Read ronga I Tmt 6 Bible Online

I Tmt 6 - ronga bible

I Tmt 6

¹Lava vanga hansi ka mpinga, vanga swikarawa, avative vava vebekisa leswaku a vinyi vavu vafanekeliwa hi xihluwa hinkwaxu, akuva a vito dra Xikwembu Nkulukumba ni dondro swingasoliwi.

²Nakone lava vangani vinyi lava na vone vanga vapfumeli, vangavadreli hi leswi vanga vamakwavu; kambe avavatireli ngopfu, hikusa lava vatireliwaka i vapfumeli ni varandriwa. Dondrisa a mintxhumu leyi hinkwayu na utratriya.

³Loko mhunu adondrisa dondro yimbeni ava angapfumeli a maritu manene ya Hosi yeru Yesu Kriste ni dondro leyi yifambelanaka ni vukhongoti,

⁴lweyo i wa kutikukumuxa, na angativi ntxhumu, kambe ani mavabyi ya kurandra a kuphikisana ni timholova mayelano ni maritu, lawa ku wone kuhumaka a xikwele, ni timholova, ni swifingeto, ni kulumbetana hi swakubiha,

⁵ni kuvulavulisana ka kuka kungagami, ka vhanu va miyanakanyu ya kusomboloka, lava vatipfumalisiki a xihlayelamfuri, vapimisaka leswaku a vukhongoti i bindru.

⁶Kambe kunene, a vukhongoti kun'we ni kutrhava i bindru drikulu.

⁷Leswi-ke hingatangakiki na ntxhumu amisaveni, hiswoswo-ke ahina kuteka ntxhumu loko hisuka ku yone.

⁸Kambe loko hini swakuda ni swakuyambala, leswo aswihiyanele.

⁹Kambe lava vadjulaka a vupfundri, vawela andringweni ni le ntlhan'wini, ni le kunaveleni kunyingi ka vusinge, loku kuhonaka, loku kunyuvetaka a vhanu akusuveni ni le kuhohlokeni.

¹⁰Hikusa a kurandra ka mali i mutru wa hinkwaswu leswi swakubiha; van'we, hi kunavela koloko, vafulareli a kupfumela, kutani vatitlhavi timbilu tavu hi mahlomulu manyingi.

¹¹Kambe wene, mhunu wa Xikwembu Nkulukumba, tingawula a mintxhumu yoleyo; uva udjuletela a kululama, ni vukhongoti, ni vupfumeli, ni lirandru, ni kutiyisela, ni kunabyala.

¹²Lwana a yimpi leyinene ya vupfumeli, utikhomela a vutomi lebyi byingahelikiki, lebyi uvitaneliwiki byone, uviki ubyihlaya hi kutihlaya loku kunene amahlweni ka timboni letinyingi.

¹³Nakutratriya amahlweni ka Xikwembu Nkulukumba lweyi ahanyisaka hinkwaswu, ni le ku Kriste Yesu, lweyi amahlweni ka Ponciu Pilatu, abekiki a vumboni bya kutihlaya loku kunene,

¹⁴leswaku ubekisa a leleto drakuxwenga, uva lweyi angasolekiki kukondra kuvonekisiwa Hosi yeru Yesu Kriste,

¹⁵loku atakakukombisa aminkameni leyi mibekisiwiki, ha Yene ntsena n'winyi lweyi ankhensekaka, Hosi ya tihosi, n'winyi wa vinyi;

¹⁶yene ntsena angani kuka-kufa; lweyi atrhamaka alivaningweni ledri dringalikina kutrhindrekeleliwa; lweyi angasamiki avoniwa hi mhunu, mfuri ni mun'we mhunu angamuvonaka. Ku yene akuveni xihluwa ni ntamu lowu wungahelikiki. Amen.

¹⁷Tratriya a vafuyi va minkama leyi leswaku vangatikulisi, ni leswaku vangabeki a kudumba kwavu ku vukosi lebyi byingatiyikiki; kambe ku Xikwembu Nkulukumba lweyi ahinyikaka hinkwaswu hi kuyandra, akuva hikuma a kutrhava;

¹⁸ni leswaku vayentxa leswinene, vava swipfundri hi mintiro leminene, vavani nkhinkhi akuhananeni, vava vanabyala akuva vayavela a swavu;

¹⁹vatihlengeletela vukosi byinene, lebyi byinga masungulo lawa matiyiki ya minkama leyi mitaka, leswaku vatakuma a vutomi lebyi byinene.

²⁰Ke we' Timotewu, bekisa leswi swibekiwiki ku wene hi kudumbeka, udrela a swivula-vula swakuka-ndlela ni swakusandra, ni kukanetana ka kutiva loku kuhlayisiwaka xiswoswo na kungali kutiva;

²¹hikusa van'we hi kulandra a kutiva koloko, vafulareli a vupfumeli. A timpswalu ative na n'wine.