Read ronga Heb 6 Bible Online

Heb 6 - ronga bible

Heb 6

¹Hikolahu, ahi trikeni tidondro ta masungulo ya Kriste, hi kongoma kuhetisekeni, hingavi beka kambe amasungulo ya kundruluka ku mintiro leyi mitifeliki, ni yakupfumela ku Xikwembu Nkulukumba,

²a dondro ya kutrakamisa, ni ya kutlhanteka mavoko, ni ya kupfuxiwa ka vafi; ni ya kuyavanyisa loku kungahelikiki.

³Leswo hita swiyentxa loko Xikwembu Nkulukumba a swipfumelela.

⁴Hikusa swingeyentxeki, leswaku lava vasamiki vavaningiwa, vangadringa a nyiko ya le tilweni, vangayaveliwa ni Moya lowu wakuxwenga,

⁵vangadringa ni vunandri bya ritu dra Xikwembu Nkulukumba, ni mintamu ya misava leyi mitaka,

⁶kunene vawile, swingena kukoteka kutlhelela vapfuxetiwa akutisoleni, hikusa vatlhela vativambela N'wana wa Xikwembu Nkulukumba, vamuyentxa xisandru livaleni.

⁷Hikusa a misava leyi minwaka mpfula leyi yitekisaka kuwela henhla ka yone, mimilisa timbowa leti tipfunaka lava vatidrimelaka yone, makukuma kukatekisiwa hi Xikwembu Nkulukumba.

⁸ Kambe leyi misava mihumexaka mitwa ni matlhavatlhavana madreliwa, mi le kushi ni kuruketeliwa; a kuhela ka yone kutava kupswha.

⁹Kambe loko ali n'wine-ke, varandriwa, hi lavisela mintxhumu leminene, mintxhumu lemifaneliwaka hi huluku, swin'witlhasisa kuhuluxiweni, nambi hinga khanelisa xiswoswo.

¹⁰Hikusa Xikwembu Nkulukumba angana mona, akuva adrivala ntiro wenu ni lirandru ledri n'widrikombisiki ku vito drakwe, hikusa n'witirelile, mfuri n'wahata tirela vahlawuliwa.

¹¹Kambe hi navela leswaku mun'wana-ni-mun'wana wenu akombisa nkhinkhi leyinga yin'we, akuva a kulavisela kwenu kuva loku kutiyiki kutlhasa vugamu;

¹²akuva n'wingavi lava valolohaka, kambe n'wiva lava vayetisaka lava vadiki pfindla dra xidumbiso hi kupfumela ni kulavisela.

¹³Loko Xikwembu Nkulukumba a dumbisile Abrahamu, leswi akungeke na mumbeni lweyi a nga nkulu ku yene, lweyi akotaka kufunga ha yene, ali kutifungela ha swake,

¹⁴ aku: Kunene-nene nita kutovokisa ngopfu, nita kuyandrisa.

¹⁵Hileswo-ke, Abrahamu hi kulehisa mbilu, akumi leswi adumbisiwiki swone.

¹⁶Hikusa a vhanu vayentxa xifungu hi lweyi anga nkulu ku vone, Kutani a kufunga swiheta ni kutiyisa timhaka, ku vone i vugamu bya timholova hinkwatu.

¹⁷Hikolahu ka leswo, loko Xikwembu Nkulukumba, arandri kukombisa hi ntamu kuvadi va pfindla dra xidumbiso, leswaku a makungu yake hi lawa yakuka manga heli, atinhingenisi hi kufunga

¹⁸akuva hi kuhangwesa, leti tibiri tingeke na kuhela, inga leti swingakotekiki leswaku Xikwembu Nkulukumba ahemba ha tone, hi ndlela leyi hine hikumiki xitiyiso lexi xa ntamu, hi fanela kukhoma kulavisela loku bekiwiki mahlweni kweru;

¹⁹leyi hinga na yone ndreni kweru swanga nsoma ya hika, yitiyiki, yi nhingenaka ndreni ka xisirelelo xa yindlu ya Xikwembu Nkulukumba;

²⁰lomu Yesu anganhingena hinkonta yeru, avamurangeli weru, lweyi atiyentxiki muprista lwenkulu hi laha kungahelikiki hi ndlela ya Melkisedeki.