Read ronga Heb 5 Bible Online

Heb 5 - ronga bible

Heb 5

¹Hikusa muprista lwenkulu wini ni wini, ahlawuliwiki makari ka vhanu, abekiwi akuva kupfuna vhanu atimhakeni ta Xikwembu Nkulukumba, akuva atisa tinyiko kumbe switlhavelo hinkonta ya swidoho.

²Awa swikota kuyentxela vurombe lava kohlekaka ni lava hoxiki, leswi na Yene atrandreliwiki hi gome.

³Hikola ka leswo, afanela kutihumexela switlhavelo hinkonta ya swidoho swake, swanga hi leswi ahumexelaka tiko.

⁴Akuna mhunu lweyi atitekelaka akukhenseka loku, loko ange lweyi avitaniwiki hi Xikwembu Nkulukumba, swanga hi laha swi humeleliki ku Aroni.

⁵Xiswoswo, na Yene Kriste angatidrumisanga akuva atiyentxa muprista lwenkulu ha swake, kambe adrumisi lweyi angaku: Wene u N'wananga, kusukela namuhla ni tatana waku.

⁶Swanga hiku wun'wana mbangu angaku: Umuprista hilaha kungahelikiki, hindlela ya Melkisedeki.

⁷ Yene Yesu, amasikwini ya kuhanya kwake anyameni, ahumexeli hi swidrilo kun'we ni minyembeti leyiminyingi, a swikhongoto ni mintratriyo ku lweyi afaka a kota kumuhuluxa ku lifu, avi ayingeliwa hinkonta ya kutxhava Xikwembu Nkulukumba.

⁸Nambi leswi anga N'wana, a dondrile akuva amuyingiseta hinkonta ya mintxhumu leyi axanisekiki ha yone.

⁹Kuti loko ahetisekisiwile, andruluki Muvangi wa huluku ledri dringahelikiki ku hinkwavu lava vamuyingisetaka.

¹⁰Leswi ahlayiwiki hi Xikwembu Nkulukumba leswaku i muprista lwenkulu hi ndlela ya Melkisedeki.

¹¹Amhakeni leyi, hi na swinyingi leswi hinga mihlayelaka; kambe swanonon'hwa kuswitlhamuxela, hikusa n'windruluki lava vangadjulikiki kuyingelisisa.

¹²Nambi leswi swoswi afaka n'wifanekeli kuva vadondrisi. Kambe hikulandra minkama leyi mihundriki, mahadjula mhunu lweyi angadondrisaka, ha wumpswha aswileleto swa masungulu ya timhaka ta Xikwembu Nkulukumba, xileswo n'windruluki lava vadjulaka ntrwamba na kunge hi swakuda leswi switiyiki.

¹³Hikusa mani na mani lweyi ahanyikiwaka hi ntrwamba ntsena, angawupfanga aritwini dra swakululama, hikusa i ntrongwana.

¹⁴Kambe a swakuda leswi switiyiki i swa lava vahetisekiki, lava hi swiyentxo swavu vangani vongwe lebyi byikotaka kuhambanisa, na kunge swakuxonga ntsena, kambe ni swakubiha.