Read ronga II Kor 7 Bible Online

II Kor 7 - ronga bible

II Kor 7

¹Leswi hinga ni swidumbiso leswo varandriwa, Ahi tibasiseni swidoho sweru ku hinkwaswu, swingava swa nyama, kumbe swa moya, hi hetiseka avululameni byeru, ni kutxhava Xikwembu Nkulukumba.

²Hiyamukelani atimbilwini tenu. Ahidohelanga mhunu, ahi honanga mhunu, ahi kanganyisanga mhunu.

³Anihlayi akuva ni n'wisola; hikuva ni hlayiki kusunguleni, leswaku n'wine n'wile timbilwini teru, akuva hi fa na n'wine, hi hanya na n'wine.

⁴Nini kudumba loku kukulu ngopfu ha n'wine, ni kutitwalisa hikola kwenu, ni tali hi kunyoxa, ni hundrisi ku yandreliwa hi kutrhava a nhlomulweni weru hinkwawu.

⁵ Hikusa, loko hi tlhasi Makedoniya, ahikumanga kuwisa ni kutrongo, kambe ku hinkwaswu, afa hoxanisiwa: A handle afa kuli ni kulwa, ni vutoya andreni.

⁶Kambe Xikwembu Nkulukumba lweyi atxhavelelaka lava vakaratekaka, ahi txhavelelile hi kutlhasa ka Tito.

⁷Kunge hi kutlhasa kwake ntsena, kambe nihi kumiyetiwa loku a miyetiwiki ha kone ha n'wine, na hitivisa ni kunavela kwenu, ni kudrila kwenu, ni kukhinyela kwenu ha mine, lakakuva kuyengeteleka ni kutrhava kwanga.

⁸Hikuva nambi leswi ninga n'wivavisa hi papela dranga, anahatisoli ha swone, nambi kumbe loko ni tisolile, ni vona leswaku a papela ledro drin'wivavisile hi nkamanyana.

⁹Kambe swoswi ni trhavile, na kunge heswi n'wivavisiwiki hi papela dranga, kambe hileswaku n'wivavisiwile akuva n'witatisola; kambe n'wivavisiwile hi kurandra ka Xikwembu Nkulukumba, n'wingatikuma kulahlekeliwa ka ntxhumu ha mine.

¹⁰Hikusa akuvaviseka loku kurandriwaka hi Xikwembu Nkulukumba kuvanga akutisola loku kuyisaka akuhulukeni; loku mhunu angaka angatisoli ha kone, kambe akuvaviseka ka xi misava ku vanga lifu.

¹¹Hikusa lavisani, akuvaviseka kwenu loku, kurandriwaka hi Xikwembu Nkulukumba, kuvanga ku khinyela loku kulu; ni hi kuyangulela, ni hi kuhlundruka, ni hi kutrhava, ni hi kunavela, ni hi kuhiseka, ni hi kudriha! N'wivonekisi hinkwavu leswaku an'wina nandru amhakeni leyo.

¹²Hileswo-ke, leswi ninga n'witralela anin'witralelanga hinkonta ya lweyi adohiki, kumbe ni hinkonta ya lweyi adoheliwiki, kambe nin'witralelile akuva akukhinyela kwenu hikola kweru kuva livaleni ku n'wine amahlweni ka Xikwembu Nkulukumba.

¹³Kuvi hikolahu hi miyetiwiki. Kambe akumiyetiweni kweru ha trhavisiwile ngopfu hi trhava ka Tito, hi leswi a moya wakwe wunga kuma kuwisa ha n'wine hinkwenu.

¹⁴Hikuva nambi loko nitwalisile ha n'wine, anina tingana, kambe swanga hi leswi hingan'wibyela hinkwaswu hixihlayelamfuri, na kone akutitwalisa kweru ku Tito ku n'wine kavi loku ka xihlayelamfuri.

¹⁵Alirandru drakwe ku n'wine driyandrile, loko a drimuka kuyingiseta kwenu hinkwenu, ni leswi n'wingamuyamukela hi xitxhavu ni kutitrongohata.

¹⁶Na trhava, hileswi ningakota kun'widumba ka kuhinkwaswu.