Read ronga Ef 3 Bible Online

Ef 3 - ronga bible

Ef 3

¹Hikola ka leswo mine Pawulosi, ni bohiwiki, hinkonta ya kupfumela kwanga ku Kriste Yesu, ni bohiwile hinkonta ya bindru drenu va-Matiko.

²Hakunene n'witava n'wiswiyingelile vavulavula hi ntiro lowu Xikwembu Nkulukumba hi vululami byake aninyikiki hinkonta yenu.

³Aninyiki kutiva makungu ya xihundla xakwe. Nilulamisi mhaka leyi, hi kuhangwesa ku mbangu mun'wana.

⁴Kutani loko n'witlhela n'wihlaya leswi ni switraliki, n'witava ni mhaka ya leswi mine ni swi yanakanyaka hikola ka kungu ledro, ledri yentxekaka ku Kriste.

⁵A khale afa kunge na lweyi ativiki kungu ledro, kambe swoswi dri kombisiwile ku varumiwa vakuhlawuleka ni vahlayi va ritu, hi ndlela ya Moya wa Kuhlawuleka.

⁶A kungu dri ni leswaku hi Ivangeli ya Yesu Kriste ni hi ntlhanganu kun'we na yene, lava ngeke va-Yuda na vani xiyenge xa kufana ku pfindla, i swiro swa miri yoleyo ni kuhlengemela xidumbiso hi kufana.

⁷Hiyo Ivangeli leyi mine ningamutivisi wa yone, hi ndjombo ya kukari, leyi Xikwembu Nkulukumba hi ntamu wakwe ni masungulo aninyikiki.

⁸Mine ni lweyi angeke na lisima ku hinkwavu vapfumeli, kambe ni nyikiwi mfanelo ya kutivisa Ivangeli ku va-Matiko ku vupfundri lebyingeke na vugamu bya Kriste;

⁹ni fanekela kunyika hinkwavu kutiva makungu ya xihundla lexi Xikwembu Nkulukumba mutumbuluxi wa hinkwayu mintxhumu, leyi angalulamisa kusukela kusunguleni angan'wikombisanga.

¹⁰Kambe swoswi nambi mintamu ni minfumu ya le tilweni n'wifanekela kutiva, hi tlhelo dra Kereke a kuyanama ka vutivi bya Xikwembu Nkulukumba.

¹¹Ledri hidro kungu ledri Xikwembu Nkulukumba adritraliki kusukela kusunguleni na adriyentxiki ha Yesu Kriste, Hosi yeru.

¹²Kuvi hi kupfumela ku Kriste ni kutlhangana na yene loku hine hi twaka ntrhunxeko wa kuva hi tikombisa mahlweni ka Xikwembu Nkulukumba, na hitali hi kudumba.

¹³Hikolahu nin'wikombela n'winga tikarati hi tinxanisa leti ni taka hundra hi le kutone, hinkonta yenu. Leswo swifanela kuva mhaka yenu ya lisima.

¹⁴Hikola ka mhaka leyi nikhisama hi matrolo amahlweni ka Xikwembu Nkulukumba Tatana,

¹⁵lweyi a ndangu hinkwawu kungava a matilweni swanga misaveni kuni masungulo ya kone;

¹⁶akuva an'winyika kuphatima hi nhlengwe yake, nikuva n'witiyisiwa ni kuseketeliwa hi Moya wakwe, ku mhunu wa le ndreni.

¹⁷Nakone ni kombela ku Xikwembu Nkulukumba akuva Kriste atrhamisa atimbilwini tenu hi kupfumela, ni kuva n'wisimekiwa swinene n'witrhukutrhela alirandrwini,

¹⁸akuva n'witakota kuyingelisisa, kun'we ni vapfumeli hinkwavu, avukulu ni kuyanama, vunyingi ni kuyeta ka lirandru dra Kriste.

¹⁹Akuva mitakota kutiva lirandru dra Kriste, nambi leswi yene atlulaka mintamu ya kukari ni kukoteka ka vutivi, akuva Xikwembu Nkulukumba an'witata hi nhlengwe yake hinkwayu.

²⁰Hidrumisa Xikwembu Nkulukumba lweyi hi ntamu lowu ahinyikaka ntamu wa kuyentxa kutlula ngopfu ku leswi hiswikombeliki kumbe haswikota kupimisa.

²¹Ku Yene adrive lidrumo a Kerekeni ni le ku Kriste Yesu, hi minkama ni minkama. Amen.