Read ronga I Tsl 5 Bible Online

I Tsl 5 - ronga bible

I Tsl 5

¹Kambe vamakweru, loko kuli hi minkama ni tinguva, aswisindriseki kuva nin'witralela.

² Hikusa n'wine mfuri n'waswitiva swinene leswaku a siku dra Hosi dri tata swanga hi muyivi avusikwini.

³Loko vhanu va ku: Hi hanya hikurula ni kubekiseka, kutani a mahlomulo matawa henhla kwavu, swanga hi wansati wa nyimba loko a lun'wa, vangaka vangahuluki.

⁴Kambe n'wine vamakweru an'wahahanyi munyameni, akuva a siku ledriya dringan'witxhuketi swanga muyivi,

⁵hikusa n'wine hinkwenu n'wivana va livaningo, n'wivana vanhlikanhi; hine ahi vavusiku nambi munyama.

⁶Hileswo-ke hingakhutriyeleni swanga hi van'wana, kambe a hi veneni lava valavelelaka ni kuhanya hikutikhoma.

⁷Hikusa lava kutriyelaka vakutriyela ni vusiku, lava vapopswaka vatinyiketela kupopsweni ni vusiku.

⁸Kambe hine hingavanhlikanhi, ahitikhomeni, hiyambala xitlhangu xa kupfumela, ni xa lirandru, ni xilembe xa kudumba ka huluko.

⁹Hikuva Xikwembu Nkulukumba angahibekelanga mahlundru, kambe hikuma huluko ha Hosi yeru Yesu Kriste,

¹⁰lweyi ahifeliki akuva nambi hilavelela, nambi hikutriyela hita hanya kun'we na Yene.

¹¹Hiswoswo, khongotelanani n'wiyakisana van'we ku van'wana swanga hi laha n'wiyentxiki ha kone kutlhasa swoswi.

¹²Ha n'witratriya, vamakweru, leswaku vanani ni xihluwa ku lava vatiraka amakari kwenu, lava van'wibyisaka, lava van'wilulekaka.

¹³Vatamelani hi xitxhavu hinkwaxu ni lirandru, hinkonta ya ntiro wavu. Na n'wili nikurula amakari kwenu.

¹⁴Ha n'wikombela mfuri vamakweru, akuva n'wiluleka lava vakukala vangatibekisi, tiyisani lava vaheliki timbilu, byatrhani lava vagome, n'wilehisela hinkwavu ambilu.

¹⁵Lavisani leswaku kungavi ni lweyi atlheliselaka mun'wana kubiha hi kubiha, kambe djulisisani minkama hinkwayu swa hombe van'we ku van'wana ni ku hinkwavu.

¹⁶Trhavani minkama hinkwayu.

¹⁷Khongotani n'winga yimi.

¹⁸Ku hinkwaswu nyikani mitlangelo, hikusa leswo i kurandra ka Xikwembu Nkulukumba ku Kriste Yesu ha n'wine.

¹⁹N'winga siveli Moya,

²⁰N'wingadreli a vaprofeta.

²¹Hinkwaswu swikambani; bekisani leswi swinene,

²²na n'wihambuka kakuhinkwaswu leswi swakubiha.

²³Ke, Xikwembu Nkulukumba wa kurula an'wibasise kakuhinkwaswu, ne moyeni wenu ne hikeni ni mirini, n'wiva lava vabekisekaka hi mfanelo, n'wingave ni kusoleka akubuyeni ka Hosi yeru Yesu Kriste.

²⁴Lweyi a n'wihlawuliki a dumbekile, na ata yentxa leswi a dumbisiki swone.

²⁵Vamakweru, hikhongotelani.

²⁶Drungulani hinkwavu vamakweru hi kumpswompswana ka vumakwavu.

²⁷Nan'wikombela hi vito dra Hosi, akuva n'wihlaya papela ledri ku hinkwatu tinsasi.

²⁸A timpswalu ta Hosi yeru Yesu Kriste ative na n'wine.