Read ronga Tit 2 Bible Online

Tit 2 - ronga bible

Tit 2

¹Kambe wene, hlaya leswi swifanelaka ni dondro leyi yinene.

²A vavanuna lavakulu ngopfu, avave lava vatxhavisekaka, vatikhomaka, vatiyiki akupfumeleni, alirandrwini, ni le kulehiseni ka mbilu;

³xiswoswo na vone a vavasati lava vakuliki ngopfu, avave ni mahanyela la makhensekaka, vangave va mahlevo kumbe swikarawa swa byala, kambe vava vadondrisi va leswi swinene,

⁴akuva vadondrisa a vavasati lava vampswha a kurandra vanuna vavu, ni kurandra a vana vavu,

⁵vava lava vatikhomaka, lava vabasiki atimbilwini, vabekisaka ha hombe a mindangu yavu, lava vayingisetaka a vanuna vavu, akuva a ritu dra Xikwembu Nkulukumba dringahlayeliwi kubiha.

⁶Tratriya na vone lava vampswha leswaku vatikhoma;

⁷ku mintxhumu hinkwayu, na wene utikombisa swanga xikombiso amintirweni leminene; akudondriseni, vana lweyi angasolekiki mfuri afanekelaka hi xihluwa,

⁸uvani ritu ledri dritiyiki, ledri dringafanekeliki kusoliwa, akuva a mukaneti avani tingana, angavina ntxhumu xa kubiha angaxihlayaka ha hine.

⁹Tratriya swikarawa leswaku swiyingiseta a vinyi vaswone ku mintxhumu hinkwayu, swiva leswi switrhavisaka, na swingavi vakaneti;

¹⁰vangayivi ntxhumu, kambe avakombise a kudumbeka hinkwaku, akuva ku mintxhumu hinkwayu vatavonekisa a kuxonga ka dondro ya Xikwembu Nkulukumba, Muhuluxi weru.

¹¹Hikusa kuvonekisiwi a timpswalu ta Xikwembu Nkulukumba leti tihuluxaka a vhanu hinkwavu,

¹²tihidondrisaka leswaku hidrela vusandri ni kutrika kunavela ka misava leyi, akuva hihanya hi kutikhoma, vululami, ni hi vukhongoti, ankameni lowu,

¹³na hilavisela a kudumba loku kukhensekaka, ni kutikombisa ka kuphatima kukulu ka Xikwembu Nkulukumba ni Muhuluxi weru Yesu Kriste,

¹⁴lweyi atinyikeliki ha vuswake hi kola kweru, akuva ahitirula ku vusomboloki hinkwabyu, ava atibasisela a ntalu wa vhanu lava vanga vakwe ntsena, lava vakukhinyela ku mintiro leminene

¹⁵Hlaya a mintxhumu leyi na utratriya uva ukawuka hi ntamu hinkwawu; kungavi na mhunu lweyi akudrelaka.