Read ronga I Ptr 2 Bible Online

I Ptr 2 - ronga bible

I Ptr 2

¹Ke, na n'witriki vubihi hinkwabyu, vukanganyisi hinkwabyu, ni mandrendre, ni matrhoho, ni mahlevo,

²swanga swihlangi leswi swahaka kubelekiwa, navelani a ntrwamba lowu nene wa moya, akuva ha wone n'wikula akuhulukeni,

³loko ha kunene n'widringile leswaku a Hosi i yinene;

⁴lweyi n'witrhindrekeliki ku Yene, anga ribye ledri drihanyaka, ledri dringadreliwa hi vhanu, kambe amahlweni ka Xikwembu Nkulukumba drihlawuliwiki na drili dra lisima ngopfu.

⁵Na n'wine, swanga maribye lawa mahanyaka, n'wiyakiwa n'wiva yindlu ya moya, avupristeni bya kuxwenga, akuva n'winyikela ha Yesu Kriste, a timhamba ta moya, leti tiyamukelekaka ku Xikwembu Nkulukumba.

⁶Hikusa ku Matralwa kuni leswaku: Vonani, nibeka a Siyoni a ribye dra hoka, ledri drihlawuliwiki, dra lisima; na kone lweyi apfumelaka ku drone angavina tingana.

⁷Hileswo-ke, n'wine lava vapfumelaka vanani ni xihluwa, kambe ku lava va kuka-kupfumela, a ribye ledri a vayaki vadridreliki, drindruluki a ribye dra hoka;

⁸na swone: Ribye dra kukhunguvanyisa, ni ribye dra kudohisa; vone lava vakhunguvanyeka aritwini, na vangayingiseti nambi ku leswi vakongomiseliwiki swone.

⁹Kambe n'wine lixaka dra kuhlawuliwa, vuprista bya vuhosi, tiko drakuhlawuleka, xitrhungu xilumbaka ntsena Xikwembu Nkulukumba, akuva n'witivisa a vunene bya lweyi an'wivitaniki amunyameni, an'witisa alivaningweni drakwe dra kuhlamalisa;

¹⁰n'wine lava a khale afaka n'wingali tiko[1], kambe swoswi n'winga tiko dra Xikwembu Nkulukumba, a khale afaka n'wingayamukelanga a lirere dra Xikwembu Nkulukumba, kambe swoswi n'wiyamukeli lirere.

¹¹Varandriwa, nan'witratriya swanga valuveli ni vayendri amisaveni leyi, leswaku n'witrika a kunavela swa nyama, loku kulwaka ni moya;

¹²n'wiva ni mahanyela manene amakari ka va-Matiko, akuva, leswi van'wihlevaka ha swone swanga tinsulavoya, hi kuvona a mintiro yenu leminene, vatatwalisa Xikwembu Nkulukumba hi siku ledri atakavayendrela ha drone.

¹³Hinkonta ya Hosi, tibekani hansi ku milawu hinkwayu ya vhanu: ku mufumi-nkulu swanga n'winyi wa vufumi,

¹⁴kumbe ku tindruna swanga varumiwa va mufumi-nkulu akukhatiseni ka tinsulavoya, kambe akukhenseni ka vhanu lava vayentxaka leswi swinene,

¹⁵hikusa loko i kurandra ka Xikwembu Nkulukumba, leswaku, hi kuyentxa leswinene, n'wimiyeta a vhanu lava va masinge, ni vhanu lava vangativikiki ntxhumu;

¹⁶swanga vhanu lava vantrhunxekiki, na n'winga londrovoti a vuntrhunxeki akuva n'wiyentxa vubihi, kambe vatireli va Xikwembu Nkulukumba.

¹⁷Vana ni xihluwa ku hinkwavu, randrani a vukwavu, txhavani Xikwembu Nkulukumba, n'wivani xihluwa ku mufumi.

¹⁸Vatireli, tibekani hansi, hi xitxhavu hinkwaxu, ku vinyi venu, kungali ku lava vanene ni va kunabyala ntsena, kambe na kone ku lava va kulebya.

¹⁹Hikusa leswo i nyiko ya timpswalu, akuva a mhunu, hi kutiva Xikwembu Nkulukumba, atiyisela axaniseka anhlomulweni na swingafanekelanga.

²⁰Hikusa n'wini kutwaliseka ka kuyini loko n'witiyisela akuhodlotiweni na n'widohile, xana? Kambe, loko n'witiyisela akuxanisiweni na n'wiyentxa leswi swinene, leswo swakhenseka amahlweni ka Xikwembu Nkulukumba.

²¹Ke n'wivitaneliwi swoleswo, hikusa na yene Kriste axanisekeli n'wine ava an'wisiyela a xikombiso, akuva n'wilandra a mintila yake,

²²Yene lweyi angayentxangakiki xidoho, mfuri akukumiwanga vukanganyisi anon'wini wakwe;

²³hikusa ni loko aruketeliwa, afa angayanguli hi swiruku, loko axanisiwa, afa angatxhaviseli mhunu, kambe afa anyiketa hinkwaswu amavokweni ya lweyi ayavanyisaka hi kululama;

²⁴hi Yene abyatrhiki a swidoho sweru amirini yake amhandreni ya xihambano, akuva hine, na hifeli swidoho, hihanyela a vululami; hi Yene mfuri hi swilondra swake n'wine n'widahiwiki.

²⁵Hikuva, n'wine afa n'wili swanga hi tihamba ta kulahleka, kambe swoswi n'witlheleli ku mubyisi ni mulaviseli wa mahika yenu.