Read ronga Heb 13 Bible Online

Heb 13 - ronga bible

Heb 13

¹Yanani mahlweni n'wiva ni lirandru drawu kwavu.

²N'wingavi drivala kuyamukela vayeni, hikuva hinkonta ya kuyamukela vayendri van'we vhanu vayamukeli tintrumi na vanga switivi.

³Yanakanyani lava vanga bohelweni, swanga hi loko na n'wine n'wibohiwile kun'we na vone, ni lava vaxanisiwaka, swanga hi loko na n'wine n'wixanisiwa mirini hi kufana.

⁴A vukati abyi bekeliwi xihluwa hi vhanu hinkwavu, na byone likuku byinga nyenyentsisiwi, kambe loko vali vayentxi va vumbuye ni vuwoswi, Xikwembu Nkulukumba ata vayavanyisa.

⁵A mahanyeleni yenu n'wingavi pfumela kufumiwa hi lirandru dra mali, trhavani hi leswi n'winga naswu, hikusa Yene ate: Ningatikutrhika ni kutrongo, nambi kukusukela.

⁶Ku hikola ka leswo hinga swikotaka kuhlaya hi kutiya hiku: A Hosi hi yone leyi yinipfunaka: Anina kutxhava ntxhumu! Xana mhunu anganiyentxa yini xana?

⁷Drimukani vafambisi venu, lava van'wibyeliki ritu dra Xikwembu Nkulukumba, kupfumela kwavu n'wiva n'wivayetisa, na n'wihlalela vugamu bya vutomi byavu.

⁸Yesu Kriste i mun'we, tolo, ni namuhla ni hi laha kungahelikiki.

⁹N'winga kokiwe hi tidondro ta tinxaka-xaka, ni ta vambe, hikusa i swinene loko mbilu yitiyisiwa hi timpswalu, na kunge hi swakuda swavunandri, leswi swingatiki pfuna ntxhumu ku lava vatinyiketaka ku swone.

¹⁰Hi na ni Xiluvelo lexi avatireli va ntronga vangeke na mfanelo ya kuda ka xone.

¹¹Aswihari leswi angati ya swone yibuyisiwaka ambangwini wa kuxwenga hi muprista lwenkulu, hikola ka swidoho, a nyama ya swone yi hisiwa a handle ka magovela.

¹²Kuvi swoleswo, Yesu na yene afeliki handle ka mapangu ya muti, akuva abasisa tiko hiyo ngati yake.

¹³Hileswo-ke ahiyeni ku Yene a handle ka magovela, hi rwala xisandru xakwe.

¹⁴Hikuva, ha kunene a hina muti halenu lowu wutrhamisekiki, kambe ha djula lowu wutakava kone.

¹⁵Kolahu ke, ahiyeni mahlweni ha Yene, hi humexela switlhavelo swa lidrumu ku Xikwembu Nkulukumba, hileswaku, a mihandru ya milomu leyi mihlayaka vito drakwe.

¹⁶N'wingadrivali kuyentxa leswi swinene ni kuyavelana leswi n'winga naswu van'we ku van'wana, hikusa hikola ka switlhavelo leswo, Xikwembu Nkulukumba awatitrhavisa.

¹⁷Yingisetani vafambisi venu, n'witibeka hansi kwavu, hikusa vone va hitekela mahika yenu, swanga lava vataka vutisiwa ha wone, akuva vaswitira hi kutrhava, na vanga konyi, hikusa afa swingatin'wipfuna leswo.

¹⁸Hikhongotelani hikusa hadumba leswaku hi nilipfalu ledrinene, swanga lava va navelaka kutifambela hi kululama matlhelo hinkwawu.

¹⁹Na ni n'witratriya ngopfu leswaku n'wiyentxisa xiswoswo, akuva hiku hangwesa ni tatava na n'wine.

²⁰Kutani-ke, Xikwembu Nkulukumba wa kurula lweyi hingati ya xipfumelelanu lexi xinga helikiki, abuyisiki hi le ku vafi Hosi yeru Yesu, mubyisi lwenkulu wa tihamba

²¹an'wihetisekisi ku mintiro leminene hinkwayu, akuva n'wiyentxa kurandra kwake, ni leswaku ayentxa leswi amahlweni Yakwe leswi swimutrhavisaka ha Yesu Kriste, lweyi alidrumu dringa ku Yene hi minkama hinkwayu. Amen!

²²Na n'witratriya vamakweru, leswaku n'wilehisela mbilu ku maritu lawa ya kun'witiyisa. Hikuva nin'witralela mange mangani.

²³N'waswitiva leswaku a makweru Timotewu a ntrhunxiwile; lweyi loko a hatla ata, ni ta n'wivona kun'we na yene.

²⁴Drungulani a varangeli venu hinkwavu, ni vahlawuliwa hinkwavu. A va-le Italiya va n'widrungula na vone.

²⁵A timpswalu ative na n'wine hinkwenu. Amen!