Read ronga Heb 11 Bible Online

Heb 11 - ronga bible

Heb 11

¹A kupfumela i xitiyiso xa leswi laviseliwaka, ni xikholwiso xa mintxhumu leyi minga voniwikiki.

²Hikusa ha kone kupfumela lava khale vakumi vumboni lebyinene.

³Hikupfumela, hitiva leswaku a tilo ni misava switumbuluxiwile hi ritu dra Xikwembu Nkulukumba, hikuva leswi swivoniwaka swiyentxiwile hi leswinga voniwikiki.

⁴ Hikupfumela Abele a humexeli Xikwembu Nkulukumba a mhamba leyi yitlulaka ya Kayini. Hikola kaleswo, a bekeliwile vumboni bya leswaku i mululami, Xikwembu Nkulukumba a mubekela vumboni bya minhlengo yake, hinkonta ya kupfumela loku, aha vulavula nambi a file.

⁵Hikupfumela, Enoke a tekeliwi henhla akuva anga voni kufa. Kutani angaha kumiwanga, hikusa Xikwembu Nkulukumba afa amutekeli ku yene; hikusa loko anga sina tekeliwa henhla, akumi kuhlayeliwa vumboni bya leswaku atrhavise Xikwembu Nkulukumba.

⁶Kambe a handle ka kupfumela, a swikoteki kutrhavisa Xikwembu Nkulukumba, hikusa swifanekela lweyi a trhindrekelaka ku Xikwembu Nkulukumba akholwa leswaku a kone, hi Yene ahakelaka lava vamudjulaka.

⁷Hikupfumela, Nowa ali kutivisiwa hi Xikwembu Nkulukumba leti afaka tingasi voniwa, kutani a txhava ayaka ngalawa, akuva ata huluka yene ni yindlu yake ku yone, hi ndlela leyi a yavanyisa misava, kutani amuyentxi ava mudi wapfindla dra kululama hikola ka kupfumela.

⁸ Hi kupfumela Abrahamu ayingiseti loko avitaniwile akuva, kutani asuki atiyela atikweni ledri afaka atanyikiwa drone swanga pfindla. Asuki a famba na angakutivi lomu ayaka kone.

⁹Hi kupfumela ayi trhamisa swanga muluveli atikweni dra xidumbiso, swanga hi loko drili tiko dravambe, atrhamisi mintrongeni kun'we na Yisaki na Yakobe a vadi-kulobye va pfindla dra xidumbiso.

¹⁰Hikusa afa alavisela muti lowu wungani masungulo, lowu mululamisi ni muyaki anga Xikwembu Nkulukumba.

¹¹ Hikupfumela na yene Sara, akumile ntamu wakuva ni nyimba, ava abeleka nambi loko aduhwalile ngopfu, hikusa afa ali ni kudumba ku lweyi afaka amudumbisile.

¹²Hileswo ha wanuna mun'we lweyi afaka ingi hi loko a file, kupswaliwi vana vanyingi ngopfu, vakuva swanga tinyeleti ta tilo, swanga hi tinhleke ta sava ledri dringa nkingeni wa likhulu.

¹³Hinkwavu vhanu lava vafile a kupfumeleni, na vangasangana yamukela a swidumbiso, kambe va swivonile na vali hi le kule, vakholwile ku swone, afa vatiyisa leswaku i valuveli ni vayendri lana misaveni.

¹⁴Hikusa lava vakhanelisaka xileswi vakombisa leswaku vafamba vadjula tiko.

¹⁵Ke, loko kunene, afa vadrimukile tiko ledri afaka vahumile kudrone, afa i na vakumile ndjombo ya kutlhelela kone.

¹⁶Kambe swoswi, vahlunyela tiko ledri yampswaka, hileswaku ledri drale tilweni. Hikolahu kaleswo, Xikwembu Nkulukumba angana tingana hikola kwavu, hikutivitana Xikwembu Nkulukumba wavu, hikusa ava bekiselile muti.

¹⁷Hi kupfumela Abrahamu hi kukambiwa a nyiketi Yisaki akuva mhamba, im'na, lweyi ayamukeliki aswidumbiso anyikelile a n'wanakwe lweyi wakuva mun'we!

¹⁸ Loko kuhlayiwile ha yene: Ku Yisaki a mbewu yaku, yitatxhuliwa hi vito draku.

