Read ronga Heb 7 Bible Online

Heb 7 - ronga bible

Heb 7

¹Hikusa Melkisedeki yelweyi afa ali mufumi wa Salema ni muprista wa Xikwembu Nkulukumba wa le henhla-henhla, lweyi anga tlhangaveta Abrahamu loko abuya hi le kudlayeni ka vafumi, kutani amutovokisa.

²Kutani Abrahamu amupumbela vukhume bya hinkwaswu; na kone kusunguleni, vito dra Melkisedeki swihlaya leswaku Mufumi wa kululama, na kone mfuri, Mufumi wa Salema, kumbe leswaku Mufumi wa kurula.

³Lweyi afaka angana tatana, angana mamana, kumbe longoloko dra vuxaka byake, angavanga ni masungulo ya masiku, nambi byi vutomi byake abyi na vugamu; kutani a fanisiwile ni N'wana wa Xikwembu Nkulukumba, kutani atrhami ali muprista hi laha kungahelikiki.

⁴Lavisani-ke, a vukulu bya kunhati bya lweyi kokwana Abrahamu, angamunyika swa vukhume dra swalisima leswi phangiwiki yimpini.

⁵Ke, navone vaka Levi lava kumiki vuprista, valeletiwile kuteka swa vukhume hi nawu, ku tiko hileswaku vaswiteka ku vamakwavu, nambi leswi vahumiki khurini dra Abrahamu.

⁶Kambe lweyi afaka ange wa lixaka dravu, ateki swa vukhume ku Abrahamu, ava atovokisa lweyi afaka ali ni xidumbiso.

⁷Kambe akuna kuganaganeka leswaku lweyi anga lwentrongo hi yene lweyi atovokisiwaka hi lwenkulu.

⁸Mfuri kumhaka leyi, kunene, a vhanu lava vafaka vayamukelaka swavukhumi; lahu na kone, lweyi kukhaneliwaka ha Yene leswaku awahanya.

⁹Kutani hikuhlayisa xileswi, yene Levi lweyi atekaka a swavukhume, na yene aswihumexile ha Abrahamu.

¹⁰ Hikusa afa ahali angatini ya tatana wakwe, loko Melkisedeki aya mutlhangaveta Abrahamu.

¹¹Hileswo-ke, loko akuhetiseka afa kuvi ha vuprista bya ka Levi lweyi tiko dringa nyikiwa nawu henhla kwake, xana afa swahafanekela ha yini leswaku kupfuxiwa muprista mun'wana, hi nawu wa Melkisedeke, na angavitaniwanga hi nawu wa Aroni xana?

¹²Hikusa loko kurumiwa muprista, swadjuleka na kone kundrulutiwa a nawu.

¹³Hikusa lweyi amintxhumu leyi mihlayiwaka henhla kwake, afa ali wa lixaka drin'wana, na swone kudrone aku sihuma ni mun'we lweyi angasamiki atisa amagandrelo xiluvelweni.

¹⁴Swativeka leswaku a Hosi yeru yihumi lixakeni dra ka Yuda; alixaka drodri Moxe angasamikiki adrinyika muprista.

¹⁵Swavoneka ngopfu hi kutlulisa mfuri, loko kutumbuluki muprista lweyi afanaka na Melkisedeki,

¹⁶lweyi abekiwiki na kunge hi kulandra milawu ni swileleto swa nyama, kambe kuli hi ntamu wa vutomi lebyingekena kuhela.

¹⁷Hikusa hikola kwake a Tralwa drakuxwenga dritiyisa driku: Wene u muprista hilaha kungahelikiki, hi kuleleta ka Melkisedeki.

¹⁸Hikusa a nawu lowu wa kuranga wuhelisiwile, hikusa afa wuli ni gome, wunga pfuni ntxhumu.

¹⁹(Kutani a nawu awuhetisisanga ntxhumu ni mun'we), kambe hi tlhelo drin'wana kunhingenisiwa akulavisela lokukulu, loku hi trhindrekelaka ku Xikwembu Nkulukumba ha kone.

²⁰Akuyentxiwi na kungafungiwi, hikusa lava vabekiwi awuprista na vanga funganga,

²¹kambe Yelweyi, hi kufunga hinkonta ya lava angaku: Hosi yi fungile, kutani angaka angandruluki makungu yake. Wene umuprista hi laha kungahelikiki, hikulandra leleto dra Melkisedeki.

²²Hiswoswo Yesu avi mutiyisi wa xipfumelelanu lexi xitlulaka lexi xakhale.

²³Na swone, lavo vayentxiwi vaprista hi ntrengo wakuhlawa, hikusa vayaleliwile kuya mahlweni hikola ka lifu,

²⁴kambe Yelweyi, hi leswi atrhamaka hilaha kungahelikiki, ana nivuprista lebyingahelikiki.

²⁵Hileswo-ke, vangaswikota kuhuluxa lava trhindrekelaka ku Xikwembu Nkulukumba, leswi ahanyaka hilaha kungahelikiki akuva ava khongotelela.

²⁶Hikusa afa hifanekeliwa hi muprista lwenkulu lweyi waku tanu, wa kuxwenga, lweyi angeke na nandru, ni xambya, lweyi a travukaniki ni vadohi, lweyi angatlakuxiwa henhla ka matilo.

²⁷Lweyi swingadjulekiki akuva a nyikela switlhavelo masiku hinkwawu, swanga hi vaprista lava vakulu, hikusungula hikola ka swidoho swake, ntrhaku hikola ka swa switrhungu, hikusa a yentxi leswi kan'we ntsena hi kutinyiketa ha swake yiva mhamba.

²⁸Hikusa a nawu wubeka vhanu lava vanga ni gome vava vaprista, kambe a ritu dra xifungu lexingahlayiwa antrhaku ka nawu, xibekiwi N'wana lweyi ahetisekiki hi la kungahelikiki.