Read ronga I Tsl 4 Bible Online

I Tsl 4 - ronga bible

I Tsl 4

¹A vugan'wini vamakweru, ha n'wikombela ni kun'witratriya ku Hosi Yesu leswaku, swanga hileswi n'wiyamukeliki ha hine leswi n'wifanekelaka kufambisa xiswone akuva n'witatrhavisa Xikwembu Nkulukumba, fambisani xiswoswo, akuva n'wiya mahlweni hi kuyandra ngopfu.

²Hikusa n'waswitiva swileleto leswi hinga n'winyika swone hikola ka Hosi Yesu.

³Hikusa leswi i kurandra ka Xikwembu Nkulukumba, akuxwengisiwa kwenu: n'wiva kule ni vuwoswi;

⁴ni leswaku mun'wana-ni-mun'wana aative kutamela xibya xakwe hi kuxwenga ni xitxhavu.

⁵Kunge hi kunavela ka swakubiha, swanga hi va-Matiko, lava vangativikiki Xikwembu Nkulukumba.

⁶Kungave ni mun'we lweyi a honelaka makwavu kumbe ku mukhunguvanyisa, hikusa a Hosi i mudrihiseli wa hinkwaswu leswo, swanga hi leswi hin'wibyeliki kusunguleni, nakone hatiyisa.

⁷Xikwembu Nkulukumba angahi vitanelanga vuwoswini, kambe akuxwengeni.

⁸Hikolahu, lweyi a drelaka leswi anga dreli mhunu, kambe a drela Xikwembu Nkulukumba, lweyi ahinyikaka nawone a Moya wakwe wa Kuxwenga.

⁹Ku leswi faneliki hi talirandru ku vamakwenu kupfumeleni, a swahafanekeli kun'witralela ntxhumu, hikuva n'wifambisiwa hi Xikwembu Nkulukumba kuko n'wirandrana van'we ni van'wana;

¹⁰Hikusa mfuri n'waswiyentxa leswo ku vamakweru hinkwavu lava vanga tikweni dra Makedoniya. Kambe ha n'witratriya, vamakweru, leswaku n'wiyentxa hi kutlulisa.

¹¹Kutani djulisisani kuhanya hi kurula; na n'witira mintiro yenu, n'widjulisisa kutira hi mavoko yenu, swanga hi laha hin'wileletiki ha kone;

¹²akuva n'wifamba hikululama ni lava vanga handle na n'wingavileli ntxhumu ni mun'we.

¹³Kambe anirandri, vamakweru, leswaku n'wikohla hi timhaka ta lava vatiyetleleliki, n'wingativaviseka swanga hi van'wana lava vangeke na kudumba.

¹⁴Hikusa, loko hi pfumela leswaku Yesu afile ni leswaku apfukile kufeni, xileswi na kone lava vayetleliki ku Yesu Xikwembu Nkulukumba atavabuyisa kun'we na Yene.

¹⁵Hikusa hihlaya leswo ku n'wine hi ritu dra Hosi leswaku: hine lava hisaleliki kubuya ka Hosi na hihanya, hingatirangela lava vayetleliki.

¹⁶Hikusa a Hosi hi ntshima ya yone, yitaxika hi le tilweni, hihuwa leyi yileletaka, hi ritu dra ntrumi leyi yikulu, ni hi mhalamhala ya Xikwembu Nkulukumba, kutani lava vafeliki ku Kriste vata pfuka hi kusungula.

¹⁷Ntrhaku hine hi hanyaka hitawutleliwa matlavini ya le tilweni hi ya tlhangaveta Hosi a mpfhukeni; kun'we navu. Kutani hitava ni Hosi hila kungahelikiki.

¹⁸ Hikolahu-ke, txhavelelanani van'we ku van'wana hi maritu lawa.