Read ronga Heb 10 Bible Online

Heb 10 - ronga bible

Heb 10

¹Ke, leswi a nawu wungani ntrhuti wa matovoko lawa mataka, na kungeke xifaniso xa kuhetiseka xa timhaka, wa hluleka kuhetisisa ni siku ni drin'we, lava trhindrekelaka hi timhamba, leti tekisaka kutisiwa lembe drin'wana ni drin'wana.

²Hikuva loko afa wuswikotile, xana magandrelo amangatiyima kuhumexiwa xana? Hikusa lava vagandreli, loko afa vabasisiwile hiku hetiseka, ana vatitwa vangena swidoho!

³Kutani, a timhambeni leto kunani kudrimuxiwa swidoho malembe hinkwawu.

⁴Hikusa aswikoteki leswaku a ngati ya tinkunzi ni ya swiphongo yi drivalela swidoho.

⁵Hileswo-ke hi kuta misaveni leyi, ati: A wurandranga switlhavelo nambi swinyiko, kambe univumbi niva miri.

⁶A wutrhavelanga kunyikiwa swihari swakuhisiwa henhla ka xiluvelo, nambi switlhavelo swakudrivalela swidoho.

⁷Kolahu mine ni ti: Vona, nata akuva nita yentxa kurandra kwaku we Xikwembu Nkulukumba!

⁸Na ahlayile kusunguleni aku: Awudjulanga switlhavelo ni timhamba, nambi ta kuhiseliwa swidoho, a wu swirandranga, mfuri a wutrhavelanga leswi swihumexiwaka hi kulandra nawu.

⁹Ntrhaku ayengeti aku: Vona, nata akuva nita yentxa kurandra kwaku Xikwembu Nkulukumba. Susa swakusungula u beka swa vubiri.

¹⁰Hikusa akurandreni kwake koloko, hine ha xwengisiwile kan'we, hiku humexeliwa ka miri ya Yesu Kriste.

¹¹Kasi hinkwavu vaprista vayimile, vagandrela siku drin'wana ni drin'wana, atekisa kuhumexa timhamba tin'we leti hlulekaka kususa swidoho ni siku ni drin'we.

¹²Kambe Yesu loko ahumexi mhamba yin'we ntsena hinkonta ya swihono hi laha kungahelikiki, ali kuya trhamisa avokweni dra xinene dra Xikwembu Nkulukumba.

¹³Akusukela lahu Yene a rindrela kukondra valala vakwe vabekiwa a vunalavutelweni bya minkondro yake.

¹⁴Hikusa ha mhamba yin'we e kuhetisisa hilaha kungahelikiki lava vahlawulekisiwiki.

¹⁵Kambe na wone Moya wa Kuxwenga wu hi bekela vumboni bya swone loko wute:

¹⁶Lexi hi xipfumelelanu lexi nitaka xiyentxa navu antrhaku ka masiku wolawo kuhlaya Hosi: Nita beka milawu yanga a timbilwini tavu, nitatrala amiyanakanywini yavu.

¹⁷Wu yengesa wuku: A swidoho swavu ni swihoxo swavu, ningaka ningaha swidrimuki hi laha kungahelikiki.

¹⁸Kambe lomu kungani kudrivaleliwa, a ke he na kuhumexiwa ka mhamba hinkonta ya swidoho.

¹⁹Hileswo-ke, vamakweru, hinani kudumba ka kunhingena ambangwini wa kuxwenga, hikola ka ngati ya Yesu.

²⁰Hindlela leyi yimpswha leyi hanyaka, leyi Yene ahi katekisiki ha yone ya kuhundrela mahlweni ka xixirelo, hileswaku ndlela ya nyama yake,

²¹ni leswi hinga ni muprista lwenkulu, mufumi wa yindlu ya Xikwembu Nkulukumba.

²²A hitrhindrekeleni hi mbilu leyi nene, ni hi kupfumela loku tiyiki, na hili ni timbilu leti tibasisiwiki, ni kubasisiwa lipfalu ledri nfani, ledri n'winhlampsiki hi mati lawa ya kubasa.

²³Ahi bekiseni hi kutiya kutihlaya ka kulavisela kweru, hikusa lweyi anga ahi dumbisa awa dumbeka na Yene.

²⁴Hiva hi yanakanyana van'we ku van'wana, hi kutxetelana lirandrwini ni le mintirweni leminene.

²⁵Hingatriki tinhlengeletanu teru, swanga hileswi van'wana vaswitoloveliki, kambe hi khongotelana van'we ku van'wana, ngopfu na swone, loko n'wivona leswaku a siku ledriya dra trhindrekela.

²⁶Hikusa loko hi doha ha vomu, ntrhaku ka kuva hi yamukeli a kutiva ka xihlayelamfuri, a kahalina mhamba ya kususa swidoho.

²⁷Kambe kusali ntsena kurindrela loku kutxhavisaka ka kuyavanyisiwa ni vukari lebyi byipfuraka loku kutaka hisa valala.

²⁸Loko mhunu atluli Nawu wa Moxe, a tremeliwa lifu na kungehena kutretrelela, hi vumboni bya vabiri, kumbe vararu.

²⁹Xana n'wili atafanekeliwa hi kubiwa lokukulu loku kutlulaka swaku nhati, lweyi a kandreteliki N'wana wa Xikwembu Nkulukumba! Lweyi ahlayiki leswaku a ngati ya xipfumelelanu leyi a xwengisiwiki ha yone a hi ntxhumu, lweyi a sandriki Moya wa timpswalu?

³⁰Hikusa ha mutiva swinene lweyi anga hlaya aku: Kudrihisa i kwanga; Hi mine nitakavatlhelisela, Nangweso a Hosi yili: Hosi yi ta yavanyisa tiko dra yone.

³¹Aswakutxhavisa i kuwela mandleni ya Xikwembu Nkulukumba lweyi a hanyaka.

³²Drimukani-ke, masiku lawa makhalutiki, lawa ntrhaku kakuva n'wivaningeliwile, mitiyiselile kulweni lokukulu ni mahlomulo.

³³Hi tlhelo drin'wana n'wihlalelisiwile a livaleni hi swisandru ni hi tinxanisa; hi tlhelo drin'wana n'wavi lava vatlhanganaka ni lava vahanyisaka xiswoswo.

³⁴Hikusa mavi lava tretreleliki vabohiwa; na kone n'wiyamukelile hi kutrhava kuwutleliwa leswi afaka n'wili naswu, na n'witiva leswaku, n'wini nhlengwe a Matilweni leyi tlulaka, leyi trhamaka hi minkama hinkwayu.

³⁵Hileswo-ke, n'winga vidrela kudumba kwenu, loko kungani hakelo ledri drikulu.

³⁶Hikusa swadjuleka n'wiva ni kutiyisela, akuva loko n'witava n'wiyentxile kurandra ka Xikwembu Nkulukumba, n'wikuma leswi n'widumbisiwiki swone.

³⁷Hikusa kaha sali nkamanyana, lweyi ataka, atata, angaka angahlweli mfuri.

³⁸Kambe mululami wanga atahanya hi kupfumela; na kone loko a tlhelela ntrhaku, a moya wanga awu mutrhaveli.

³⁹Kambe loko hi li hine, ahi lava tlhelelaka ntrhaku akusuveni, kambe hi lava vatiyaka akupfumeleni loku kutakahiyisa kubekisekeni ka hika dreru.