Read ronga Heb 12 Bible Online

Heb 12 - ronga bible

Heb 12

¹Hileswo-ke, na hine leswi hi trandreliwaka hi tlavi ledrikulu dra timboni, kolahu, ahitrhikeni a ntrhwalu wini ni wini lowu wuhisivelaka, ni xidoho lexi xitekisaka kuhinamarela hi trutruma hi kutiyisela, hi heta mpfuka lowu hi bekeliwiki wone.

²Na hi lavisa ku Yesu hikutiya, amuvangi ni muhetisisi wa kupfumela, lweyi hi kunyoxa loku abekeliwiki kone atiyiseliki xihambanwini, adrela tingana ta xone, swoswi atrhami xineneni xa xiluvelo xa Xikwembu Nkulukumba.

³Yanakanyani ha yene lweyi a tiyiseliki hi ndlela leyo, loko vadohi vamukaneta, akuva n'winga trani mahikeni yenu, nambi kuhela timbilu.

⁴Hikuva ayimpini yenu ni xidoho, an'wisanganalwa n'wikondra n'wihuma ngati,

⁵Hi leswaku n'widrivalile a maritu ya mintratriyo, lawa ha wone n'wivitiwaka swanga vana? N'wananga, unga dreli kulaya ka Hosi. Unga heli ntamu, loko yone yi kusola.

⁶Hileswaku a Hosi yilaya lava yi varandraka, ni kukhata lava yi vayamukelaka swanga vana.

⁷Loko n'witibeka hansi aku khatiweni, Xikwembu Nkulukumba an'wibekisa swanga vana; xana, hi wini n'wana lweyi a tatana wakwe anga mulayikiki?

⁸Kambe loko n'wingakhatisiwi hikukhatisiwa loku hinkwavu vangayaveliwa kone, kolahu, an'wivana, n'wivavumbuye.

⁹Nangweso, have ni vatatana veru vanyama lava afaka vahilaya, kutani hine have ni xitxhavu. Xana ngopfu-ngopfu kolahu hingaka hingatibeki hansi ka Tatana weru a Moyeni, akuva hitahanya?

¹⁰Hikusa loko vali vone, vahilayile hinkamanyana, hi laha afaka vaswivona ha kone. Kambe Yene, ahilaya akuva hipfuneka, akuva hitata yaveliwa akuxwenga kwake.

¹¹Ha kunene, akulaya hinkwaku ka swoswi, akuvoniwi na kutrhavisa, loko angali ka kuvaviseka, kambe antrhaku kupswala mihandru leminene ya kululama, ku lava vadondrisiwiki ha kone.

¹²Hileswo-ke tiyisani mavoko lawa makaraliki! Ni matrolo lawa mangundrangundraka!

¹³Nakone yentxelani minenge yenu atindlela leti takululama, akuva lweyi a khutaka angatitxhuka asuleka kambe aholisiwa.

¹⁴Djulani kurulisana ni hinkwavu, ni kutixwengisa, handle ka leswo, akuna mhunu angaswikotaka kuvona Hosi,

¹⁵ na n'witivona leswaku kungativa na mhunu lweyi atitronaka timpswalu ta Xikwembu Nkulukumba; mfuri kungavinamutru wa kubava wu milaka henhla, kutani wun'wipfilunganyisa, leswaku ha wone kuhoneka lavanyingi.

¹⁶Kungavi kone makari kwenu vhanu va vumbuye, nambi musandri, kufana na Esawu, lweyi angaxavisa a vunhondrwa byake hi mbenga mun'we wa swakuda.

¹⁷ Hikuva n'waswitiva leswaku, loko ntrhaku atlheli adjula kuyamukela matovoko ya pfindla ku tatana wakwe, ayaleliwile; hikusa angakumanga nkama wa kundruluta matrhamela yake, nambi akombelile hi minyembeti.

¹⁸Hikusa an'witrhindrekelanga a nhaveni leyi yikhumbiwaka, leyi pfuraka ndrilo, akumphumeni, munyameni, nambi ni ku xidzedze. Vone afa vali mahlweni ka nhava leyi afaka swikoteka kuyikhumba leyi afaka yi pfura ndrilo, afaka yi fukumetiwi hi munyama hi kuhetiseka yi biwa hi xidzedze.

¹⁹Vayingeli mpfumawulo wa nanga, ni mpfumawulo wa maritu, lawa loko vamayingelile vakombeliki leswaku mangaha hlayiwi mfuri.

²⁰ Hikusa afa vahluleka kutiyisela kuyingela leswi afaka valeletiwa swone, leswaku: Nambi angava xihari lexi khumbaka nhava xitakhandliwa hi maribye.

²¹Mahlweni ka leswi afaka swihumelela kunene afa switxhavisa lakakuva Moxe abandlukana aku: na rurumela ni kutxhava!

²²Kambe loko n'wine n'witlhasile a nhaveni ya Sion, ni mutini wa Xikwembu Nkulukumba lweyi a hanyaka, a Yerusalema wa le tilweni, madzana-dzana ya tintrumi,

²³ni nhlengeletana ni Kereke dra mativula, leswitraliwiki a Matilweni, ni ku Xikwembu Nkulukumba, muyavanyisi wa vhanu hinkwavu, kun'we ni mimoya ya valulami lava vabasisiwiki,

²⁴ni ku Yesu, mutlhanganisi wa xipfumelelanu leximpswha, ni ngati ya xuvo leyi yihlayaka leti tinene kutlula ya Abele.

²⁵Tivonelani, n'wingatriki kuyingiseta lweyi a vulavulaka na n'wine! Hikusa loko vanga hulukanga lava yaliki kuyingela lweyi angava tivisa halenu misaveni, ngopfu-ngopfu hine loko hi fularela lweyi ahi mamuleliki na ali Matilweni.

²⁶Lweyi a ritu drakwe dringatrekatrekisa misava nkameni lowuya, kambe swoswi a dumbisile ava ativisa aku: Kan'we kambe na ha ta trekatrekisa, minge misava ntsena, kambe na drone tilo.

²⁷Aritu ledri draku: Kambe ha kan'we, drikombisa kususiwa ka mintxhumu leyi mitrekatrekaka, leyi miyentxiwiki khale, akuva kuta sala ntsena a mintxhumu leyi mingatrekatrekiki.

²⁸Hileswo-ke, leswi hi yamukeliki mfumu lowu wungatrekatrekiki, hi fanekela kukhensa timpswalu, leti hitirelaka hi Xikwembu Nkulukumba ha tone, hi xitxhavu hinkwaxu;

²⁹hikusa Xikwembu Nkulukumba weru i ndrilo lowu hohlotaka.