Read ronga Ykb 4 Bible Online

Ykb 4 - ronga bible

Ykb 4

¹Kuhuma kwini a kulwa ni kukanetana, loku kunga makari kwenu xana? A kuhumi kunaveleni ka kutinyoxisa loku kupfuxaka kulwa a nyameni yenu?

²N'wanavela, kambe an'wina ntxhumu; n'wadlaya ni kutrhohoka, kambe an'wikumi ntxhumu; n'wihanya hi kulwisana, ni kukanetana; an'wikumi ntxhumu, hikusa an'wikombeli.

³N'wakombela n'wingayamukelisiwi, hi leswi n'wikombelaka hi kubiha, akuva n'wiswihangalasa akunyoxeni kwenu.

⁴Vhanu lava vangadumbekikiki! [1] An'wiswitivi leswaku avunakulobye ni misava i vunala ku Xikwembu Nkulukumba xana? Hileswo-ke, loko mhunu arandra kuva nakulobye wa misava, atiyentxa nala ku Xikwembu Nkulukumba.

⁵Kumbe n'wiyanakanya leswaku atralwa drikhanela mahala loko driku: Yene anivukwele hinkonta ya Moya lowu awubekiki ku hine?

⁶Kambe Yene anyika timpswalu letikulu hi kutlulisa. Hikola ka leswo a Tralwa drakuxwenga drili: Xikwembu Nkulukumba ayalela lava tikukumuxaka, kambe anyika timpswalu lava vatitrongohataka.

⁷Hileswo-ke, titrongohatani ku Xikwembu Nkulukumba; na n'wiyalela Diyavulosi atatrutruma ku n'wine.

⁸Trhindrekelani ku Xikwembu Nkulukumba na Yene atatrhindrekela ku n'wine. Hlambani mandla, vadohi; na n'wine lava va timbilu tibiri, basisani timbilu tenu.

⁹Vavisekani, n'wiba nkosi; n'widrila. A mahleko yenu amandruluke swidrilo, ni kutrhava kwenu, a kuve kuvaviseka.

¹⁰Titrongohatani mahlweni ka Hosi, yone yitan'wikulisa.

¹¹Vamakweru n'wingakhaneleni kubiha van'we ku van'wana. Lweyi akhanelaka kubiha hi makwavu kumbe ayavanyisaka makwavu, akhanela kubiha hi Nawu, awayavanyisa. Kutani ke, loko uyavanyisa nawu, awumulavisi wa nawu, kambe umuyavanyisi.

¹²Kutani i mun'we ntsena anganintamu wa kunyika milawu ni kuva mutremi. Kambe u mani wene, lweyi uyavanyisaka mhunukuloni?

¹³Yingisani swoswi, n'wine lava vahlayaka leswaku: Namuhla kumbe mundruku hitaya mutini wa kukari, hiya heta lembe kone, hi yentxa mabindru yeru, hi kuma vukosi byinyingi.

¹⁴N'wine an'witivi leswi switaka humelela mundruku. Avutomi byenu i yini xana? N'wi fana ntsena ni hunguva leyi yi humelelaka, hi kukahlula hi nkamanyana yihatla, yi nyamalala.

¹⁵Handle ka leswo, afa n'wifanela kuhlaya leswaku: Loko a Hosi yiswirandra, hitahanya, na kone mfuri, hitayentxa swakukari ni swakukari.

¹⁶Kambe swoswi n'witikutxa hi kutikulisa kwenu. Akutitlakuxa hinkwaku ka kutani, kubihile.

¹⁷Kutani lweyo ni lweyo ativaka kuyentxa leswi swa hombe, ava angaswiyentxi, ku leswo ayentxa xidoho.