Read ronga I Tsl 2 Bible Online

I Tsl 2 - ronga bible

I Tsl 2

¹Hikusa n'wine mfuri, vamakweru, n'waswitiva swinene leswaku amanhingenela yeru ku n'wine akuvanga ka mahala.

² Kambe ntrhaku ka kuva hi xanisiwile ni hi kurukiwa le Filipiya, swanga hi leswi n'wiswitivaka, hi ve ni kutiyisela ku Xikwembu Nkulukumba weru, akuva hi n'wihlayela Ivangeli ya Xikwembu Nkulukumba a tikweni drenu, hikulwa loku kukulu.

³Hikusa akurera kweru akavanga hi kukanganyisa, nambi ha xambya, nambi hi marengu.

⁴Kambe swanga hi leswi hipfumeleliwiki hi Xikwembu Nkulukumba, akuva hidumbiwa Ivhangeleni, hihlayisa xiswoswo, na ingekutrhavisa vhanu, kambe kukutrhavisa Xikwembu Nkulukumba, lweyi a kambaka timbilu teru.

⁵Nakone, n'waswitiva swinene leswaku ahingita hi maritu ya kutixongisa, nambi kutikulisa. Xikwembu Nkulukumba i mboni ya swone.

⁶Ahidjulisisanga kutwalisiwa loku kuhumaka vhanwini, nambi ku n'wine, nambi kuva van'wana;

⁷nambi afa hiswikotile, kun'wibindra, swanga mupostola wa Kriste, kambe hidjuli kun'wibekisa hi kunabyala swanga mamana lweyi a vonelelaka vanakwe.

⁸Hiswoswo na hine, havi ni lirandru ku n'wine, hi swirandrile kun'wiyavela na n'wine na kunge ntsena Ivangeli ya Xikwembu Nkulukumba, kambe na byone vutomi byeru, hikusa ku hine n'we kundruluka lava va randrekaka.

⁹Kunene n'wadrimuka, vamakweru, a ntiru weru ni kutikarata kweru; hitiri vusiku ni nhlikanhi, akuva hingabindriseli ni mun'we ku n'wine, hi n'wirerela Ivangeli ya Xikwembu Nkulukumba.

¹⁰N'wine n'witimboni na Yene Xikwembu Nkulukumba, ta leswaku mahanyela yeru ku n'wine vapfumeli, afa maxwengile, hi lulamile na hingena kusoleka.

¹¹Swanga hileswi n'wiswitivaka, malayela lawa hiviki na wone ni kutxhavelela ku mun'wana-ni-mun'wana, swanga tatana lweyi alayaka n'wanakwe;

¹²akuva n'wifamba hi laha swifanekelaka Xikwembu Nkulukumba, lweyi an'wirambaka kuva n'wiva mfun'wini wakwe ni lidrun'wini.

¹³Nakone ku leswo hi tlangela Xikwembu Nkulukumba, hikukhinyelela, hi kuva n'wiyamukeli ritu dra Xikwembu Nkulukumba hi kurera kweru, ledri driviki ritu ledri n'wiyamukeliki. Hikuva afaka dringe ritu dra vhanu, kambe afaka drili ritu dra xihlayelamfuri, ledri dritiraka ku n'wine vapfumeli.

¹⁴Hikusa n'wine vamakweru, afa n'wili lava vayetisaka makereke ya Xikwembu Nkulukumba, lawa manga Yudeya, lawa manga ku Kriste Yesu; hikuva na n'wine n'wixaniseki kun'we ni va kwenu, swanga ha vone, hi va-Yuda;

¹⁵vone lava mfuri vadlayiki Hosi Yesu ni vaprofeta, vahixanisile na hine, avatrhavisi Xikwembu Nkulukumba, i valala va vhanu hinkwavu.

¹⁶Vahi sivela kurerela va-Matiko a ritu dra huluku, vatatisa mpimu wa swidoho swavu minkama hinkwayu, kambe amahludru ya Xikwembu Nkulukumba maweli henhla kwavu kutlhasa vugan'wini.

¹⁷Loko ali hine, vamakweru, hivi ni kutravukana na n'wine hi nkamanyana, kunge ha mbilu, hatiyisile ngopfu hi kunavela loku ku kulu, akuva hi vona vuso byenu!

¹⁸Hileswo-ke, afa ni swirandra kuta ku n'wine, ha kan'we ni kubiri, a kun'wiyendrela, mine Pawulosi ni dringisile kan'we ni kubiri, kambe Sathana a hi sivelile.

¹⁹Hikusa i yini kudumba kweru, ni ngiyana yeru ya kutikutxa, xana a hi n'wine mfuri amahlweni ka Hosi yeru Yesu Kriste akubuyeni kwake?

²⁰Ha kunene n'wine n'wikutwala kweru ni kutrhava kweru!