Read ronga Flp 1 Bible Online

Flp 1 - ronga bible

Flp 1

¹ Pawulosi, na Timotewu, malandra ya Kriste Yesu, kuvahlawuliwa hinkwavu lava vatrhamaka mutini wa Filipiya, ni vabixopo, ni vadiakoni.

²A timpswalu ni kurula aswive ku n'wine leswi swipfaka ku Xikwembu Nkulukumba, Tatana weru, ni le ku Yesu Kriste.

³Nitlangela Xikwembu Nkulukumba wanga hi kun'widrimuka kwanga hinkwaku,

⁴hi minkama hinkwayu aku khongoteni kwanga hinkwaku, ni khongota hi kunyoxa ha n'wine hinkwenu,

⁵hinkonta ya kunamarela kwenu ku madrungula lawa manene, akusungula hi siku dra kuranga kuya tlhasa swoswi.

⁶Nini kudumba ka leswaku lweyi a sunguliki ntiro wa kuxonga ku n'wine, atawuyisa mahlweni kukota kuva hi siku dra Kriste Yesu.

⁷Mfuri swilulamile leswaku ni n'wiyanakanya swoswi n'wine hinkwenu; hikusa ni na n'wine hinkwenu ambilwini, angava kubohiweni, nambi kutimpfekeleni ni kutiyiseni ka Ivangeli, na kone n'wivayaveliwa-kun'we na mine atimpswalu.

⁸Kutani Xikwembu Nkulukumba i mboni ya leswaku nini kuhlunyela ha n'wine hinkwenu, alirereni ledra hombe dra Kriste Yesu.

⁹Nakone nikhongota leswaku a lirandru drenu drihundrisa a kukula hi vutlhari ni kuyingelisisa,

¹⁰akuva n'witakota kuhlawula leswi swinga swinene; n'wiva lava vaxihlayelamfuri, n'wingena kusoliwa a sikwini dra Kriste.

¹¹N'witala hi mihandru ya kululama, leyi mitumbulukaka ha Yesu Kriste akuva kudrumisiwa Xikwembu Nkulukumba.

¹²Vamakweru, ni randra akuva n'witiva leswaku a mintxhumu leyi minihumeleliki, mipfuni kuyisa mahlweni, a Ivangeli.

¹³ Lakakuva akubohiweni kwanga hi kulandra Kriste, kundruluki kutiviwa hi valaviseli hinkwavu va yindlu ya vuhosi, ni le ku van'wana hinkwavu.

¹⁴A vunyingi bya vamakweru Hosini, vatiyisiwa hi kubohiwa kwanga, vatiya kuhlaya a Ritu dra Xikwembu Nkulukumba, vangena kutxhava.

¹⁵Avan'wana vareri ta Kriste hi matrhoho ni vukwele; kambe, avan'wana, vaswiyentxa hi moya wunene.

¹⁶Van'wana kambe vayentxa hi lirandru, hi kutiva leswaku ni ntiro wa kulwela a Ivangeli;

¹⁷van'wana varera Kriste hi kukanetana vange na kubasa, vadjula a kuyengesela a kuvaviseka kwanga akubohiweni.

¹⁸Kambe swina yini? Kungava hikukanganyisa, kungava hixihlayelamfuri, Kriste awa reriwa; ni swoleswo swanitrhavisa, nahataya mahlweni hi kutrhava.

¹⁹Hikusa nini kudumba mfuri, leswaku, hi swikhongoto swenu, ni hikupfuniwa loku kupfaka ku Moya wa Yesu Kriste, swita ni pfuxela kuhuluka.

²⁰Swanga hi kulavisela ni kudumba kwanga, ka leswaku ningayentxisiwi tingana ha ntxhumu, kambe leswaku, Kriste atakulisiwa, swanga hi khale, ni swoswi amirini yanga, nambi kuli kuhanyeni, kumbe kufeni.

²¹Hikusa ku mine a kuhanya i Kriste a kufa i bindru.

²²Kambe, loko kuhanya kuninyika bindru dra mintiro yanga, kutani anitivi lexi ni taka xihlawula.

²³Makari ka mintxhumu leyi mibiri ni kamekile, hi tlhelo drin'wana ni navela akuya va na Kriste, leswi swinga hundrisa a kunyoxa;

²⁴kambe akuva nitrhama anyameni, swidjuleka hi kuhundrisa, hinkonta yenu.

²⁵Kutani, kuvani kudumba loko, naswitiva leswaku nahatava na n'wine, akuva nin'wipfuna hinkwenu a kuyisa mahlweni ni kutrhava akupfumeleni.

²⁶Akuva akutwala kwenu kuyandra, ku Kriste Yesu ha mine, hi leswi nitakatlhela niva na n'wine.

²⁷N'wifanela kutifambela hi vunene hi kulandra hi Ivangeli ya Kriste. Akuva nambi ni djula kuta, nita nitan'wivona, nambi ninge kone, niyingela timhaka tenu ta leswaku, n'wile moyeni mun'we, n'wilwa kun'we avupfumeleni bya Ivangeli.

²⁸N'wingavi ni vutoya ha ntxhumu hi lava valwaka na n'wine; leswo ku vone, kunene, i xikombiso xa kusuva, kambe ku n'wine, xiva xikombiso xa kuhuluka; leswi swipfa ku Xikwembu Nkulukumba.

²⁹Hikusa hinkonta ya Kriste n'winyikiwile, kunge hi kupfumela ku Yene ntsena, kambe na swone hi kuvaviseka ha Yene;

³⁰leswi n'winga ni kulwa loku n'winga ku vona ku mine, ni swoswi n'wiyingelaka leswaku ku kone ku mine.