Read ronga Ef 1 Bible Online

Ef 1 - ronga bible

Ef 1

¹ Pawulosi, mupostola wa Yesu Kriste hikurandra ka Xikwembu Nkulukumba, ku tinsasi hinkwatu ta le Efesa, vadumbeki ku Kriste Yesu.

²A timpswalu ni kurula leswipfaka ku Xikwembu Nkulukumba, Tatana weru, ni le ku Yesu Kriste Hosi yeru, aswive ku n'wine hinkwenu.

³A kutlangeliwe Xikwembu Nkulukumba, Tatana wa Hosi yeru Yesu Kriste, angahikatekisa hi matovoko hinkwawu ya moya amimbangwini ya le Matilweni, ha Kriste.

⁴Swanga hileswi ahi langiki na misava mingasinava kone, akuva hiva vaxwengi, hili lava vangeke na xidoho mahlweni kwake, ni le lirandrwini drakwe.

⁵Yene ahihlawuleli kuva vakwe, ni nikuhiyentxa vana vakwe ha Kriste, mayelana ni kurandra kwake.

⁶Hakuva kudrumisiwa kuphatima ka timpswalu leti ahinyikiki tone, hi mahala ku Murandriwa wakwe.

⁷Ku Yene hikuyamukela kuntrhunxeka hinkonta ya ngati yake, a lidrivalelo dra swidoho, hikola ka lifuyu dra timpswalu.

⁸Ledri Xikwembu Nkulukumba angatxhulula hi kutala henhla kweru, hivutivi hinkwabyu ni vutlhari,

⁹ahipfuletela xihundla xa kurandra kwake, hikola ka vumbilu byake afaka ayanakanyile kuma yentxa ha Kriste.

¹⁰Akuva atatlhanganisa mintxhumu hinkwayu ku Yene, kungava ya le Matilweni kungava ni yala misaveni, hiku hetiseka ka minkama.

¹¹Ni le ku Yene lweyi hingayentxa pfindla, hikuva hi bekisiwile hi makungu ya lweyi ayentxaka mintxhumu hinkwayu hinkonta ya kulandra kurandra kwake.

¹²Hikuva hitava lidrumu dra kuphatima kwake, hine lava hilaviselaka ku Kriste.

¹³Ku lweyi nakone, antrhaku kakuva n'wiyingeli Ritu dra Xihlayelamfuri, a Ivangeli ya huluko drenu, loko na kone n'wipfumelile, n'wifungiwile hi Moya wa Kuxwenga, lowu angawudumbisa.

¹⁴Lowu wunga xirangana xa pfindla, ledri inga xidumbiso xakutirula lava vanga vakwe, ku lidrumu drakuphatima kwake.

¹⁵Hikolahu-ke, na mine niyingelile kupfumela kwenu ku Hosi Yesu loku kunga ku n'wine, ni lirandru drenu, ku tinsasi hinkwatu.

¹⁶Hikolahu-ke, anikarali kutlangela Xikwembu Nkulukumba ha n'wine, nanin'wikumbuka aswikhongotweni swanga.

¹⁷Akuva Xikwembu Nkulukumba wa Hosi yeru Yesu Kriste, Tatana wa kuphatima, an'winyiki akutiveni kwake, a moya wa vutivi ni wa kun'wipfuletela.

¹⁸Akuvaningiwa ka miyanakanyu yenu, akuva n'witakota kutiva akulavisela akuvitaniweni kwenu, ni lifuyo dra kuphatima ka kulavisela ka tinsasi,

¹⁹ni kutlakuka ka vukulu bya ntamu wakwe, ku hine hingani kupfumela, mayelana ni kukombisa kutiya ka ntamu wakwe,

²⁰lowu Yene awukombisiki ku Kriste, hikumupfuxa ku vakufa, amubeka a xineneni a matilweni,

²¹a henhla ka mifumu hinkwayu, ni mintamu, ni vukulu, ni vundruna, a henhla ka mavito hinkwawu, lawa mativitanaka, na kunge ka madzana lawa ntsena ya malembe (1sc) kambe ni ku lawa mataka.

²²A beki mintxhumu hinkwayu a hansi ka minkondro yake, akuva nhloko ya mintxhumu hinkwayu ni Kereke.

²³Drone inga miri yake, ni kuhetisekisa ka lweyi ahetiseka ka hinkwaswu ka hinkwavu.