Read ronga Kls 1 Bible Online

Kls 1 - ronga bible

Kls 1

¹Pawulosi, a mupostola wa Yesu Kriste hi kurandra ka Xikwembu Nkulukumba, na Timotewu makweru,

²ku vapfumeli ni vamakweru lava vakudumbeka ku Kriste lava vanga mutini wa Kolosa, hi n'winavelela timpswalu ni kurula leswi swipfaka ku Xikwembu Nkulukumba Tatana weru.

³Loko hin'wikhongotela hitlangela Xikwembu Nkulukumba Tatana wa Hosi yeru Yesu Kriste hi minkama hinkwayu,

⁴hikusa hiyingeli kupfumela kwenu ku Kriste Yesu, ni lirandru ledri n'widrikombisaka ku vapfumeli hinkwavu.

⁵Hinkonta yakulavisela loku n'wibekiseliwiki kone Matilweni, swanga hi leswi n'wiyingeliki ke hikusungula hi ritu dra xihlayelamfuri dra Ivangeli,

⁶yitlhasiki ku n'wine ni le misaveni hinkwayu; yibeka mihandru na mikula swanga hileswi swihumeleliki makari kwenu, kusukela ku siku ledri n'witiviki timpswalu ta Xikwembu Nkulukumba hi xihlayelamfuri.

⁷Hinkwaswu leswi n'wine n'wiswidondrisiwiki hi Epafra, nakulori murandriwa weru wa kudumbeka ni mutirikulori ntirweni wa Kriste, lweyi anisiviki ku n'wine.

⁸Lweyi angahibyela hi swa lirandru drenu n'wingana drone, amoyeni.

⁹Hileswo-ke, na hine kusukela siku ledri hiyingeliki leswo, a hi yimi kun'wikhongotelela ni kun'wkombelela leswaku n'witala hivutivi byakurandra kwake, avutlharini hinkwabyu ni kuyingelisisa loku pfaka ku Moya wakwe,

¹⁰akuva n'wifamba hi kululama amahlweni ka Hosi, n'wimutrhavisa ku hinkwaswu, n'wibeka mihandru amintirweni hinkwayu leminene, na n'wikula akutiveni ka Xikwembu Nkulukumba;

¹¹n'witiyisiwa hi kutiya hinkwaku, hikola ka ntamu wakutwala kwake, akutiyiseleni hinkwaku n'wilehisa mbilu ni kutrhava.

¹²Tlangelani Xikwembu Nkulukumba Tatana, lweyi angan'wiyentxa akuva lava faneliwaka hikuva ni xiyenge ku pfindla dra valulami, a livaningwini.

¹³Yene ahihuluxile antan'wini wa munyama, ahirurisela Mfun'wini wa N'wana wakwe lweyi wa kurandriwa.

¹⁴ Lweyi ha Yene hingani kutiruliwa, kunga kudrivaleliwa ka swihono.

¹⁵Yene i xifaniso xa Xikwembu Nkulukumba lweyi angavoniwikiki, amativula ya hinkwaswu swivumbiwa.

¹⁶Kavi ha yene kuvumbiwiki hinkwaswu leswinga tilweni ni leswinga misaveni, leswi voniwaka ni leswinga voniwikiki, swingava swiluvelo kumbe minfumu, kumbe ni vundruna, ni mintamu ya le henhla. Hinkwaswu switumbuluxiwi ha Yene, i swake.

¹⁷Yene i wa kusungula na hinkwaswu swingasina tumbuluxiwa; kutani hinkwaswu switiya hikola kwake.

¹⁸Hi Yene nhloko ya miri, dringa kereke. Yene i masungulu, ni mativula ya kupfuka a makari ka vafi, lakakuva ava ni mbangu wa kuranga ku hinkwaswu.

¹⁹Hikusa avi kurandra ka Xikwembu Nkulukumba leswaku akuhetiseka hinkwaku kutrhama ku Yene,

²⁰na kone ha Yene ayentxi akurula hi ngati ya xihambano xakwe, hinkonta yake atitlhanganisela mintxhumu hinkwayu, leyi minga lana misaveni ni le tilweni.

²¹Nakone na n'wine, afaka a khale n'wingativiwi, n'wili valala vakwe amayentxeleni yenu, hinkonta ya mintiro yenu ya kubiha.

²²Kambe swoswi an'witlhanganisile a mirini wakwe, hinkonta ya kufa kwake, akuva an'wiyisa amahlweni kwake na n'wili lava valulamiki, n'winkhenseka n'wingena nandru.

²³ Loko kunene, n'witrhamile kupfumeleni, n'wisimekiwa n'witiya, n'winga titrhindreti kule ni kulavisela ka Ivangeli, leyi n'wiyiyingeliki yihlayiwa ku vhanu hinkwavu vahansi ka misava, leyi mine Pawulosi, ni ndrulukiki murumiwa wa yone.

²⁴Swoswi na nyoxa a mahlomulweni yanga hinkonta yenu, ni hetisisa leswi swisaliki swaku kuxaniseka ka Kriste hinkonta ya miri yake, inga Kereke.

²⁵Ledri mine ningayentxiwa murumiwa, hikola ka kuntrhunxiwa hi Xikwembu Nkulukumba, akuva aniruma ntiro wa kuhetisisa a ritu dra Xikwembu Nkulukumba ku n'wine.

²⁶A makungu lawa afaka mafihlekile kusukela hi madzana ni madzana ya malembe lawa mahundriki, ni kutinxaka hinkwatu, kambe swoswi a paluxiki ku vahlawuliwa vakwe.

²⁷Lava Xikwembu Nkulukumba avanyiki kutiva a nhlengwe dra lidrumu dra kungu amakari ka va-Matiko, hileswaku, ku n'wine kuna Kriste lweyi anga kulavisela kwenu ka lidrumu;

²⁸lweyi hine himutivisaka, na hi luleka ni kudondrisa vhanu hinkwavu, hivutlhari hinkwabyu, leswaku hitayisa vhanu na vali lava vahetisekiki ku Kriste,

²⁹ hikolahu ka leswo ni tiraka, na nilwa hikola ka ntamu wakwe wutiraka ku mine.