Read ronga I Ptr 3 Bible Online

I Ptr 3 - ronga bible

I Ptr 3

¹Vavasati, na n'wine tibekani hansi amahlweni ka vanuna venu, akuva loko kuni lava vayalaka a ritu, hi mahanyela yenu, kungali hi kuvulavula, na vone vakokiwa,

²hi kuvona a mahanyela yenu lawa mabasiki, ni xitxhavu xenu.

³A kuxonga kwenu kungavi ka le handle, ka kulehisa misisi, ni swakutixongisa ha swone swakuhambiwa hi gole, ni minkhantxu ya kudula ngopfu,

⁴kambe xongisani a mhunu wenu wa le ndreni, wa mbilu, hi swiyambalu leswi swingabolikiki swa moya wa kunabyala ni kurula, wungani lisima drikulu amahlweni ka Xikwembu Nkulukumba.

⁵Hikusa a khale, na vone a vavasati va kuhlawuleka, lava afaka valavisela ku Xikwembu Nkulukumba, afa vatixongisisa xiswoswo, na vatibeka hansi amahlweni ka vanuna vavu,

⁶swanga ha Sara ayingisetiki Abrahamu, na amuhlaya n'winyi wakwe; Sara lweyi n'wine n'windrulukiki vana vakwe hi kuyentxa leswinene na n'wingatxhavisiwi ha ntxhumu.

⁷Hi ndlela yoleyo, na n'wine vanuna, hanyani ni vasati venu na n'witiva leswaku vone vafana ni swibya leswi swingatiyangakiki, n'wivabekela xihluwa swanga vadi-pfindla kuloni va timpswalu ta vutomi, akuva a swikhongoto swenu swingahlulekisiwi.

⁸Hi vugamu, vanani va mayanakanyela man'we, n'wili va kutretrelela, n'wini lirandru dra xikwavu, n'wivani vumbilu ni kutitrongohata,

⁹n'wingatlheliseli vubihi hi vubihi kumbe xiruku hi xiruku, kambe hi kuhambana ni leswo, hlayelani maritu manene hikusa n'wivitaneliwi leswo, akuva n'wiyamukela a pfindla dra nkateko.

¹⁰Hikusa lweyi adjulaka kurandra a vutomi, ni kuvona a masiku manene, ampfekele lidrimi drakwe kuleswi mfani, ni nomo wakwe akuva wungavulavuli vukanganyisi.

¹¹Aafularele a swakubiha, ayentxe leswinene, adjule a kurula ava akulandra akondra akukuma;

¹²hikusa a mahlu ya Hosi male henhla ka valulami ni tindleve ta Yone tiyingiseta swikombelo swavu, kambe a liso dra Hosi drihambana ni vayentxi va swakubiha.

¹³Hi mani lweyi atakan'wiyentxela kubiha, loko n'wikhinyela ku swahombe xana?

¹⁴Kambe, na kone loko n'witxhuka n'wixaniseka hinkonta ya vululami, n'wikatekile. N'wingatxhaveni kutxhavisela ka vhanu, mfuri n'wingakaratekeni ha ntxhumu,

¹⁵kambe xwengisani Kriste, swanga Hosi, atimbilwini tenu, n'witrhama na n'witibekiselile minkama hinkwayu a kutiyangulela ku mani-na-mani lweyi atakatxhuka an'wivutisa xa ntxhumu mayelano ni kulavisela loko kunga ku n'wine;

¹⁶kambe swiyentxani hi kunabyala ni xitxhavu, n'wivani lipfalu ledrinene, akuva, ku leswi van'wifingetaka ha swone, vava ni tingana lava van'wifingetaka hi mahanyela yenu lawa manene ku Kriste.

¹⁷Hikusa swayampswa a kuxaniseka, loko kurandra ka Xikwembu Nkulukumba kuli koloko, hi kuyentxa leswi swinga swinene, kutlula a kuyentxa a swakubiha.

¹⁸Hikuva na yene Kriste axaniseki kan'we hinkonta ya swidoho, yene Mululami, hinkonta ya vasomboloki, akuva an'wiyisa ku Xikwembu Nkulukumba; yene hi tlhelo drin'we afiki anyameni, kambe hi tlhelo drin'wana ahanyisiwiki amoyeni;

¹⁹lowu ha wone ayiki ayarera ku mimoya leyi afaka mili bohelweni,

²⁰leyi a khale miyaliki a kuyingiseta, loko Xikwembu Nkulukumba, ahayimela hi kuleha-ka-mbilu, amasikwini ya Nowa, loko kahayakiwa a ngalawa, leyi kungahuluxiwa ha yone a vhanu vatrongo, hileswaku, ntlhanu na vararu, amakari ka mati;

²¹lawa na n'wine, swanga xikombiso xa babatiso, man'wihuluxaka swoswi, kungali kususa nxambya ya nyama, kambe kuli kudjulela Xikwembu Nkulukumba a lipfalu ledrinene hikola ka kupfuka-kufeni ka Yesu Kriste,

²²lweyi anga xineneni xa Xikwembu Nkulukumba, ntrhaku ka loko atlhantukeli Matilweni, abekiki a hansi kwake a tintrumi, ni vuhosi, ni mintamu hinkwayu.