Read ronga II Kor 2 Bible Online

II Kor 2 - ronga bible

II Kor 2

¹Kambe ni tiyanakanyile; leswaku ningahabuyeli ku n'wine hikuvaviseka.

²Hikusa loko ni n'wivavisa, i mani lweyi ataka ni trhavisa xana, loko ange lweyi a vavisiwiki ha mine?

³Leswo ni n'witraleli akuva loko nitlhasile halanu, ni ngavi ni kuvaviseka hikola ka lava afaka vafaneli kuni trhavisa; kambe hi kun'widumba n'wine hinkwenu, ni kutiva leswaku a kutrhava kwanga i kwenu na n'wine.

⁴Hikusa ndreni ka mahlomulo ni niku kamiwa ka mbilu, ni n'witraleli na nili ni minyembeti leyi ya kutala, afa kungeku n'wivavisa, kambe akuva n'witativa a lirandru ledri nin'wirandraka ngopfu ha drone.

⁵Nakone, loko mhunu wa kukari akhunguvanyisa, angakhunguvanyisanga mine ntsena, kambe akuva ningatibindriseli mine, nihlaya leswaku akhunguvanyisi n'wine hinkwenu.

⁶Kambe xa dringana ku mhunu yelweyo, a xikhatiso lexi xiyentxiwaka hi lava vanyingi.

⁷Swayapswa swoswi n'wimudrivalela, n'wimumiyeta, akuva n'wingati musindrisa kurwala kuvaviseka lokukulu ngopfu.

⁸Hikolahu-ke, ni n'wikombela leswaku n'wimutiyisa hi lirandru drenu.

⁹Avi hikolahu ni n'witraleliki akuva ni n'wikamba ni kuvona leswaku n'winikuyingiseta.

¹⁰Leswi n'wine n'widrivaleliki, na mine na mudrivalela; hikusa loko mine ni drivalelile, afa kuvi ni ntxhumu wa kukari wa kudrivalela hi vito dra Kriste, hinkonta yenu.

¹¹Akuva Sathana anga ti londrovota ha hine, hikusa ha mativa swinene a makungu yake.

¹²Loko ni tlhasi Trowasi, a kutivisa Ivangeli ya Kriste, ni pfuleliwa nyangwa hi Hosi.

¹³ Kambe anikumanga kuwisa a moyeni wanga, hikusa animukumanga makweru Tito; Xi leswo, ni valelelile, ni suka niya le Makedoniya.

¹⁴A kutlangeliwe Xikwembu Nkulukumba lweyi a hi fambisaka ku hluleni ha Kriste hi minkama hinkwayu, amakari kweru, kutwala ku nun'hwela ka kutiva kwake a mimbangwini hinkwayu.

¹⁵Hikusa hine hi mafura ya kunun'hwela ya Kriste ku Xikwembu Nkulukumba, kungava lava vahuluxiwaka kumbe lava vakulahleka.

¹⁶Ku vambeni a kunun'hwela loku, ka lifu; kambe, ku vambeni i kunun'hwela ka vutomi: Kuva vutomi. Hi mani lweyi alulameliwiki ku hinkwaswu leswi?

¹⁷Hikusa ahifani ni lava vakutala, lava vayentxaka bindru hi Ritu dra Xikwembu Nkulukumba; hi kusungula, hi vulavula ku Kriste swanga lava vapfaka ku Xikwembu Nkulukumba, ni hi kutitrongohata mahlweni ka Xikwembu Nkulukumba.