Read ronga I Tsl 3 Bible Online

I Tsl 3 - ronga bible

I Tsl 3

¹ Hikola ka leswo, hikuva swinga koteki kuva hilavisela, hivoni leswaku i swahombe hitrhama a Atena vusweru,

²ni kun'wirumela Timotewu, a makweru, a mutiri wa Xikwembu Nkulukumba a Ivhangeleni ya Kriste. Himurumi akun'witiyisa ni kutxhavelela avupfumeli byenu,

³ni kuva n'wingatrekatrekisiwi hi tinxanisa leti; n'wine n'waswitiva ngopfu leswaku hileswi hirindrelaka swone.

⁴A nkama afaka hili halanu, afa han'wibyelile leswaku hifaneli kuxanisiwa. Naswihumelelile, swanga hi leswi n'wiswitivaka.

⁵Hileswo, na mine mfuri ningakotangikiki kurindrela, ni murumi akuva nitiva ta kupfumela kwenu, na nitxhava leswaku amuwongi angan'wiwongi, akuva ntiro weru wutandruluka lowu wungapfunikiki ntxhumu.

⁶ Kambe leswi Timotewu abuyiki swoswi, atatava na hine na ahitisela madrungula manene ya vupfumeli byenu ni lirandru, ni leswi n'wihidrimukisaka xiswone minkama hinkwayu, n'winikuhlunyela ngopfu kuhivona, swanga hileswi na hine hin'wihlunyelaka,

⁷hinkonta ya leswi, vamakweru, hivi nikutxhaveleliwa kukulu akukaratekeni hinkwaku ni le kuxanisekeni, hikola ka kupfumela kwenu.

⁸Hikusa swoswi hahanya, loko n'witiyili aHosini,

⁹hikusa hingamutlangela hayini Xikwembu Nkulukumba hi kunyoxa hinkwaku loku hi nyikiwaka hinkonta yenu amahlweni ka Xikwembu Nkulukumba weru,

¹⁰hi kombela vusiku ni hlikanhi hi hundrisa kukombela, akuva hi vona vuso byenu hitakota kun'wibekisela leswi swipfumalekaka akupfumeleni kwenu.

¹¹Kambe Xikwembu Nkulukumba ha vuswake, Tatana weru ni Hosi yeru Yesu Kriste, angafambisi ndlela yeru akuva hita ku n'wine.

¹²A Hosi yinga yengetela ni kuyentxa lirandru drenu drikula ku van'we ni kuva van'wana ni kuhinkwavu. Swanga hi leswi na hine hin'wirandraka.

¹³Yita tiyisa timbilu tenu akuxwengeni ni kukota kutikombisa n'wihetisekile n'wingena nandru mahlweni ka Xikwembu Nkulukumba Tatana weru, akubuyeni ka Hosi yeru Yesu Kriste ni hinkwatu tinsasi.