Read ronga II Kor 1 Bible Online

II Kor 1 - ronga bible

II Kor 1

¹ Mine, Pawulosi, a mupostola wa Yesu Kriste lweyi a hlawuliwiki hi Xikwembu Nkulukumba, ni makweru Timotewu, hi trala a papela ledri ku Kereke dra Xikwembu Nkulukumba, ledri dringa le Korinto, kun'we ni tinsasi hinkwatu leti tinga tikweni hinkwadru dra Akaya,[1]

²a timpswalu ni kurula aswive ku n'wine hinkwenu swipfa ku Xikwembu Nkulukumba Tatana weru, ni ku Hosi Yesu Kriste.

³A kutlangeliwe Xikwembu Nkulukumba, Tatana wa Hosi yeru Yesu Kriste, Tatana lweyi a taliki hi lilondro, ni Xikwembu Nkulukumba waku txhavelela hinkwaku!

⁴Hi Yene lweyi amiyetaka amahlomulweni hinkwawu, akuva hitamiyeta lava vanga kuxanisekeni ka kunhati, hi kumiyeta loko na hine mfuri himiyetiwaka ha kone hi Xikwembu Nkulukumba!

⁵Hikusa, swanga hi leswi akuxaniseka ka Kriste ku hitaleliki, na kone ku miyetiwa kweru ku hitalelile hikola ka Kriste.

⁶Kambe, loko hi xanisiwa, n'wikuma kumiyetiwa ni kuhuluxiwa, ni loko hi miyetiwa, na kone kambe n'wikuma kumiyetiwa, leswo swin'wiyentxaka akuva n'witiyisela akuxanisekeni kwenu loku na hine hixanisekaka ha kone.

⁷Akulavisela kweru hinkonta yenu kutiyile, hikutiva leswaku, swanga heswi n'wikumaka a yavelo akuxanisekeni, n'witava ni yavelo akumiyetiweni.

⁸Hikusa vamakweru, ahiswirandri leswaku n'wi kohla hi khombo ledri dringahumelela a Aziya, kutani switlulile mintamu, lakakuva hinga ha dumbi leswaku aku hanya ha hata hanya,

⁹ kambe, kutani ku hine mfuri, afa hi tiyanakanyela a yavanyiso dra lifu, akuva hinga tidumbi, kambe ina, ku Xikwembu Nkulukumba lweyi apfuxaka vafi,

¹⁰anga Yene lweyi ahihuluxiki ku lifu ledri drikulu; ku lweyi hilavisela leswaku ahataya mahlweni ahihuluxa mfuri.

¹¹Na n'wihipfunisa hi swikhongoto swenu, leswaku lava vanyingi, vankhensi Xikwembu Nkulukumba hikola ka nyiko leyi hinyikiwiki yone hinkonta ya swikhongoto swa lava vanyingi.

¹²Hikusa a lidrumo dreru drakuva vumboni bya lipfalu dreru, leswaku hi fambisiwi misaveni, hi vunene ni xihlayelamfuri xa Xikwembu Nkulukumba, akavanga hi vutivi bya vumhunu, kambe a timpswalwini ta Xikwembu Nkulukumba, mfuri ngopfu ku n'wine.

¹³Hikusa akuna timhaka tin'wana hi n'witralelaka tone, handle ka leti n'witihlayaka ni leti n'wititivaka, mfuri nilavisela leswaku n'wititiva hinkwatu kuyatlhasa vugan'wini,

¹⁴swanga hi leswi swoswi n'wihitivaka hi tlhelo, leswaku hine hikutikulisa kwenu, swanga hi leswi na n'wine n'winga kutikulisa kweru hi siku dra Yesu, Hosi Yeru.

¹⁵Hi kudumba loku, afa ni naveli leswaku ni n'wiyendrela halanu, akuva n'witava ni timpswalu tavubiri.

¹⁶ Afa nitahundra hi halanu loko niya le Makedoniya. Ntrhaku afa nita tlhela hi lahu nangweso ni buyela ku n'wine, akuva n'winipfuna ku liyendro dra kuya Yudeya.

¹⁷Kambe swingava leswaku nindruluti miyanakanyu nakungena mhaka? Kumbe a makungu lawa niyentxaka, nimayentxa hi ndlela ya vumhunu, kuhlaya leswaku ina nikuyanakanya leswaku im-him?

¹⁸Kambe Xikwembu Nkulukumba lweyi adumbekaka, awaswitiva leswaku a maritu yanga ku n'wine amavanga: Ina, matlhela mava: Im-him.

¹⁹ Hikusa Yesu Kriste N'wana wa Xikwembu Nkulukumba, lweyi n'wingadondrisiwa ha mine na Silivano na Timotewu, angavanga ina ni im-him ha nkama mun'we. Kriste avi ina ha kunene-nene.

²⁰Hikusa i swidumbiso hinkwaswu swinga ku Xikwembu Nkulukumba a hlaya: ina, hikusa, ha Yene kutani na hine hi hlaya Amen akuva kutwalisiwa Xikwembu Nkulukumba ha hine.

²¹Kambe lweyi ahitiyisaka hi kuhitlhanganisa kun'we na Kriste, lweyi ahitotiki i Xikwembu Nkulukumba,

²²mfuri ahifungiki, ahinyikiki xirangana xa Moya atimbilwini teru.

²³Kambe ni vitani Xikwembu Nkulukumba, yiva mboni a hikeni dranga, ni tremiki mhaka ya kuva ni nga ha yi Korinto.

²⁴Anirandri kuva n'winyi wa vupfumeli byenu, Kambe hi tirisana na n'wine akuva n'wikuma kutrhava, hikusa hi kupfumela n'witiyile.