Read ronga I Tmt 1 Bible Online

I Tmt 1 - ronga bible

I Tmt 1

¹Mine Pawulosi, mupostola wa Yesu Kriste, hi kulandra a kuleleta ka Xikwembu Nkulukumba Muhuluxi weru, ni ka Yesu Kriste lweyi anga kudumba kweru,

²ku Timotewu n'wananga hi xihlayelamfuri akupfumeleni: Timpswalu, ni lirere ni kurula, leswi swipfaka hi le ku Xikwembu Nkulukumba Tatana weru, ni le ku Kriste Yesu Hosi yeru.

³Hiswoleswo nikutratriyiki ha swone, loko niya Makedoniya, leswaku utrhama a Efesa, akuva uleleta van'we leswaku vangatxhuke vadondrisa tin'wana tidondro,

⁴ni leswaku vangayingiseti swihitana ni milongoloko leyi mingagamiki ya swiloso swa tinxaka, leswi vangaka timholova, matrhan'wini ya kukombisa a makungu ya Xikwembu Nkulukumba, mafambelanaka ni kupfumela.

⁵Kambe a nkongometo wa leleto i lirandru, ledri dripfaka ambilwini leyi yibasiki, ni le lipfalwini ledri nene, ni le kupfumeleni loku kungalikina kukanganyisa,

⁶leswi van'we vatravukaniki na swone, vahambukela amaritwini ya kuka-ndlela,

⁷na vadjula kuva vadondrisi va nawu, kambe na vangayingelisisi leswi vahlayaka swone ni leswi vatiyisaka swone.

⁸Haswitiva nakone leswaku a nawu i wunene, loko a mhunu atira ha wone hi mfanelo,

⁹na ativa leswaku a nawu awubekeliwanga mululami, kambe im-na, ku lava vamfani ni lava vakuyala kuyingiseta, vasandri ni vadohi, varuki ni va kuka-vukhongoti; vadlayi va vatatana vavu ni vadlayi va vamamana vavu; vadlayi va vhanu,

¹⁰lava vanyamiki ni vavanuna lava vayentxaka a swatingana ni vanuna-kulobye, vayivi va vhanu ni va madrimi, ni lava vatrikaka a kulandra vukhongoti ni lava vahambanaka ni dondro leyi yinene,

¹¹swanga hi kulandra a Ivangeli ya kuphatima ya Xikwembu Nkulukumba lweyi akhensiwaka, leyi nirwexiwiki yone.

¹²Nitlangela Yesu Kriste, Hosi yeru, lweyi anitiyisiki, hikuva anivoni na nidumbeka akuva anibeka antirweni wakwe,

¹³mine lweyi kusungula afaka nili mufingeti ni muxanisi, ni muyeyisi; kambe niyentxeliweke lirere hikusa nayentxi hi kukala ningaswitivi, ni kuka-vupfumeli.

¹⁴Kambe a vumbilu bya Hosi yeru byayandri ngopfu, kun'we ni kupfumela ni lirandru leswi swinga ku Kriste Yesu.

¹⁵A ritu ledri dra dumbeka, na kone drifanela kuyamukeliwa hi kudumba hinkwaku, leswaku Kriste Yesu ati misaveni, atatahuluxa vadohi, lava mine ninga lwenkulu ku vone.

¹⁶Kambe hikola ka leswo, niyentxeliwi lirere akuva Yesu Kriste akombisa ha mine ninga lwenkulu, a kulehisa hinkwaku ka mbilu, swiva xikombiso ku lava afaka vatakapfumela ku yene, akuva vakuma vutomi lebyi byingahelikiki.

¹⁷Ke, ku Hosi ya minkama hinkwayu, Xikwembu Nkulukumba lweyi wa mun'we, lweyi ahanyaka hi la kungaheliki; lweyi angavonekiki; akuve ni xihluwa ni kutwala hi minkama ni minkama. Amen.

¹⁸A leleto ledri nidrinyikaka wene n'wananga Timotewu, swanga hi kulandra a kuprofeta loku kuyentxiwiki hi tlhelo draku, leswaku ha kone, ulwa akulwa loku kunene,

¹⁹na uni kupfumela ni lipfalu ledri drinene, ledri van'wana vangadridrela kutani vambombeliwa hi kupfumela kwavu.

²⁰Amakari kwavu, kuna Himenewu na Alexandre, lava nivanyiketiki ku Sathana, akuva vadondrisiwa vangahasandri.