Read ronga Heb 3 Bible Online

Heb 3 - ronga bible

Heb 3

¹Hileswo-ke, vamakweru lava vahlawulekiki, n'wine n'wingavahlengeli va kuvitaniwa ka le tilweni, yanakanyani Yesu Kriste, lweyi anga mupostola wa Xikwembu Nkulukumba, ni muprista lwe nkulu wa vupfumeli lebyi hi byihlayaka,

²lweyi adumbekiki ku lweyi amubekiki swanga ha Moxe lweyi angadumbeka andlwini hinkwayu ya Xikwembu Nkulukumba.

³Hikusa Yesu ahlayiwi lweyi afanekeliwaka hi kutwalisiwa loku kutlulaka ka Moxe, swanga hi muyaki wa yindlu atlulaka yindlu hi kutxhaveka.

⁴Hikusa a yindlu yini ni yini yini muyaki wa yone; kambe amuyaki wa hinkwaswu hi Xikwembu Nkulukumba.

⁵Moxe afa adumbekile andlwini ya Xikwembu Nkulukumba swanga nandra, abeka vumboni bya leswi afaka switahlayiwa.

⁶Kambe Kriste, avi swanga n'wana lweyi anga ndlwini yake, yindlu leyi anga hine, loko hi tibekisa hikutiya kukondra kutlhasa vugamu, ni kukulisa kulavisela loku hi tikutikutxaka ha kone.

⁷Hileswo-ke, swanga hi leswi Moya wa Kuxwenga wuhlayaka wuku: Namuhla loko n'wiyingela ritu drakwe,

⁸n'wingavi nono'hwisa timbilu tenu, kufana ni leswi vatatana venu vangani pfuka, A sikwini dra ndringo le huleni,

⁹lomu vatatana venu vanga ni dringa, vani kambeta, nambi loko vavoni mintiro yanga ha mune wa makume ya malembe.

¹⁰Hileswo-ke mine ni hlundrukelile lixaka drodro niku: Lava vahona timbilwini nkama hinkwawu; na vone avativanga tindlela tanga.

¹¹Hilaha ningafunga akuhlundrukeni kwanga, niku: Vangata nhingena akuwiseni kwanga.

¹²Tivonelani vamakweru, leswaku kungavi na mhunu makari kwenu lweyi angani mbilu ya kubiha, ya kuka kupfumela, yitakafularela Xikwembu Nkulukumba lweyi ahanyaka

¹³Kambe kutlula leswo, tratriyananani siku drin'wana ni drin'wana, loko kehe siku ledri drihlayiwaka namuhla, kungatitxhuka kuva na mun'we lweyi atinonon'hwisaka hi kukanganyisiwa hi xidoho.

¹⁴Hikusa hi yentxiwile lava vangavatirikuloni na Kriste, loko kunene hitiya kutlhasa vugan'wini, a kudumba loku hi viki na kone kusunguleni.

¹⁵Nakone kuhlayiwa leswaku: Namuhla loko n'wiyingela ritu drakwe, n'winga nono'hwisi timbilu tenu, swanga swi xiswone nkameni wa xipfukelana.

¹⁶Vavi va mani lava vangaku vayingela ritu drakwe vamupfuka? Akavanga hinkwavu lava vangahuma Egipta hi kufambisiwa hi Moxe?.

¹⁷Nakone avi vamani lava anga vahlundrukela ha mune wa makume ya malembe? Xana ahi lava vangadoha, mfuri mintrumbu miweliki le huleni?

¹⁸Hi vamani nangweso lava angafunga leswaku vanga nhingeni kuwiseni kwake, loko ange ku lava vangayingisetangakiki?

¹⁹Hi vona leswaku avanhingenanga hikukala vangapfumelanga.