Read ronga Heb 4 Bible Online

Heb 4 - ronga bible

Heb 4

¹Ahitxhaveni-ke, hileswaku a xidumbiso xa kunhingena akuwiseni ka Xikwembu Nkulukumba xehe kone. Ahi tivoneleni leswaku kumbe mun'wana wenu anga txhuki akumiwi na atroniwile.

²Hikusa na hine hi yamukeli Ivangeli kufana na vone. Kambe a ritu ledri vangadriyingela adrivapfunanga ntxhumu, hikusa lava vangadriyingela ava driyamukelanga hi kupfumela.

³Hikusa hine hi pfumeliki, hi nhingena kuwiseni, swanga hi leswi Xikwembu Nkulukumba angahlaya, aku: Ni fungisi xiswoswo kuhlundrukeni kwanga niku: A vhanu lava vangata nhingena akuwiseni kwanga, nambi kutava kuheli ntiro wakwe kusukela loko avumbi misava.

⁴ Hikusa ambangwini waku kari, kutraliwile hinkonta ya siku dra ntlhanu na mabiri: Xikwembu Nkulukumba a wisi mintirweni yake hi siku dranthlanu na mabiri.

⁵Nangweso ku mbangu wolowo, vangati nhingena akuwiseni kwanga.

⁶Swanga hi leswi kusaliki van'wana kuva vanhingena kone, na kasi lava vativisiwiki a Ivangeli kusunguleni avanhingenanga hikola ka kukala kuyingiseta,

⁷atlhela a beka siku aku: namuhla, akhanela ku Davida loko kuhundrile nkama waku leha, swanga hileswi swingahlayiwa khale vaku: Namuhla loko n'wiyingela ritu drakwe, n'winganonon'hwise timbilu tenu.

⁸Loko afa Yoxuwa avanhingenisile akuwiseni, ana angakhanelanga ntrhaku ka swone, hikola ka siku drin'wana.

⁹Hikolahu ka leswo, kahasali drin'we dra Savata, dra kuwisa ku vhanu va Xikwembu Nkulukumba.

¹⁰Hikusa lweyi anhingeniki akuwiseni ka Xikwembu Nkulukumba, awisile na yene amintirweni yake, swanga ha Xikwembu Nkulukumba awisiki.

¹¹Ahikhinyeleni-ke, akunhingeneni ni kuwiseni koloko, leswaku kungavina mun'we lweyi atakawa, hi kulandra ndlela yakuka kuyingiseta.

¹²Hikusa a ritu dra Xikwembu Nkulukumba dra hanya, dri ni ntamu, dra kariha kutlula lipanga ledri drilotiwiki hi matlhelo mabiri. Drinhingena ndreni kuyatlhasa lana driyavanyisaka a hika ni moya, ni kutlhangana ka marambu ni mongo, na kone draswikota kuyavanyisa miyanakanyu ni makungu ya mbilu.

¹³Mfuri akuna xivumbiwa lexi xifihliwiki xingavonekisiwiki amahlweni kwake, kambe hinkwaswu swe dlaa, swi le livaleni, amahlweni ka lweyi hifanekelaka kutiyangulela.

¹⁴Ke, leswi hinga na Yesu, n'wana wa Xikwembu Nkulukumba, swanga muprista lwenkulu, lweyi atremakanyiki matilo, ahitiyeni akupfumeleni kweru.

¹⁵Hikusa ahi na muprista lwenkulu, angaswikotikiki kuhitretrelela gome dreru, leswi angadringiwa na Yene ku hinkwaswu kufana na hine, kambe angana xidoho.

¹⁶Ahitrhindrekeleni-ke, hi kudumba hinkwaku axiluvelweni xa timpswalu, akuva hiyamukela lirere ni timpswalu ni kukuma kupfuniwa ankameni lowu fanekelaka.