Read ronga Ykb 2 Bible Online

Ykb 2 - ronga bible

Ykb 2

¹Vamakweru, n'wine n'wipfumeliki ku Hosi yeru Yesu Kriste, Hosi yeru ya ntwalo, n'wingave ni xihlawu-hlawu xa vhanu hi mpimu wa kuhambana.

²Loko kunhingena mhunu wakukari a sinagogeni drenu, na ali ni switlan'wana swa gole, ayambali minkantxu leya hombe, kunhingena mfuri mun'wana wa xisiwana na ayambali minkhantxu leya kuhoneka.

³N'wine n'wilavisa lweyi a yambaliki minkhantxu leyi ya hombe, n'wiku ku yene: Wene, trhamisa hi la ku mbangu wa lisima! Ntrhaku n'wiku ku xisiwana: Wene, yima hi la, kumbe trhamisa la hansi, kusuhi ni vunalavutelo bya minkondro yanga.

⁴An'wiswivoni leswaku n'wiyentxa kuhambanisa makari kwenu mfuri, an'witiyentxanga vayavanyisi va vhanu, hi miyanakanyu leyi minfani?

⁵Yingelani swinene vamakweru lava varandriwaka. Xikwembu Nkulukumba atihlawuleli lava vangaswisiwana ku mahlu ya misava, akuva avayentxa swipfundri hi kupfumela ni kuvayentxa vadi vapfindla va mfumu lowu Yene awudumbisiki lava murandraka?

⁶Kolahu-ke, n'wine van'wana n'widrela swisiwana. Kambe xana ahivapfundri lava van'wixanisaka, ahivone lava van'wikokoviselaka a tihubyini ta kuyavanyisa xana?

⁷Ahivone lava rukaka vito ledra hombe, ledri n'wivitaniwaka ha drone xana?

⁸Loko kunene n'wilavisisa Nawu, swanga hi kuhlaya ka Tralwa, driliki: Utarandra mhunukuloni swanga hi leswi na wene utirandraka, n'wiyentxa leswi swinene.

⁹Kambe loko n'wiva ni xihlawu-hlawu makari ka vhanu, n'wiyentxa xidoho, n'wikuma nandru, hikuva n'witlula nawu.

¹⁰Hikusa lweyi a bekisaka swileleto swa nawu, kambe adrela xin'we ntsena ku swone swanga hi loko adreli hinkwaswu.

¹¹ Hikusa lweyi atiki: Ungaviyentxa vumbuye, na kone ati: Ungavidlaya. Kambe loko uyentxa a vumbuyi, kumbe udlaya, undruluka mutluli wa nawu.

¹²Kambe vulavulani n'wihanya swanga lava vataka yavanyisiwa hi nawu wa vuntrhunxeki.

¹³Hikusa a tremo dritava drakukala lirere ku lweyi atakava na angakombisanga lirere, a lirere drititwalisa henhla ka tremo.

¹⁴Swipfuna yini vamakweru, loko a mhunu ahlaya leswaku ani kupfumela na angena mintiro? Xana akupfumela loko kutamuhuluxa xana?

¹⁵Loko makwavu wa wanuna kumbe makwavu wa wansati, vaswelile, vapfumala swa ntxhumu swakuda siku drin'wana ni drin'wana,

¹⁶mun'we ku n'wine avabyela aku: Fambani hi kurula, kufumelani, xurani, na n'wingavanyiki leswipfunaka miri, mapfuna yini amaritu wolawo?

¹⁷Hi swoswo, a kupfumela ka kunhati loko kungena mintiro, kutifelile.

¹⁸Kambe a mun'we angahlaya leswku: Wene, unikupfumela; na mine, ni mintiro; ni kombe akupfumela loku kwaku, na kungena mintiro, kutani mine, hi mintiro, ni takukomba akupfumela kwanga hi mintiro.

¹⁹Wene wa pfumela leswaku Xikwembu Nkulukumba i mun'we ntsena? I swinene! Kambe na wone mademoni mapfumela matlhela marurumela.

²⁰Waswidjula kupfumela, wene mhunu wa kuka ndlela leswaku, akupfumela loku ngeke na mintiro a kupfuni ntxhumu?

²¹Abrahamu kokwana weru ahlayiwi mululami hikola ka mintiro, loko anyiketi a n'wana wakwe, Yisaki a vugandrelweni. Akuvanga hi mintiro loko yene akombisiki vupfumeli byake?

²²Wa swivona leswaku a kupfumela kutirisana kun'we ni mintiro; hikolahu, i vali hikola ka mintiro kuhetisekiki kupfumela,

²³Kuhetitisekile amatralwa lawa mahlayaka leswi: Abrahamu apfumeli ku Xikwembu Nkulukumba, leswo swimuyentxi ahlayiwa mululami: na kone, avitaniwile nakulobye wa Xikwembu Nkulukumba.

²⁴Hileswo-ke, lavisisani leswaku, a mhunu a hlayiwa mululami na kunge hikupfumela ntsena.

²⁵Hixiswoswo Rahabi, lweyi wa vumbuye, ahlayiwi lweyi wa kululama hi mintiro, loko ayamukelile tinhloli, atihumexa hi yin'wana ndlela?

²⁶Swanga hi leswi amiri leyi mingeke na moya, mi file, hi swoswo ni kupfumela loku kungeke na mintiro, kufile.