Xana ani mupostola? Xana anivonananga ni Hosi yeru, Yesu Kriste? Xana an'wi mihandru ya ntiro wanga a Hosini?

²Loko mine ningali mupostola ku van'wana, kambe ku n'wine ni yene; hikusa n'wine n'wi xikombiso xa vupostola byanga a Hosini.

³A yangulu dranga ku lava vaniyavanyisaka hi ledri:

⁴Xana ahina mfanelo ya kuda ni kunwa?

⁵Xana ahina mfanelo ya kufamba-famba ni wansati lweyi anga makweru akupfumeleni, swanga hi vapostola van'wana, ni vamakwavu va Hosi, na Khefasi, xana?

⁶Kumbe xana ntsena mine na Barnabasi ahina mfanelo ya kutrika a kutitirela?

⁷Hi mani lweyi asamaka aya a yimpini ni muholo wakwe, xana? Hi mani lweyi abyalaka a nsimu ya livhinya ntrhaku angadi a mihandru ya yone xana? Kumbe hi mani lweyi abyisaka a ntlhambi ava angadi a ntrwamba wa ntlhambi wolowo, xana?

⁸Xana leswi niswihlaya hi ximhunu kumbe na wone nawu awuswihlayi, xana?

⁹Hikuva anawini wa Moxe kutraliwi leswaku: Ungasivi a nomu wa homu loko yi hula a mavele. Xana hileswaku Xikwembu Nkulukumba alondrisa a tihomu?

¹⁰Kumbe xana angahlayi leswo hikola kweru? Hikuva, kunene, kutraliwi hikola kweru leswaku lweyi adrimaka, afanekela a kudrima na ani kulavisela, ni lweyi ahulaka mavele, alavisele a kuyamukela a yavelo drakwe.

¹¹Loko hine hibyali ku n'wine a swa moya, xana angava ntxhumu wukulu akuva hitrhovela ku n'wine a swa misava leyi?

¹²Loko-ke van'wana vayaveliwi a mfanelo leyo a henhla kwenu, xana hine hingaka hingavini mfanelo leyo hi kuhundrisa? Nambi leswo, hine ahitirisanga a mfanelo leyo, kambe hitiyiseli ku hinkwaswu akuva hingabeki swisivelo ku Ivangeli ya Kriste.

¹³Xana an'wiswitivi leswaku lava vatiraka a mintxhumu ya kuxwenga vada a swa Tempele, ni lava vatirelaka altarini vayaveliwa a swa altari?

¹⁴Xiswoswo, a Hosi yileleta lava vareraka a Ivangeli leswaku vahanya hi Ivangeli.

¹⁵Kambe mine anisamanga nitipfuna hi mintxhumu leyo, na kone leswi aniswitralelanga leswaku swiva xitanu ku mine; hikuva ku mine swayampswa a kufa, kutlula akuva a mhunu anisusela a kutitwalisa kwanga loku.

¹⁶Hikuva loko nirera a Ivangeli, ku mine akuna leswi ningatitwalisaka ha swone; hikusa i mfanelo nirwexiwiki; hi leswo-ke yowee ku mine loko ningareri a Ivangeli!

¹⁷Hikuva loko niyentxa leswo hi kurandra kwanga, nini hakelo; kambe loko kungali kurandra kwanga, swidjula a kuhlaya leswaku i ntiro lowu ninyikiwiki wone;

¹⁸kolahu-ke a hakelo dranga hi drini, xana? Hileswaku nirera a Ivangeli na ningahakeliwi, akuva ningatidjuleli wupfunu ku mfanelo leyi ningana yone hi kurera a Ivangeli.

¹⁹Hikuva nambi nitrunxekile ku hinkwavu, nitiyentxi a nandra wa hinkwavu, akuva nitakuma lava vanyingi.

²⁰Ku va-Yuda nitiyentxi swanga ni mu-Yuda, akuva nitakuma a va-Yuda; ku lava vanga hansi ka Nawu, nitiyentxi swanga ni lweyi anga hansi ka nawu, nambi leswi ningaliki hansi ka Nawu, akuva nitakuma lava vanga hansi ka nawu.

²¹Ku lava vangalikina nawu, nivi swanga hi lweyi angalikina nawu, nambi leswi mine ningaliki wa kukala nawu wa Xikwembu Nkulukumba, hikuva nini nawu wa Kriste, akuva nikuma lava vangalikina nawu;

²²Ku lava va gome, nitiyentxi wa gome, akuva nikuma lava va gome; nitiyentxi hinkwaswu ku hinkwavu, akuva hi tindlela hinkwatu, nikota a kuhuluxa van'we.

²³Nakone niyentxa hinkwaswu leswi hinkonta ya Ivangeli, akuva nindruluka mun'we wa vatireli va Ivangeli.

²⁴Xana an'wiswitivi leswaku lava vatrutrumaka alivaleni dra mpalisano, vatrutruma hinkwavu, kambe i mun'we ntsena atekaka a hakelo dra mpalisano? Hikolahu-ke, trutrumisani xi swoswo na n'wine, akuva n'witakuma a hakelo ledro.

²⁵Hinkwavu lava vapalisanaka, vatikhoma ku mintxhumu hinkwayu; vone vaswiyentxela ntsena akuva vayamukela a ngiyana leyi yibolaka, kasi hine hiyentxela a kukuma a ngiyana leyi yingabolikiki.

²⁶Hileswo-ke, mine natrutruma, kungali kutrutruma swanga hi loko ningana nkongometo; na lwa, kungali swanga hi loko niba moya ntsena;

²⁷kambe mine nixanisa a miri yanga, ni miyentxa a xikarawa, akuva, nitxhumayela ku van'wana, ningatitxhuka nikumiwa na nili lweyi ningalikina mfanelo ya ntxhumu.