Read ronga II Kor 5 Bible Online

II Kor 5 - ronga bible

II Kor 5

¹Ha switiva leswaku loko a yindlu yeru ya laha misaveni, leyi yinga ntronganyana yihahluliwa, hini Yindlu ya Xikwembu Nkulukumba, leyi yinga yakiwangakiki hi mavoko, leyi ya kukala yingenakuhela a Matilweni.

²Hikola ka leswo, andlwini leyi ha konya, na hinavela ngopfu kuyambexiwa hi Yindlu yeru ya le tilweni.

³Loko afa hitakumiwa na hiyambalile, hinga kumiwi na hi hlivilile.

⁴Kunene, hine lava hahaliki ntrongeni lowu, hakonya, hikamiwa, swinge leswaku hinavela kuhliviliwa wone, kambe hi navela kuyambexiwa, akuva lowu wa kufa wu mitiwa mfuri hi vutomi.

⁵Xikwembu Nkulukumba hi Yene lweyi ahibekiseliki ku leswi, lweyi na kone ahinyikiki xidumbiso xa Moya.

⁶Hiswoswo hini kutiya ntamu minkama hinkwayu, na hitiva leswaku na haha hanya amirini, hi le kule ni Hosi;

⁷Xileswo hi hanya hi kupfumela, na hinge hileswi hi swivonaka.

⁸Kambe, hini kudumba Loku kukulu, hi navela ngopfu kurura amirini, hiya hanya ni Hosi.

⁹Hiswoswo-ke, na hine hitikarataka, leswaku nambi hili kuyindlu leyi, kumbe hirura ku yone, akuva hitrhavisa Hosi.

¹⁰ Hikusa swifanelile leswaku hinkweru hita ya tikombisa mahlweni ka huvu ya kuyavanyisa ya Kriste, leswaku mun'wana-ni-mun'wana ayamukela mayelana ni leswi nene kumbe leswakubiha aswiyentxiki, akuhanyeni kwake lani misaveni.

¹¹Ke, leswi hitivaka kutxhaveka ka Hosi, Xileswo, hitratriya vhanu, leswaku Xikwembu Nkulukumba wa hitiva hikuhetiseka; na kone ni rindrela leswaku lipfalu drenu drihipfumela.

¹²Ahitlheleli hitiyimela ku n'wine, aswitanu, hin'winyika nkama wakutitwalisa ha hine, akuva n'witakuma xa kuyangula ku lava vatitwalisa hi liso, na kunge ha mbilu.

¹³Hikuva loko hi hungukile, hi va Xikwembu Nkulukumba, ni loko hili ni kuyanakanya loku kunene, kuvi hinkonta yenu.

¹⁴A lirandru dra Kriste dra hisindrisa, hiyanakanya leswi swaku: Mun'we a feli hinkwavu; kolahu, hinkwavu va file.

¹⁵Kutani yene a feli hinkwavu, leswaku lava hanyaka, vangaha tihanyeli ha swavu, kambe vahanyela lweyi ava feliki atlhela apfuka kufeni.

¹⁶Xileswo, hine, kusukela swoswi kuya mahlweni, ahahadjuli kutiva mhunu hi mayentxela ya nyama; ke, loko kusungula hitivile Kriste hi mayentxela ya nyama, kusukela swoswi ahahamutivisi xiswone.

¹⁷Hiswoswo-ke, loko mhunu ali ku Kriste, i xivumbeko ximpswha. A mintxhumu ya khale mi hundrile, hinkwaswu i swimpswha.

¹⁸Leswi i ntiro wa Xikwembu Nkulukumba lweyi a titlhanganisiki na hine hikola ka Kriste, kutani ahi vitani kutirisana ntirweni wa kubuyelelana.

¹⁹Xileswo, Xikwembu Nkulukumba afa ali ku Kriste, atibuyelelisi ni vhanu, na angalondrisi swihono swavu, kutani ahirwexi kutivisa ntiro wa kubuyelelana.

²⁰Hileswo-ke, hivakombisi lava vakhanelaka hikola ka Kriste, swanga hiloko Xikwembu Nkulukumba a tratriya ha hine. Hin'wikombela hinkonta ya Kriste, leswaku n'witibuyelelisa ni Xikwembu Nkulukumba.

²¹Lweyi afa angativi xidoho, kambe Yene amuyentxi xidoho ha hine; akuva ha Yene hiva vakululama ka Xikwembu Nkulukumba.