Read ronga Tit 1 Bible Online

Tit 1 - ronga bible

Tit 1

¹Mine Pawulosi nandra wa Xikwembu Nkulukumba ni mupostola wa Kriste Yesu, hi kulandra a ntiro wa kupfumela ka vahlawuliwa va Xikwembu Nkulukumba ni kutiva a xihlayelamfuri lexi xifambelanaka ni vukhongoti,

²akulaviseleni ka vutomi lebyingahelikiki, lebyi Xikwembu Nkulukumba lweyi angahembiki abyidumbisiki na minkama mingasinava kone,

³mfuri avonekisiki, hi minkama leyi mifaneliki, a ritu drakwe, ledri nirwexiwiki a kudrirera, hi kuleleta ka Xikwembu Nkulukumba, Muhuluxi weru,

⁴ku Tito n'wananga hi ntshima kupfumeleni loku kunga ka hinkweru, timpswalu ni kurula, swipfaka ku Xikwembu Nkulukumba Tatana ni le ku Kriste Yesu, Muhuluxi weru.

⁵Leswi nikusiyeliki swone a Kreta hileswaku ululamisa leswi swisaliki, ni kubeka a vakulu-va-kereke amitaneni hinkwayu swanga hi leswi nikuleletisiki xiswone:

⁶Loko kuni lweyi angeke na kusoliwa, nuna wa nsati mun'we, angani vana lava vanga vapfumeli, lava vangafaneliki kurambeliwa hi mahanyela ya kubiha, kumbe hi kutiyalisa.

⁷Hikuva kudjuleka leswaku a bixopo ava lweyi angekena kusoliwa, swanga mulaviseli wa mintxhumu ya Xikwembu Nkulukumba, angavi wa kutikulisa, angavi wa mahlundru, angatinyiketeli kunweni, angavi wa kulebya, kumbe wa kurandra a mabindru,

⁸kambe ave murureli wa vayeni, ava mhunu wa hombe, wa kutlhariha, murandri wa leswinene, akotaka kutikhoma, mululami, wa kuxwenga, arandraka a kulandra a nawu,

⁹anamarelaka aritwini ledri dra kudumbeka ledri drifambelanaka ni dondro, akuva akota a kutiyisa hi dondro leyinene, ni kukholwisa a vakaneti.

¹⁰Hikuva kuna vanyingi lava vakutiyalisa, vakhaneli va swakuka-ndlela ni vakanganyisi, ngopfu-ngopfu lava vapfaka ku lava va kusoka,

¹¹lava kudjulekaka leswaku vamiyelisiwa, vafambaka vahohlota a mindangu ya kutala, hi kudondrisa leswi swingafanekeliki, hi kudjula a mabindru ya kusomboloka.

¹²Mun'we ku vone, muprofeta wavu, ate: Va-Kreta va madrimi minkama hinkwayu, swivandra swa nhova, malolo ya kuyanakanyaka swakuda ntsena.

¹³A vumboni lebyi byitiyisile; hi kola ka leswo, utavakawuka hi ntamu, akuva vahanya akupfumeleni,

¹⁴vangayingiseti swihitana swa va-Yuda, ni milawu ya vhanu lava vafulareliki a xihlayelamfuri.

¹⁵Hinkwaswu swibasile ku lava vabasiki, kambe ku lava vanyamiki ni lava vangapfumelikiki, akuna lexi xibasiki hikusa akuyanakanya kwavu ni lipfalu dravu swinyamisiwile.

¹⁶Vone vali vamutiva Xikwembu Nkulukumba, na kasi vamulandrula hi mintiro yavu. I vamfani ni vakutiyalisa, vangakotikiki ntxhumu amintirweni hinkwayu leminene.