Read ronga II Tmt 3 Bible Online

II Tmt 3 - ronga bible

II Tmt 3

¹Kambe switive leswaku amasikwini ya vugamu, kutatlhasa minkama leyi yakunono'hwa,

²hikusa a vhanu vatava vatirandri, a varandri va mali, lava vatidumbaka, lava vatikulisaka, a vasandri, lava vakuka vanga yingiseti a vapswali vavu, lava vangativikiki kutlangela, lava vangeke na kukhongota,

³lava vapfumalaka lirandru, lava vangadumbekikiki, lava vakulumbeta, lava vangativikiki kutikhoma, lava vakulebya, lava vangarandrikiki leswinene;

⁴avawongi, avahlundruki, lava vatikukumuxaka, lava varandraka kutitrhavisa vangarandrikiki Xikwembu Nkulukumba,

⁵lava vangani xiyimu xa vukhongoti kasi valandruli ntamu wa byone; trhindreka kule ni vhanu lavo.

⁶Hikusa a makari kwavu kuni lava vanhingenaka atindlwini, vahambukisa a vavasati lava bindriwaka hi swihono, lava fambisiwaka hi kunavela lokakutala.

⁷Volavo vadondra minkama hinkwayu, kambe avatlhasi akutiveni ka xihlayelamfuri.

⁸Swanga hileswi Yani na Yambre vanga kanetana na Moxe, vatanu na vo vhanu lavo, vatiyentxa vakaneti vaxihlayelamfuri, vanga vhanu lava vaboliki kuyanakanyeni kwavu, lava vakuka ndlela kupfumeleni;

⁹kambe vangaye mahlweni hikusa vusinge byavu byita voneka mahlweni ka hinkwavu, swanga hi leswi a bya lavo vabiri byingavoneka.

¹⁰Kambe wene unilandrisisi adondrweni yanga, ni le mahanyeleni, ni le makungwini, ni le kupfumeleni, ni le kunabyaleni, ni le lirandrwini, ni le kutiyiseleni.

¹¹ Ni le kuhlotiweni, ni le tinxanisweni, leswinga ni humelela Antiyokiya, ni le Ikoniya, ni le Listra; tinga tinxanisa leti ningativa tone; kambe Hosi yini huluxile ku tone hinkwatu.

¹²Mfuri hinkwavu lava randraka kuhanya hi vukhongoti ku Kriste Yesu, vata xanisiwa.

¹³A vhanu lava vanfani ni vakanganyisi vahaya mahlweni avubihini; va kanganyisa, na vone vakanganyisiwa.

¹⁴Kambe wene trhama ku leswi udondriki swone, ni leswi utiyisiwiki ku swone, utiva lweyi uswidondriki ku yene.

¹⁵Ni leswaku wa mativi nawehentrongo, a Matralwa ya Kuxwenga, lawa manga ni ntamu waku kutlharihisa, ukota uhuluxiwa hi kupfumela loku kunga ku Kriste Yesu.

¹⁶A Matralwa hinkwawu lawa mahuhuteliwiki hi Xikwembu Nkulukumba malulameli kudondrisa, ni kukholwisa, ni kubusetela, ni kululeka akululameni,

¹⁷akuva a mutireli wa Xikwembu Nkulukumba ava lweyi ahetisekiki, abekiseliwa mintiro leminene hinkwayu.