Read ronga Flp 3 Bible Online

Flp 3 - ronga bible

Flp 3

¹Hi vugamu vamakweru, ni navela leswaku n'wiva ni kutrhava a Hosini. Ku mine aswi ni nonon'hweli a kupfuxeta leswi ni n'witraleliki, hikusa swin'wifanekelile n'wine.

²Tivonelani atimbyaneni leto, tivonelani ku vatiri lava kubiha, tivonelani ka ta kusoka!

³Hikusa aku soka hi hine, lava vatirela Xikwembu Nkulukumba hi Moya, na hi tikulisa ku Yesu Kriste, na hinga dumbi a nyama.

⁴Nambi loko na kone afa ninga dumba nyama; loko ali kone mun'wana lweyi apimisaka leswaku anga dumba nyama, mine ni dumba ngopfu:

⁵ ni sokisiwi ku siku dra vuntlhanu na mararu, ni nga walixaka dra Israyele, wa xiloso xaka Benyamini, muheberu wa va-Heberu; hiku landra nawu, nivi mufarisi,

⁶ hi nkhinkhi afa ni xanisa Kereke; Loko kuli hi kululama loku kunga kone nawini, kungalikina xisandru.

⁷Kambe leswi afaka swili bindru ku mine, ni swiyentxi swaku ka ndlela hinkonta ya Kriste.

⁸Mfuri, nihlaya hinkwaswu leswaku i swakuka ndlela, hinkonta ya vutivi lebyi byitlakukiki ngopfu bya Hosi yanga, Kriste Yesu, hikola kwake nilahlekeliwi hi hinkwaswu, niva ni swifananisa ni swanga xambya, akuva nitakota kukuma Kriste,

⁹ni kuva ni kumiwa ku Yene, na ningena kululama kwanga loku kupfaka nawini, kambe loku kupfaka hi kupfumela ku Kriste,

¹⁰akuva nitiva ni ntamu wa kupfuka kwake, ni kutlhangana atinxaniseni, ni ndrulutiwa hi kufana ni kufa kwake;

¹¹ni kota kulavisela kumbe xana ningakota kutlhasa kupfukeni ka vafi.

¹²Anihlayi leswaku nitava nitlhasi avugan'wini, kumbe leswaku, nihetisekile, kambe nahaya mahlweni akuva nikuma leswi na mine afaka[1] nikhomiwile hinkonta ya Kriste Yesu.

¹³Vamakweru, loko ali mine, anipimisi leswaku nitikumelile hakelo, kambe ntxhumu wun'we nayentxa, mfuri hileswaku: Nidrivala leswi swisaliki ntrhaku nitikarata a kukuma leswi swinga mahlweni kwanga,

¹⁴nitrutruma niya ankongometweni, akuva nitakuma a hakelo dra kuvitaniwa loku kulu hi Xikwembu Nkulukumba ku Kriste Yesu.

¹⁵Hine hinkweru, lava hi hetisekiki a hi pimiseni swoleswo; nambi n'wakuva ni kupimisa kun'wana, Xikwembu Nkulukumba ata n'wipfuletela ni swoswo.

¹⁶Kambe ku leswi kutani hitlhasiki, ahifambeni hi ndlela yoleyo, leyi hiyilandriki kutlhasa swoswi.

¹⁷ Vamakweru, vanani valandreli va xikombiso xanga, yetisani lava hanyaka hi kutwanana ni xikombiso lexi ni n'winyikiki.

¹⁸Hikusa i vanyingi, ni tekisiki kun'wibyela, mfuri na n'wibyela ni swoswi, na ni drila: vanga valala va xihambano xa Kriste.

¹⁹A vugamu byavu i kulahleka, hikusa a xikwembu nkulukumba wavu i khuri. Akutitwalisa kwavu kuva tisela tingana ha vuswavu, vayanakanya ntsena a swa misava leyi.

²⁰Kambe a muti weru wu le Matilweni, lomu na kone hi laviselaka aku buya ka Muhuluxi, a Hosi, Yesu Kriste.

²¹Yene ataka ndruluta miri yeru ya kutrongahateka, akuva mifana ni miri yake ya kuphatima, hi ntamu lowu ha wone aswikotaka kubeka hinkwaswu hansi kwake.