Read ronga Kls 3 Bible Online

Kls 3 - ronga bible

Kls 3

¹Hikolahu-ke leswi n'wipfuxiwiki kun'we na Kriste swoswi, djulisisani mintxhumu leyi minga ya le tilweni, lomu Kriste atrhamiki kone axitrhan'wini xa lidrumu xineneni xa Xikwembu Nkulukumba.

²Yanakanyani swa le tilweni, swinge swa laha misaveni.

³Hikusa n'wine n'wifile na Kriste a vutomi byenu byifihliwi kun'we na yene ku Xikwembu Nkulukumba.

⁴Loko Kriste inga vutomi byenu, ativonekisa, kutani na n'wine n'witavonekisiwa kun'we na yene a kuphatimeni kwake.

⁵Hileswo-ke, dlayani ku n'wine hinkwaku ku navela ka laha misaveni: a vumbuye, ni vuwoswi, ni vunfani, ni kunavela ka kubiha, ni kufelela loku kunga lixaka dra kugandrela swifaniso.

⁶A mintxhumu leyo mipfuxa mahlundru ya Xikwembu Nkulukumba henhla ka lavo vangayingisetikiki.

⁷Ke, kuvi hi ndlela leyo n'wine n'wifambiki ha yone khale, na n'waha hanya hi mintxhumu leyo;

⁸kambe swoswi humani ku swone, ka kulebya, ni kuhlundruka, ni tihanyi, ni kulumbeta, ni swifingeto leswi humaka anon'wini wenu.

⁹N'wingahembelaneni van'we ku van'wana, hikusa n'wine n'wihlivili a mhunu lweyi wa khale ni swiyentxo swake.

¹⁰ Swoswi n'wine n'wiyambalile mhunu mumpswha, lweyi apfuxetiwaka kutiveni, hi xifaniso xa lweyi amuvumbiki;

¹¹laha kungaliki na mu-Yuda nambi mugeriki, nambi ku lava vakusoka nambi ku lava vangasokiwangakiki, nambi vali va va-Barbara, kumbe mu-Cita, nambi xa kuva xikarawa, kambe kuntrhunxeka ha Kriste kuhinkwaswu ku hinkwavu.

¹²Leswi angavahlawuliwa va Xikwembu Nkulukumba, vaxwengi ni varandriwa hi leswo-ke vanani ni lilondro ni vunene, kutitrongohata ni kunabyala, ni kulehisa ka mbilu.

¹³Na n'wipfunana van'we ku van'wana, loko mun'we ali ni mhaka ya kusola kakukari ku mun'wana, drivalelanani van'we ku van'wana swanga hileswi Kriste an'widrivaleliki, na n'wine yentxisani xiswoswo.

¹⁴A henhla ka hinkwaswu, vanani ni lirandru, xinga xitrimbo xa kuhetiseka.

¹⁵A kufume timbilwini tenu a kurula ka Kriste, loku Xikwembu Nkulukumba an'wivitaneliki kone akuva n'wiyentxa miri min'we ntsena, vanani lava vatlangelaka.

¹⁶A ritu dra Kriste adrihanyi hi kuyandra ku n'wine, akutiveni hi hinkwaku, n'widondrisana ni kukwhavelana van'we ku van'wana hi kuyimbelela hi Mapsalma, ni tinsimu ta moya, n'wiyimbelelela Xikwembu Nkulukumba, n'witlangela hi mbilu hinkwayu.

¹⁷Hinkwaswu leswi n'wiswiyentxaka kumbe n'wiswihlayaka, aswiyentxiwe hi vito dra Hosi Yesu, ha yene, n'witlangela Xikwembu Nkulukumba Tatana.

¹⁸Vavasati, yingesetani vanuna venu swanga hi leswi swifanelaka ku lweyi apfumelaka ku Hosi.

¹⁹Vavanuna, randrani vasati venu n'winga vahlundrukeleni.

²⁰Vana, yingisetani vapswali venu ku hinkwaswu hikusa leswo swi trhavisa Hosi.

²¹N'wine vapswali, n'winga hlundrukiseni vana venu akuva vone vangatihela mbilu.

²²N'wine swikarawa, yingesetani amintxhun'wini hinkwayu, a vinyi venu va laha misaveni, n'wingavatireli hi loko va n'wilavisile, swanga hi loko n'witrhavisa vhanu, kambe swiyentxani hi mbilu ya kunabyala na n'witxhava Xikwembu Nkulukumba.

²³Hinkwaswu leswi n'wiswiyentxaka, swiyentxani hi mbilu hinkwayu, swanga hi loko n'witirela Hosi, na kunge vhanu.

²⁴Drimukani leswaku n'witayamukela hakelo dra pfindla ku Hosi, hikusa n'witirela Kriste, lweyi anga Hosi.

²⁵Kambe lweyi ayentxaka swakubiha ata yamukela hakelo dra swakubiha, hikusa akuhlawuliwi ni mun'we.