Read ronga Kls 2 Bible Online

Kls 2 - ronga bible

Kls 2

¹Hikusa nirandra leswaku n'witiva akulwa lokukulu loku nilwaka kone ha n'wine, hinkonta ya lavanga Lawodikiya, ni hinkwavu van'wana lavanga ni tiviki hi liso dranga.

²Akuva a timbilu tavu titiyisiwa, ni kuva vatlhanganisiwa kun'we alirandrwini, akuva vava ni kufuya loku kunga ni kudumbeka loku kakutiya, akuva vayingelisisa swinene a kungu dra Xikwembu Nkulukumba, anga Kriste,

³Ku yene kufihliwi tinhlengwe hinkwatu ta vutlhari ni ta kuyingelisisa.

⁴Nihlaya leswi akuva ni mun'we angan'wikanganyisi hi maritu ya kun'wikokela kun'wikholwisa.

⁵Hikusa, nambi ninge kone hi miri, ni na n'wine hi moya; na trhava kutiva leswaku n'wine n'wihanya hi nawu wa hombe na n'witiyi kupfumeleni ku Kriste.

⁶Xileswo swanga heswi n'wiyamukeliki Hosi Yesu Kriste, hi ndlela yoleyo n'wifanele kuhanya n'witlhangana na yene,

⁷n'widzima mitru na n'witiseketela ku yene, n'witiya kupfumeleni kwenu, hi laha n'widondrisiwiki ha kone n'winyika kutlangela Xikwembu Nkulukumba minkama hinkwayu.

⁸Tivonelani n'wingatitrika n'wikanganyisiwa hi tidondro ta vutlhari bya kukala ndlela, hi kulandra swihena swa vhanu kumbe hiku landra masungulo ya misava, na kunge hi ku tidondro ta Kriste.

⁹Hikusa Xikwembu Nkulukumba akone hi kuhetiseka ku Kriste, hi Xivumbeko xa miri,

¹⁰na n'wine n'wikone ku Yene hi kuhetiseka, hi Yene nhloko mintamu hinkwayu ni vundruna.

¹¹Ku Yene mfuri n'wisokiwile, kunge kusokiwa loku yentxiwaka hi mavoko, kambe hi kusokiwa ka miri kunga ka Kriste, inga ku ntrhunxeka loko kungapfiki nyameni.

¹² Hikusa n'wibabatisiwile, n'wilahliwi kun'we na Yene, n'wipfuxiwi kun'we na Yene, hikupfumela ku ntamu wa Xikwembu Nkulukumba, lweyi angamupfuxa ku lava ku fa.

¹³A nkama n'wine afaka n'wahafeli swidohweni swenu, ni hi kuka-kusokiwa anyameni yenu, an'winyiki vutomi kun'we na Yene, hi kuhidrivalela a swidoho sweru hinkwaswu,

¹⁴asusi a papela ledri afaka kutraliwi ku drone a nandru weru, ledri afaka drihiyavanyisa swanga hi kuramela ka nawu, adrisusi hinkwadru hi kumugongondrela axihambanwini,

¹⁵kutani ahluli vundruna ni mintamu, a vatrongahatile livaleni, xikombiso xa kuhlula, ha Kriste.

¹⁶Hi swoswo kunga ve na mhunu lweyi atakan'wisola hinkonta ya kuva n'wida kumbe swa kunwa, kumbe hinkonta ya masiku ya nkhuvu, hi masiku ya hweti leyimpswha, kumbe hi savata.

¹⁷Hinkwaswu leswo i swintrhuti swa leswifanelaka kuta. A miri i ya Kriste.

¹⁸N'wingatitriki, n'wiwutleliwa a hakelo hi vhanu lava tiyentxaka valandreleli kambe na vakhisamelaka ntrumi. A vhanu lavo vakaneta mintxhumu leyi vangiki mivona na vatitata hi kutikulisa hi miyanakanyu ya ntshima ya lirandru dravu.

¹⁹Avatitlhanganisanga na Kriste lweyi ayandrisaka miri hinkwayu, amitlhanganisa aswiyengeni swakuhambana, ni kuswiyentxa swiwundleka swanga hi kungu dra Xikwembu Nkulukumba.

²⁰Loko n'wifile kun'we na Kriste, ni loko n'wihambanile ni ku swihila swa misava. Hayini n'witinyiketa ku minkhuva swanga va misava? A switsimbo swanga hi leswaku:

²¹Ungakhumbi leswi, unganampswi leswiya, ungatameli leswo.

²²Ku kongomiwa mintxhumu leyi minyamalalaka hi kuyentxa na swinga swileleto ni tidondro ta vhanu ntsena.

²³A mintxhumu leyo mini mavonekela ya vutlhari, hikusa swi mi kombisa xiyimu xa vukhongoti kutitrongahateni, ni le kudreleni ka ntshima ya miri. Kambe leswo aswina lisima ni drin'we, ntsena switirela kutrhavisa kurandra.