Read ronga Ef 2 Bible Online

Ef 2 - ronga bible

Ef 2

¹An'winyiki vutomi hileswi khale afaka n'wifile, hikola ka milandru yenu ni swidoho swenu.

²Leswi afaka n'wifamba ku swone khale, hi mafambela ya misava, hi mafambela ya mintamu ya minfumu ya le henhla mpfhukeni, wunga moya lowu wutiraka swoswi ku vana lava vakuka vangayingiseti.

³Ku vone na hine hinkweru mfuri afa khale hi famba hi kunavela ka nyama yeru, hiyentxa kunavela ka nyama yeru ni miyanakanyu yeru. Hi ntumbuluku afa hili vana vamahlundru, swanga hi van'wana.

⁴Kambe leswi Xikwembu Nkulukumba anga xipfundri hi lirere, akombisi hi lirandru ledri ahirandriki ha drone.

⁵Na hine afa hi file a swihonweni sweru, a hinyiki vutomi kun'we na Kriste, hi timpswalu n'wine n'wihuluxiwile,

⁶hikusa, kun'we na Yene, ahipfuxi akufeni, a hiyentxi hitrhama ku Kriste Yesu amimbangwini ya matilo.

⁷Akuva akombisa ku madzana-dzana ya malembe lawa mataka, a vukulu bya vupfundri bya timpswalu, ni vunene ku hine, ha Kriste Yesu.

⁸Hikusa hi timpswalu n'wihuluxiwile, hinkonta ya kupfumela; kutani leswo aswipfi ku hine, i nyiko ya Xikwembu Nkulukumba;

⁹akavanga hi mintiro; akuva kungali na lweyi atakatitwalisa ha swone.

¹⁰Hikusa hi yentxiwa ha Yene, hi vumbiwiki ku Kriste Yesu mintirweni leminene, yoleyo Xikwembu Nkulukumba hi ntshima angayibekisa akuva hi famba ku yone.

¹¹Kutani drimukani-ke, leswaku, akhale afa nw'ili va matiko hi nyama, n'wivitiwa lava vangasokangakiki, hi lava vatihlayaka leswaku vasokiwile anyameni, hi mavoko ya vhanu,

¹²ankameni lowo afa n'wingalina Kriste, afa n'witravukanisiwile ni tiko dra Israyele, afa n'wili lava vangativiwikiki ku xipfumelelanu xa xidumbiso, na n'wingalina kulavisela n'wingalina Xikwembu Nkulukumba misaveni.

¹³Kambe swoswi, ku Kriste Yesu, n'wine lava a khale afa n'wahalikule, n'witrindretiwile kusuhi hikola ka ngati ya Kriste.

¹⁴Hikusa Yene i kurula kweru, ku matiko mabiri ya kuyavana amayentxi mava drin'we; hikuhahlula khumbi ledri drakutravukanyisa afaka drili makari, inga vulala,

¹⁵anyameni yavu, a helisi avulala, inga leswi swaku, a nawu wa swileleto swiyilayila swa wone ni swihila akuva hi tlhangana na yene, a va-Yuda ni lava ngeke va-Yuda hitakota kuyentxa vumhunu byimpswha, hi hanya hi kurula.

¹⁶Hikola ka xihambano ahitlhanganisi kun'we ni Xikwembu Nkulukumba, hiva miri min'we, adlaya ni livengo ha xone.

¹⁷Kriste atile, hikolahu ka kutivisa Ivangeli ya kurula, ngopfu ku n'wine lava afaka n'wili kule, kufana ni lava afaka vali kusuhi.

¹⁸Akutlangeliwe Yene hikusa haswikota swoswi, swanga ha van'we ku van'wana hitlhasa ku Tatana, na hifambisiwa ha Moya mun'we.

¹⁹Hileswo-ke, n'wine amehe vayeni ni valuveli. N'wiva tiko drakuhlawuleka dra Xikwembu Nkulukumba ni swiro swa ndangu wakwe.

²⁰N'wiyentxa yindlu yin'we ntsena, leyinga ni masungulo ya varumiwa ni vahlayi va ritu, ni leyi Yesu Kriste anga ribye dra khumbi.

²¹Na yene Kriste lweyi a yindlu hinkwayu yitiyisiwiki ni kuva yikula, yiko yitindruluta yindlu ya Xikwembu Nkulukumba leyi twalisaka Hosi.

²²Ha Kriste, mfuri na n'wine n'wiyentxa xiyenge xa yindlu leyo, leyinga yindlu lomu Xikwembu Nkulukumba atrhamaka kone hi Moya wakwe.