Read ronga II Tmt 2 Bible Online

II Tmt 2 - ronga bible

II Tmt 2

¹Wene ke, n'wananga, vana ni kutiya avumbilwini lebyi nga ku Kriste Yesu.

²Ni leswi uswiyingeliki ku mine amahlweni ka timboni letinyingi, swibeke ku vhanu lava kudumbeka, akuva vatadondrisa van'wana.

³Xaniseka kun'we na mine swanga hi musotxha lweyi munene wa Kriste Yesu.

⁴Akuna musotxha lweyi loko aya yimpini atikarataka hi mintxhumu ya vutomi lebyi, hikusa a kunavela kwake i kuyingiseta lweyi amuhlomisiki.

⁵Kambe a mutlangi wa ntlangu wakusiyasiyisana anganyikiwi ngiyana loko angahumelelanga hi nawu.

⁶A mutrhoveli lweyi atiraka afanele akuva lweyi a rangaka akuma mihandru ya nyuku wakwe.

⁷Yanakanya leswi ni kubyelaka; hikusa Hosi yita kunyika kutlhariha atimhakeni hinkwatu.

⁸Drimuka Yesu Kriste, lwanga pfuka kufeni, wa lixaka dra Davida, hilaha nihlayaka ha kone a Ivhangeleni yanga,

⁹Ivangeli leyi ni bohiwiki ha yone swanga ni nsulavoya; kambe a ritu dra Xikwembu Nkulukumba drone adri bohiwanga.

¹⁰Hi swoswo ni tiyisela ku hinkwaswu hinkonta ya lava vahlawuliwiki, akuva na vone vakuma kuhuluka loku kunga ku Kriste Yesu, kun'we ni kuphatima loku kungahelikiki.

¹¹Aritu ledri dritiyile ledri driliki: Loko hi fi kun'we na Yene, na kone hita hanya kun'we na Yene.

¹² Loko hitiyisela na hine hita fuma na Yene; loko himulandrula, na Yene ata hilandrula.

¹³Loko hingapfumeli, yene atatrhama na adumbekile, hikuva angaswikoti kutilandrula Yene.

¹⁴Valeleti hinkwavu a mintxhumu leyi. Ubeka vumboni mahlweni ya Xikwembu Nkulukumba, akuva vangatilwisana hi maritu, leswingapfunikiki ntxhumu, swakuhambukisa lava vaswiyingelaka.

¹⁵Djulisisa kutivonekisa mahlweni ka Xikwembu Nkulukumba uva lweyi wa kukhenseka, a mutiri lweyi angeke na tingana, lweyi areraka ritu dra Xikwembu Nkulukumba hi kululama.

¹⁶Kambe tingawula maritu lawa yakusandra ya kuka ndlela, hikuva lava vahlayaka swone vatayengetela akuka vangapfumeli.

¹⁷Kutlula leswo, na wo maritu yavu matapfundra kufana ni xilondra; amakari kwavu kuna Himenewu na Fileto.

¹⁸Lava vahambukiki xihlayelamfurini, vahlaya leswaku akupfuka ka vakufa kuhundri khale, vadlaya kupfumela ka van'wana.

¹⁹Nambi swilitanu, amasungulo lawa yakutiya ya Xikwembu Nkulukumba mahayimile, na mali ni nfungo lowu waku: a Hosi yitiva lava vanga va yone; ni leswaku lava vavitanaka vito dra Hosi, avatravukanisa ni leswakubiha.

²⁰Kambe andlwini ya lifuyu, akuna ni swibya swa gole ni silivhela ntsena, na kone swikone ni swibya swaku vatliwa ni swavumba; a swin'we swini ntiro wa lisima ni swin'wana ntiro lowu wutrongo.

²¹Ke, loko mhunu atinhlampswa ku swihoxo leswo, atava xibya xa ntiro lowu wa hombe, lexi xixwengisiwiki, lexi pfunaka swinene n'winyi wa xone, lexi bekeliwiki mintiro hinkwayu le minene.

²²Kambe trutrumela kule ni swinavelo swalava vampswha, ulandra kululama, ni kupfumela, ni lirandru, ni kurula, kun'we ni lava tivitanelaka Hosi hi timbilu leti ta kubasa.

²³Tivonele a swivutisweni swavusinge leswi swingadondrisikiki ntxhumu, uswitivaka leswaku swivanga kulwa.

²⁴Kambe a swifanekeli leswaku a nandra wa Hosi ava ni kulwa, avi ni vumbilu kuhinkwavu, ava lweyi ativaka kudondrisa, a lehisa mbilu.

²⁵A dondrisa avakaneti vakwe hi kunabyala akuva kumbe xana Xikwembu Nkulukumba angavanyika kundruluka, vativa ni xihlayelamfuri,

²⁶vatabuyela kutlhariheni, akuva vatihuluxa a ntlhan'weni wa Diyavulosi, volava vangaphasiwa hi yene, akuva vayentxa kurandra kwake.