Read ronga Heb 2 Bible Online

Heb 2 - ronga bible

Heb 2

¹Hikolahu ka leswo, hi fanekeli kuva hi bekisa hikutiya, atimhaka leti hi tiyingeliki, akuva hingatxhuki hi lahlekelana na tone.

²Ke, loko a ritu ledri dringahlayiwa hi tintrumi dritiyile, swilulamile akuyamukela khatiso hi kutlula nawu nikukala kuyingiseta.

³Ngopfu xana hine hita swikotisa kuyini kuphonyoka, loko hingahlayi ntxhumu hi huluxo ledri drikulu? Ledri afaka dritivisiwa hi Hosi. Ntrhaku dritivisiwa hi lava vadriyingeliki;

⁴Kutani Xikwembu Nkulukumba a seketeli vumboni byavu hi swikombiso ni swihlamaliso ni mahlolana, hi kuyavela tinyiko ta Moya wa Kuhlawuleka swanga hi kurandra kwake.

⁵Ha kunene Xikwembu Nkulukumba angabekanga hansi katintrumi, amisava leyi hi khanelaka ha yone, yahatakava kone.

⁶Ntrhaku, kavi ni mhunu a bekiki vumboni ku mbangu mun'we aku: We Xikwembu Nkulukumba a mhunu i yini, akuva umudrimuka xana? Kumbe n'wana wa mhunu, i yini akuva utamuyendrela xana?

⁷Umuyentxi ava ntrongo ku tintrumi, umuyambexa ngiyana ya lisima ni lidrumu, umubeki henhla ka mintiro ya mavoko yaku.

⁸Amintxhumu hinkwayu umibeki hansi ka minkondro yaku, kusukela loko Xikwembu Nkulukumba abekile mintxhumu hinkwayu hansi, akuna lexi xinga bekiwangakiki hansi kwake. Kambe swoswi ahisinavona mintxhumu hinkwayu yibekiwi hansi kwake.

⁹Hivonile na kone, lweyi hi nkamanyana ayentxiwiki lweyi ntrongo ku tintrumi, anga Yesu, hi kuxaniseka hi lifu, a yambexiwile ngiyana ya kutwala ni xitxhavu, akuva hikola ka timpswalu ta Xikwembu Nkulukumba atwisiwa kufa hinkonta ya vhanu hinkwavu.

¹⁰Hikuva afa swifanelile leswaku a lweyi a mintxhumu hinkwayu miyentxeliweliki Yene, na kone swiyentxiwiki ha Yene, loko atisa vana vanyingi akuphatimeni, ahetisekisa hi kuxaniseka, amusunguli wa huluku dravu.

¹¹Kunene, nambi ali muxwengi kumbe lava vaxwengisiwaka, vahuma ku mun'we ntsena. Hikolahu ka leswo angakhomeki tingana akuva avatxhula vamakwavu,

¹²aku: Nitakhanela hi vito draku ku vamakweru: Nita yimbelela hi tinsimu ta swidrumiso amakari ka nhlengeletanu.

¹³Nakone atlhela aku: Nita beka kudumba kwanga ku Yene. Nangweso kambe aku: Himine lwe, ni vana lava Xikwembu Nkulukumba aninyikiki vone.

¹⁴Hi leswi-ke, a vana vaniyavelo drin'we dra ngati ni nyama, e kuyavelisiwa xiswoswo na Yene, akuva hi kufa kwake atahelisa lweyi afaka ani ntamu wa kufa, anga yene Diyavulosi.

¹⁵Nikuva atantrhunxa hinkwavu lava vabohiwiki, afaka vali hansi ka vukarawa a kuhanyeni kwavu hinkwaku, hinkonta ya kutxhava kufa.

¹⁶Hikusa kunene angapfuni tintrumi, kambe ina avana va Abrahamu.

¹⁷Hileswo-ke afa swimufanelile kuyentxiwa lweyi a fanaka ni vamakwavu hi matlhelo hinkwawu, akuva avamuprista lwe nkulu, lweyi angani lirere ni kudumbeka amahlweni ya Xikwembu Nkulukumba, akuva abasisa swidoho swa vhanu.

¹⁸Hikusa kuleswi Yene hi ntshima axanisekiki, adringiwiki, ani ntamu wa kuswikota kupfunisa lava dringiwaka.