¹⁹Hikusa afa apimisa leswaku: Xikwembu Nkulukumba i nyamintamu waku, nambi ku vafi atamupfuxa. Ni hi ndlela ya kukari, na kone mfuri, atlhela hi xifaniso amuyamukela.

²⁰Hikupfumela, Yisaki akatekisile vana vakwe Yakobe na Esawu, hi kuvahlayela leswi switakava kone amahlweni.

²¹ Hi kupfumela, Yakobe loko ali kusuhi ni kufa, akatekisile mun'wana-ni-mun'wana wa vana va, Yosefa; kutani atiseketeli hi yinhla ya nhonga yake, agandrela.

²²Hi kupfumela Yosefa, na ali kusuhi ni kufa, akhaneli mhaka ya kuhuma ka va-Israyele a Egipta, kutani avaleleta mhaka ya marambu yake.

²³Hi kupfumela, avapswali va Moxe, na ahali kupswaliwa, afihliwa ha tihweti tiraru hi vapswali vakwe, hikusa vamu vonile leswaku i ndrisanyana wa kuxonga; avatxhavanga a leleto dra mufumi.

²⁴Hi kupfumela, Moxe, loko andruluki wanuna ayali kuvitaniwa n'wana wa n'wana waxisati wa Faro.

²⁵Atihlawulela kuxaniseka kun'we ni tiko dra Xikwembu Nkulukumba, kutlhula kuva ni kunyoxa ka xidoho hi nkamanyana.

²⁶Apimisa leswaku akusandriwa ku Kriste i vupfundri lebyitlulaka nhlengwe ya le Egipta. Hikusa afa a langusela kutlheliseliwa.

²⁷ Hi kupfumela, Moxe, asuki Egipta, angatxhavanga mahlundru ya mufumi. Avi lweyi a tiyiki swanga hi loko a vona lweyi angavoniwikiki.

²⁸Hi kupfumela, a yentxi nkhuvu wa Pasika ni kuxuva hi ngati akuva a ntrumi ya vuhelisi yinga khumbi mativula ya vana va-Israyele.

²⁹ Hi kupfumela, va-Israyele va wela lwandle dra Libungu swanga hi lomu kuwomiki. Loko va Egipta vadringisa, kuyentxa vanyuvela vafa.

³⁰Hi kupfumela, a makhumbi ya Yeriko mawisiwile, loko matingawuteliwile ha ntlhanu wa masiku na mabiri.

³¹Hikupfumela, Rahabi nsati wa vumbuye anga fanga kun'we ni lava vaviki vakaneti, leswi angayamukela tinhloli tava Heberu.

³²Na hatahlaya yini ke? Hikusa afa nita heleliwa hi nkama, loko ni tlhamuxela ni ta Gidiyoni, ni ta vaprofeta.

³³Lava hi kupfumela, vangahlula mifumu, vayentxi vululami, kutani vakumi swidumbiso, vapfali minomu ya tindrawu,

³⁴vatimiki a ntamu wa ndrilo, vahulukile kudlawa hi lipanga, vakumi ntamu na vali ni gome, vatihitile akulweni, kutani vahlongolisi tiyimpi ta va-Matiko.

³⁵Hikupfumela, na vone vavasati vayamukelile a vafi vavu lava vapfuxiwiki kufeni; kambe a van'wana vaxanisiwile, vanga pfumeli kuntrhunxiwa, akuva vakuma kupfuka kufeni lokunene.

³⁶Avan'wana vakumi ndringo hi kuhlekiwa, ni kubiwa hi swisepu, van'wana hi mapindra ni kupfaleliwa bohelweni.

³⁷ Vakhandliwa hi maribye, vasahiwile hi le makari ni kudlawa hi lipanga, afa vafamba-famba hinkwaku, na vayambali swikhumba swa tihamba ni swa timbuti, vali ni vusweti, vaxaniseka, vatwisiwa kuvaviseka.

³⁸Vhanu lava misava afa mingavafanekelanga, afa vayingayinga tinhaveni, ni le mahuleni ni kutrhama timhakweni, ni le makheleni lawa makeliwiki misaveni.

³⁹Kambe hinkwavu lavo, afa vavi ni vumboni byakupfumela kwavu, nambi swilitanu ni mun'we angayamukelanga swidumbiso,

⁴⁰hileswaku Xikwembu Nkulukumba afa ahidjuleli ntxhumu wa kuyampswa, akuva vone, vayentxiwa va kuhetiseka, na hingavanga kone kun'we na vone.