Read ronga Flp 2 Bible Online

Flp 2 - ronga bible

Flp 2

¹Hileswo-ke, loko kutratriyiwa kuli kone ku Kriste, loko kuli kone kumiyetiwa hi lirandru, loko kutlhangana ka Moya kuli kone, loko a lilondro ni lirere swili kone,

²tatisani akunyoxa kwanga, n'wiva ni kuyanakanya kun'we, n'wirandrana hi lirandru drin'we, n'wili ni mbilu yin'we, n'wiva ni kuyanakanya kun'we ntsena.

³N'wingayentxi ntxhumu hi kukanetana, nambi kutidrumisa, kambe hi kutitrongohata, mun'wana-ni-mun'wana ayanakanyi leswaku i ntrongo ku van'wana.

⁴Mun'wana-ni-mun'wana angatidjuleli leswi swinga swake ntsena, kambe adjuleli ni van'wana.

⁵Vanani ni kuyanakanya kun'we ni loku afaka kuli ku Kriste Yesu:

⁶Lweyi aviki hi xiyimu xa Xikwembu Nkulukumba, angatirisanga mfanelo leyo akuva ahlayiwa swanga Xikwembu Nkulukumba.

⁷Kambe ali kutitxhulula ateka xiyimu xa vunandra, atindruluta afana ni vhanu.

⁸Kutani, leswi akumekiki na a fana ni mhunu, atitrongohata ha vuswake, ayingiseta akuyatlhasa kufeni, ni lifu dra xihambano.

⁹Kolahu-ke, na Yene Xikwembu Nkulukumba amutlakuxi ahenhla ka hinkwaswu; amunyika vito ledringa henhla ka hinkwawu mavito;

¹⁰akuva, avitweni dra Yesu, amatrolo hinkwawu ya swivumbiwa hinkwaswu: Swa matilo, ni swa misava; ni swa la hansi ka misava; swikhisama,

¹¹akuva a tindrimi hinkwatu titahlaya leswaku: Yesu Kriste i Hosi, akutwaliseni ka Xikwembu Nkulukumba Tatana!

¹²Kolahu-ke vamakweru, swanga hi leswi n'wiyingisetiki minkama hinkwayu, na angali ntsena hi loko afa nili kone kolahu, kambe kutlula swoswi ningaliki kone, hi swoswo na kone n'witirela kuhuluka kwenu hi kutitrongohata ni kururumela;

¹³Hikusa Xikwembu Nkulukumba hi Yene lweyi a tiraka ku n'wine, i ngava hi kuswinavela kumbe hi kuswiyentxa mayelana ni kurandra kwake.

¹⁴Yentxani hinkwaswu na n'winga n'unun'uteli na n'winga kanetani.

¹⁵ Akuva n'wingavina kusoleka, n'wiva lava vabasiki, n'wiva vana va Xikwembu Nkulukumba lava vangeke na nandru amakari ka lixaka ledri dra kusomboloka dra kubiha, ku drone n'wivaningaka swanga hi tinyeleti amisaveni,

¹⁶na n'witamela a ritu dra vutomi, akuva hi siku dra Kriste, nitatitwalisa hikuva anitrutrumelanga swakuka-ndlela, mfuri anitirelanga mahala.

¹⁷Mfuri, Nambi loko nyiketiwa a mhambeni ni le kutireleni ka kupfumela kwenu, na nyoxa niva nitrhava na n'wine hinkwenu.

¹⁸Kutani na n'wine trhavani, n'wiva n'winyoxa na mine hikola ka leswo.

¹⁹Kambe ni lavisela Hosini, leswaku hi kukahlula ni tarumelela Timotewu, akuva na mine ni tala hi kuhiseka, loko nitava ni madrungula yenu.

²⁰Hikusa ani mhunu lweyi angani mbilu ya kufana ni yake, lweyi angatikarataka ha n'wine.

²¹Hikusa hinkwavu vatidjulela swavu ntsena, na kunge leswi swinga swa Kriste Yesu.

²²Kambe n'wakutiva kudumbeka kwake, leswaku atiri kun'we na mine antirweni wa Ivangeli, swanga hi n'wana ni tatana wakwe.

²³Hileswo-ke, ni lavisela a kumurumela ku n'wine, xikan'we loko nitava ni vonisisi atimhaka tanga ta swoswi.

²⁴Kambe ni kudumba Hosini leswaku na mine mfuri, hikukahlula ni ta n'wiyendrela.

²⁵Ni yanakanyi leswaku, na kone, afa swifanekela akun'wirumela Epafrodito, makweru ni nakulori antirweni ni le kulweni, lweyi n'winirumeliki yene akutata ni pfuna ku leswi ni swipfumalaka;

²⁶yene avi ni kunavela lokukulu ka kun'wivona hinkwenu, afa avaviseka hikusa n'wiyingeli a swa xinyonga xakwe.

²⁷Switiyile afa a vabya, ali kusuhi ni kufa, kambe Xikwembu Nkulukumba amutweli vurombe, ange yene ntsena, kambe na mine, akuva ninga kumi nhlomulo wun'wana henhla ka wun'wana.

²⁸Hileswo-ke nita kahlula ni murumela ku n'wine, akuva n'wita trhava loko n'witlhela n'wimu vona, ni kuva na mine nitava ni kuvaviseka kutrongo.

²⁹Muyamukelani, hakunene, a Hosini, hikutrhava hinkwaku, na kone vanani ni xihluwa ku yene:

³⁰Hikusa, afa ali kusuhi ni kufa hinkonta ya ntiro wa Kriste, atinyiketa na angahlayi ntxhumu hi vutomi byake, akuva anitirela ku leswi n'wine n'wihlulekaka kuni yentxela.